paymá licläta pilyanäpä yaćhaycachiman,

maquïtapis camacaycünäpä yaćhaycachiman.

2 Paymá llaquipaycamäní,

pacaycamäní,

licaycamäní,

libraycamäní,

atajaycamänïpis.

Payllamá chalapacuná.

Paymá lluy malcacunätapis maquïman ćhulaycamüca.

3 Tayta Diosllay,

¿nunaca mayantá callan

payllamanña pinsalayänayquipä?

¿Nunallap chulinca mayanmá callan

payllactaña ama-pachayänayquipä?^a

4 Nunaca chincacü jämaycänüllamá.

Cawsayninpis pasacü llantuycänüllamá.

5 Tayta Diosllay,

sïlüta paquilcul jiꞌalpaycamullayꞌari.^b

ulꞌucunäta yataycul untächiy.

6 Räyucunacta ćhaycachimulꞌari ćhïnicücunäta chiꞌichiy.

Flïchayquita ćhaycachimulꞌari wicta-cayta ayichiy.

7 Janay caśhayquipi maquiquita chacchalpaycamul

sumä lamarnu cayäcäpi julaycallämay.

Juc caśhtacunäpa maquinpïta libraycallämay.

8 Shimincuna casquicunallactañamá nipäcun.

Allï maquintapis artinwan limalicunallanpämá pallalcapäcun.

9 Tayta Diosllay,

muśhü taquicunawanmá alawaycuśhayqui.

Arpawanmá alawaycuśhayqui.

10 Anmá mandacücunäta llalliycachinqui.

Anmá ispädawan wañunanpïta nunayqui Davidta salbaycunqui.^c

11 Juc caśhtacunap maquinpïta libraycallämay,

salbaycallämay.

Shimincuna articunallactamá nipäcun.

Allï maquintapis casquinwan limalicunallanpämá pallalcapäcun.

12 Ñatac yaꞌacunap walaśh chulïcuna wirtaćhu cä sumä lantanu wiñapäcuchun.

Wamla chulïcunapis palasyup chalalä sumä

labräśha paradïruncunanu capäcuchun.

13 Pilwäcunapis imaymana micuycunap

sumä-sumä juntäśha caycuchun.

Uywäcunapis walanganpi (1,000) ćhunca walanganpi (10,000)

ćhacläcunaćhu milaycuchun.

14 Türücunapis lulapäcunanpä callpasapa-cama capäcuchun.

Murälläcunapis amari ućhcüśha,

laꞌaläśha cachunchu.

Amatac llaquicuycunapis,

apalcaćhaycunapis cachunchu.^d

15 ¡Cushiculcächun caycunacta ćhasquiycü malcacunaca!

¡Cushiculcächun Tayta Diosta Diosninpa licä malcacunaca!^e