¡Śhunꞌullay,

Tayta Diosta alaway!

2 Cawsaśhäcama Tayta Diosnïta alawaśhämá.

Cayćhu caśhäcama taquicunawanmá alawaśhä.^a

3 Canan má,

mandacücunäman ama chalapaculcaychu.

Salbacuyta mana atipä wañucücunällamanꞌa ama chalapacuychu.

4 Paycuna wañülälilꞌa caśhan allpallamanmari muyülälin.

Chay muyunllamá lulay munaśhancuna camacälun.

5 Jacobpa Tayta Diosnin yanapäśhan nunaca cushisha cachun.

Tayta Diosllaman chalapacücunaca cushisha cachun.

6 Paymá sïlüta,

allpäta,

lamarcäta lluy imapis cänintinta lulala.

Awari chaycunaćhu lluy ima cäcunätapis paymi lulala.^b

Lluy imaćhüpis imaypis payꞌa chalapacunamá.

7 Tayta Diosmá ñacäcunätapis tincüninman licaycun,^c

micuypi cäcunätapis micuyta uycun.

Paymá ćhänaläśha cäcunätapis libraycun.

8 Tayta Diosmá aplacunäpa ñawinta quićhaycun.

Tayta Diosmá cućhpäśhacunäta śhalcachin.

Tayta Diosmá allin luläcunäta cuyan.

9 Tayta Diosmá juc lädu malcayücunäta licaycun.

Paymá walmi japanyäśhacunäta,

mana taytayu mamayücunätapis yanapaycun.

Mana allin nunacunäpä lulaynincunactañatacmi ichá

mana caśhanman muyuchin.

10 Am Sion ulꞌu uyalimay,

Tayta Diosllam wiña-wiñaypä mandacunꞌa.

Tayta Diosnillayquimá imaycamapis mandacunꞌa.

Tayta Diosta alawapäcuy.