am yaćhayanquichun imatá?

¿Luychucunaca imay waćhayalcäśhantapis licayanquichun imamá?

2 ¿Ayca quilla pataläśhantapis fintayanquichun imatá?

¿Ima timpućhu waćhaculcänantapis lisiyanquichun imamá?

3 Waćhapäcun ćhucćhucaycälilmá;

näsichicülulmi nanayninpi jamaycapäcun.

4 Luychuchancuna wiñapäcunmi;

pastucunacta miculmi puꞌupäcun.

Chaypïta mana cutimüñam liculcan.

5 “¿Munti aśhnucunäta mayanmá caćhaycun?

¿Munaśhanćhu puliculcänanpä mayanmá pasquiycun?

6 Yaꞌamá chunyäcunäćhu yaćhananpä camaycachilá;

yaꞌamá cala ulꞌucunaca wasin cananpä ćhulayculá.

7 Malcaćhu tacwaypa-tacwaśhancunacta

chay aśhnucunaca manamá munanchu;

uywa atïcunap äśhaycaśhancunactapis manamá uyaliyta munanchu.

8 Pastucunacta ulꞌucunäćhümi ashipäcun;

birdi pastucunacta ashishtinmá pulipäcun.

9 “¿Munti wäcaca amta sirbiycuyta awniycuśhunquichun imatá?

¿Uywayquip watalänanćhu quïdaycunꞌachun imatá?

10 ¿Munti wäcawan äraycunquimanchun imatá?

¿Ćhaclayquićhu śhucaycunquimanchun imamá?

11 ¿Sumä callpasapa cayäcämanchun chalapacuyanqui imatá?

¿Lulayniquicunacta lulapuśhunayquipä chalapacuyanquichun imamá?

12 ¿Chay wäcachun cusichayquita

ïraman juntuycamul jaluycunꞌa imatá?

13 “¿Munti päbucunäpa tuquish-tuquish laplancunacta amchun uyculanqui imamá?

¿Abistruscunäpa sumä laplancunactapis amchun uyculanqui imatá?

14 Abistruscunaca luntuncunacta awishquicunämanmá^a ćhulapäcun,

intip acachayninwan paćhyapäcunanpä.

15 Mayan paquïnanpïpis paycunacta manamá imapis uculcanchu,

ütac munti uywacuna jalülälinanpïpis.

16 Quiquinpa wawin mana cätanümá ñacachipäcun;

lulaśhanca yanꞌal-yanꞌalpa caśhantapis manamá imapis ucunchu.

17 Paycunaman Tayta Dios manamá yaćhayta uyculachu;

nïtacmi tantiaytapis uyculachu.

18 Ñatac śhalcuculcul cürrilꞌa cawallucunäpïpis

sillädacunäpïpis mas-maslämi cürrin.

19 “¿Cawallucunäpa callpanta amchun uyculanqui imamá?

¿Janä cuncanćhu ächancunactapis amchun ćhulayculanqui imatá?

20 ¿Amchun paćhcaśhtanu paćhcaycaćhachinquipis imatá?

¿Sumä manchay juryaśhanta amchun pücaycachinqui imamá?

21 Sumä callpanwanmá pampätapis aśhpicuyan;

mana manchacuyculmá pilyuman yalun.

22 Manchacuycätapis mana manchaculmá asipaycunlä canpis;

ispädäpïtapis manamá ayinchu.

23 Sillädacunäpa flïcha apacuncuna shall-shallyaptinpis,

lansanwan,

ispädancuna taclalacyayaptinpis manamá manchaculcanchu.

24 Curnitilla tucämuptinꞌa manañamá jawcañachu;

piñäśhañamá pampäta aśhpishtin jicutäcuyan.

25 Chaynu gïrrapä tucalpamuptin cawallucunaca uyaliyänümi wijijijiapäcun;

gïrraca caśhanta calupïtamá musyapäcun.

26 “¿Amchun wamancunäta päliyta yaćhachilanqui imatá?

¿Amchun sur läduman altu-altucta pälishtin linanpä

yaćhachilanqui imamá?

27 ¿Amchun nilanqui ancacunaca altu-altu aꞌacunäćhu

ishnanta lulapäcunanpä imatá?

28 Paycuna tutapapis muyunpapis aꞌacunäćhümá yaćhapäcun;

ulꞌucunäpa chupquincunaćhümá wasichaculcan.

29 Chaypïmá micunanta chalananpä licapapämun;

calu-calupïmá ñawincuna ćhächipämun.

30 Mallwancunapis yawartam śhuꞌupäcun;

wañüśhacuna caśhancämanmá juntunaculcanpis” nil.