allin tantiachicuynïta sumäta ćhasquiycuy.

2 Chayćha sumä tantiaywan caycunqui;

limalpis yaćhaywanmi limaycunqui.

3 Mansibädu walmicunäpa shimillanꞌa mishqui-mishqui maypis aticunamá;

limayninpis asaytinu llampu-llampumá.

4 Camacayninñatacmi ajinjup ćhacćhayninmannu muyun;

ishcay lädun afiläśha ispädamannümi muyun.

5 Chaynu walmiwan pulïca wañuymanmi liyan;

ćhaquinpis sipultüramanmi puśhayan.

6 Paytá allin cawsayca manamá imapis ucunchu;

mana allin caminup lishantapis manamá tantiacunchu.

7 Iju,

canan má,

sumäta uyalimay:

limapäśhäcunacta ama unꞌaycuychu.

8 Mansibädu walmipïta aśhucuy,

wasinpa puncullanmanpis ama jaluycuychu,

9 mana lisishacunaman allin cayniquita mana uyänayquipä,

cawsayniquitapis juyu nunacunawan pampaman mana muyuyächinayquipä.

10 Mana lisishayqui nunacunam cäniquiwan rïcuyanꞌa;

lluy lulaśhayquicunapis juccunapämi canꞌa.

11 Chay aychayqui,

cawsayniqui masta-masta

camacalpuptinñatacmá llaquicuypi apalcaćhanqui:

12 “Limapämäśhanta uyalicullämanpis cala;

anyapämäśhanta cäsucullämanpis cala.

13 Imapïtá limapämänïta mana uyaliculächu;

imapïtá yaćhachïnïta mana ćhasquiculächu.

14 Cananñatac jinantin malcamasïcunap

ñawquin mana allincäpa patanćhu cacuyällá” nil.

15 Walmillayquiwan jawca caycuy;

awari,

quiquiquip pucyuyquip yalamü yacullayquita upyaycuy.

16 Pucyuyquip yacunta waśhacunaćhuꞌa ama usuchiychu;

yacuyquita läsacunäćhuꞌa ama usuchiychu.

17 Pucyupis yacupis amllapämá;

manamá juccunaman uycuyänayquipächu.

18 Pucyuyqui allinniquipä caśhanta licaycuy;

awari,

müsu caśhayquipi walmillayquiwan cushiculcay.

19 Pay cayan luychunümá;

tuquish-tuquish munti capishnümari cayan.

Paypa cuyacuyllanwan imaypis jawcayaycuy;

cuyacuyllanćhu imaypis tacyaycuy.

20 Iju,

¿imapïtamá jucpa walminwan apachicuyanqui?

¿Imapïtamá jucpa walminta macallacuycunqui?

21 Tayta Diospa ñawillanćhümá nunacunäpa ima lulaśhancunapis cayan;

paymá imaćhu pulishantapis licayan.

22 Mana allin nunäpá lulayllanmá cunca cuchuynin;

quiquinpa juchallanmá ćhänalächin.

23 Mana sujitacuyninmá wañuyman ćhächin;

sumä luclu cayninmá pampaman muyuchin.^a