Tayta Diostam sulpäta uycun
116
Mañacuylläta,
ayacuylläta uyaliycamäśhanpïtamá
Tayta Dioslläta cuyá.
2 Ayacuylläta uyaliycuśhanpïmá
cawsaśhäcama imaypis payllacta mañaculläśhä.
3 Wañuycäpis läsuwanmá alwïmäla,a
wañuy llaquicuycäpis chalämälamá.
Manchacuycäwan nanaycämá ćhänalayächimäla.
4 Chaymi Tayta Diosta ayacullalá:
“Tayta Diosllay,
cay cawsaylläta libraycallämay” nil.
5 Tayta Diosꞌa llaquipayniyu tincüllanman licaycümá.
Aw,
Tayta Diosꞌa sumä allin śhunꞌuyümá.
6 Mana sumä yaćhäcunätá ñawillanćhümá Tayta Dios caycachin.
Yaꞌactapis mana callpayu cayaptïmari salbaycamäla.
7 Śhunꞌullay,
Tayta Dios yaꞌawan allinta lulaycuśhanpïta,
jawcallañari caycuy.
8 Tayta Diosllay wañuycäpïtamá julaycamanqui;
wiꞌinïtamá pichaycamanqui,
lluchcanäpïtamá julaycamanqui.
9 Chaymari cay cawsäcuna caśhancäćhu
Tayta Diospa ñawillanćhu puliycuśhä.
10 Maynu sumä llaquićhu cayalpis
Tayta Diosllamanmá chalapaculá.b
11 Sumä llaquicuynïćhu cayalmari
“Lluy nuna artish-camamá” nilá.
Jinayalpis Tayta Diosllamanmari chalapaculá.
12 ¿Caynu-caynüpaña Tayta Dios
yanapaycamäśhanpïta imanuypamá pägayculläman?
13 Salbaycamäśhanpïtamá cüpacta altuman pallalculläśhä.c
Tayta Diostamá ayacuśhä.
14 Tayta Diosman limalicuśhäta
malcanpa ñawpäninćhümá lulayculläśhä.
15 Chalapacünincunap wañuynin
Tayta Diospa śhunꞌunman nana-nanaypam ćhaycun.
16 Tayta Diosllay,
yaꞌa chalapacüniqui uywayllayquimari callá;
nunallayquip wawinmari callá.
Anmá ćhänalächimäcunätapis laćhülunqui.
17 Sulpäta uycuynïwanmi altuman juluycuśhayqui.
Am Tayta Diosllätamá ayacamuśhayqui.
18 Tayta Diosman limalicuśhäta
malcanpa ñawquinćhümá lulayculläśhä;
19 Tayta Diospa alawana wasinpa patyunćhümi;
am Jerusalenpa ćhawpiquićhümi uyculläśhä.
¡Tayta Diosta alawapäcuy!