Tayta Diosmi sumä munayniyüca
Cuirdayu tucacuwan taquinapä Asafpa isquirbishan taqui; taquïcunäpa puydïninpämi.
76
Juda lädućhu Tayta Dios lisisha-lisisham.
Israel lädućhu śhutin altuman juluycuśhamá.
2 Salemćhümi carpan cayan.
Sionćhümi yaćhanan cayan.
3 Chayćhümi paquiypa pawäla flïchacta,
atajachicucta,
ispädacta,
pilyanapä lluy cäcunätapis.
Selah
4 Am sumä munayniyüca altuman juluycuśhamá canqui.
Wiña-wiñaypä cä ulꞌucunäpïtapis mas-maslämá canqui.
5 Sumänin nunacunälämari lluy-lluyta quitachicälälin.
Wañuy puñuyćhünümá lluy isälälin.
Alli-cama nunacunälämá imactapis lulayta nï atipapäcunꞌachu.
6 Jacobpa am Tayta Diosnin anyaycuptiquimá
cawalluncunapis,
carritancunapis manaña cuyuliyta atipapäcunñachu.
7 ¡Sumä manchaymi am cacullanqui!
Sumä piñacüluptiqui ¿mayantá ñawpäniquićhu śhaycuycunman?
8 Janay pachäpi cäraycunayquipä niycamuptiquim,
cay allpäpis manchacuypi tïsu quïdälun.
9 Tayta Diosllay,
chaynu pasaycun cäraycunayquipä śhalcamuptiquimá,
jinantin pachäćhu ñacäcunäta salbaycunayquipä śhalcamuptiquimari.
Selah
10 Nunacunäpa piñacuyninpis amta alawaycuymanmá muyun.
Piñacuyniquipi ayïcunäpis altumanmá julaycälishunqui.
11 Tayta Diosninchicman amcuna limalicul lulaycäliy.
Muyülïninćhu cäcuna sumä manchay cä
Tayta Diosman uycunayquicunacta apapämuy.
12 Paymi jinantin allpäćhu puydïcunätapis uyshulächin.
Jinantin pachäćhu mandacücunäpis paytamá manchaculcan.