Sumä-sumä ćhïnimänïcunapïta licaycallämay.

2 Mana allin lulayniyu nunacunap

limanaculcäśhanpïta pacaycallämay.

Mana allin camachinaculcäśhanpïta julaycallämay.

3 Alluntapis ispädactanümá afilayalcan.

Bininuyu flïcha ćhächicunnümá

limaynincunapis yalayalcämun.

4 Pacaläśhancunapïmi jawca cacü allin nunacunäman ćhächin.

Mana manchalmi unꞌaypi ćhächipäcun.

5 Quiquin-pulamá callpanchanaculcan

mana allincunäta lulapäcunanpäpis.

Trampacunacta maśhtaycälilmi:

“Mayanmá licanꞌa” nipäcun.

6 Mana allincunacta lulananpä tantiaycälilmá nipäcun:

“Sumä trampactamá ishpïchinchic” nil.

Nunacunäpä śhunꞌunćhu,

tantiayninćhu ima caśhantapis manamá yaćhaycunchicchu.

7 Tayta Diosñatacmi ichá paycunacta flïchanwan ćhächinꞌa.

Unꞌaypïmari dañädüśha licalïlälinꞌa.

8 Quiquincunap limayllancunam cunca cuchuynin caycunꞌa.

Chayta licäcunäñatacmi asipapäcunꞌa.

9 Chaylämi lluy-lluy nunacunaca Tayta Diosta manchaculcanꞌa.

Lulaycuśhancunätamá willaculcanꞌa,

jinaman chay lulaycuśhancunämanmi tantiapaycälinꞌapis.

10 Allin nunacunäñatacćha Tayta Diosćhu cushiculcal

payman chalapaculcanꞌa.

Chuya śhunꞌuyücunaca sumä-sumätalämá cushiculcanꞌa.