pïchüpïtapis paćhcäluytamá munacuyan.

2 Tayta Diospa sumä-sumä apaliyninta uyaliy;

shiminpïta räyunu yalamuśhanta uyaliyꞌari.

3 Jinantin sïlümanmi räyunu limaynin ćhaycun;

acchinpis jinantin pachämanmi wacliycun.

4 Chaypïta sumä-sumä bululunyaytanümi limayninta uyalinchic;

pay limamuptin räyunu cäcunäpis manamá manalcunchu.

5 Tayta Dios limayninta paćhyachiptinꞌa sumäcunamá pasaycun;

mana mayanpis tantiayta atipanancunactamá pay lulaycun.

6 “Paymi laśhtäta nin:

‘Allpäman palpuy’;

tamyätañatacmi nin:

‘Sumäta tamyaycuy,

lücu tamyawan camacaycuy’ nil.

7 Chaynüpamá lluy nunacunäpa lulayninta śhaycachin,

sumä munayninwan lulaśhanta tantiaycälinanpä.

8 Uywacunäpis maćhaynincunamanmi jiꞌacaycälin;

chayćhümá pacacaycälin.

9 Sur lädupïmá sumä waywaca śhamun;

nurti lädupïñatacmá alalayca licalimun.

10 Tayta Diospa jamalcuyninwanmá asapis licalin,

jatun ućhacunäpis lluy iscarchälun.^a

11 Paymá pucutaycünämanpis yacucta juntaycachin;

chaypïmá räyucunactapis bululanyachimun.

12 Pucutaycunäpis munayninmannümá wicman-cayman lipäcun.

Tayta Dios nishantamá jinantin pachäćhu lulaycapäcun.

13 Chaycunacta ćhaycachimun mućhuycachinanpä

ütac sumä llaquipayninta camalaycachinanpämá.

14 “Cananꞌa tayta Job,

pasinsiawanꞌari uyaliycamay;

Tayta Dios sumä lulaśhancunaman sumäta tantiaycuy.

15 ¿Yaćhanquichun pucutaycäta Tayta Dios

imanuypa camachishantapis imatá?

¿Tantianquichun pucutay lulinpi imanuypa waclichishantapis imamá?

16 ¿Yaćhanquichun janay pachäćhu pucutaycäta sumä yaćhaywan

tantiaywan imanuypa tacyaycachishantapis imatá?

17 Manamá.

¿Sur lädu acachay waywaca allpäta illacachiptin

manachun jina müdanayülla südayanqui imatá?

18 ¿Brunsipi fundïsha ispïjuctanu sïlüta am

maśhtawshïlunquimanchun imatá?^b

19 “Má,

canan yaćhaycälichimayꞌari Tayta Diosman imacta niycälinäpäpis;

yaꞌacuna tutawyayćhünümá ima niytapis nï atipapäcüchu.

20 ¿Tayta Dioswanlä limaycuyta munaśhäta

yaćhaycachïmanchun imatá?

¿Mayanmá camacaycüśha cananpä limaycuyta munanman?

21 Má,

sïlüćhu intïpa sumä acchiyninta,

¿mayanmá licayta atipanman?

Waywaca pucutaycäta pücälul lliwyäluptin,

¿mayanmá licayta atipanman?

22 Chaypïpis mas-mas acchiwanlämari

sumä caynin nurti lädupïta śhayämun.

Tayta Diosmá sumä munayniyu śhayämun.

23 Sumä munayniyücäman manamá tincuycachisha cachwanchu.

Payꞌa tincüninman allin licaycümá;

manamá yanꞌalpi pasalichinchu.

24 Chaymi payta nunacunaca manchaculcan.

Yaćhätucüśha nunacunäta mana cäpämá pay licaycun” nil.