allincällam śhunꞌunćhüpis limapayan.

Chaymi Tayta Diosta uchuyllapis manchacuywan nï licaycälinchu.^a

2 Maypis alawaycunamá quiquillanpá cacuyalcan.

Mana allin lulaynincunacta mana licalmari

imapis nï uculcanchu.

3 Shiminpïpis mana allincunallawan

casquicunallamá yalaycamun.

Allin tantiayninpis lucluyäluptinmá allin lulaytapis caćhaycülun.

4 Puñunancunaćhüpis mana allincällactamá muspapacuyan.

Mana allin lulaycällamá wañupacuynin,

mana allincäta manamá ćhïnicunchu.

5 Tayta Diosllay,

llaquipäcuyniquim ichá

janay pachäcama ćhäyan.

Chalapacuna caśhayquim ichá pucutaycäcama ćhäyan.^b

6 Tincüninman licaycü cayniqui altu-altu ulꞌucunänümá.

Cäraycuyniqui luli-luli lamarcunänümá.

Am Tayta Diosllämá nunactapis uywactapis licaycunqui.

7 Tayta Diosllay,

llaquipäcuyniqui sumä-sumä ćhaniyümá.

Chaymari lluy nuna laplayquip lulinman pacaculcan.

8 Wasiquićhu alli-alli micuycunäwanmá maćhacaycälinpis.

Mayupïtanümá sumä mishquicunätapis upyaycachinqui.

9 Pucyup ñawinpïtänümá ampïta

cawsayca sumä yalaycamun.

Ampa achquïniquimá cawsaynïta sumä achquiycun.

10 Llaquipäcuyniquita lisishüniquicunamanꞌari ćhaycachiy.

Tincüniquiman licaycuyniquita allin śhunꞌuyücunamanꞌari ćhaycachiy.

11 Nunatucüśhacunaca ama jalutacamächunchu.

Mana allin nunacunaca amari cuyuchipämächunchu.

12 ¡Licapäcuy,

mana allin nunacunaca

cućhpächishañamá cayalcan!

¡Mana śhalcüñamá anćhanpälälin!