cay ñawïwan mana munapayänäpämá.

2 ¿Tayta Dios janay pachäpi imallactá uycamachwanmá?

¿Sumä Munayniyücäpïta imallá tücaycamachwanmá?

3 ¿Mana allin nunacunätá,

manachun mana allincälla ćhaycun imatá?

¿Juyu nunacunätá,

manachun pasaypi juyucunalla ćhaycun imatá?

4 ¿Manachun yaꞌapa pulishäta Tayta Dios licaycun imamá?

¿Manachun mayćhu yaꞌa pulishätapis yaćhaycun imatá?

5 “¿Casquicuycunactachun ćhapalá imamá?

¿Mayanllactapis ingañacuytachun jicutälá imatá?

6 Má,

allin tupucunawanꞌari Tayta Dios tupuycamächun;

chayćha mana juchayu caśhäta yaćhaycunꞌa.

7 Sïchuśh allincäpi ćhaquí aśhüluptinꞌa

ütac licaśhäwan śhunꞌú apachicüluptinꞌa

ütac jucpa cäninta maquïćhu talïluptinꞌa,

8 talpuśhäcunäta juccunari micucüchun,

talpuśhäcunaca sapipi wicapäśhari cachun.

9 “Sïchuśh mayan walmillawanpis cayta apachicüluptí

ütac malcamasïpa walminwan canäpä täpalayaptiꞌa,

10 walmí jucpa sirbïninꞌari cachun;

juc wayapacunari paywan capäcuchun.

11 Chaynüta luläluptí maynu pinꞌayćha canman cala;

cäraycücäpa mućhuchiśhaćh cäman cala.

12 Sumä nina walayäwan camacaycüśhaćh cäman cala;

lluy cänïcunaćh sapipi camacaycüśha canman cala.

13 “Uyway nunäcuna imacta licaycälinäpä

mañacalcämaptinpis uyaliycümi calá.

14 ¿Imaniltá ćhäśha Tayta Dios ayachimaptin?

¿Imanishätá pay cäraycamaptin?

15 ¿Manachun mamäpa patanćhu licalichimäca paycunactapis licalichila imatá?

¿Manachun yaꞌactapis paycunactapis cawsayta uycamäcälla pay cayan imamá?

16 “Wacchacunäpa mañacuyninta manamá imaypis unꞌayculächu;

japanyäśha walmicunäta manamá jinallacta caćhayculächu.

17 ¿Mana taytayu-mamayücunäta mana uycul

imayllá japallá micucalpulätan ampá?

18 Aśhwanpam tacshalläpïta paycunap taytan cayculá;

iñacha caśhalläpïtam japanyäśhacunäpa caminaycünin cayculá.

19 Mayanpis mana müdanan captin wañuyäta licälulꞌa

ütac wacchaca ćhulacunanpä imanpis mana captinꞌa,

20 uwishnïcunap millwancunawanmi unullacta müdaycachilá;

paycunañatacmi llapan śhunꞌunwan alawaycälimäla.

21 ¿Cäraycücunäwan lisinacuśhá-laycuchun

mana taytayu-mamayücunäman maquïta pallalculá imatá?

22 Chaynu rasunpa mana lulaptiꞌa liclá paquïchun;

muꞌunïcuna yalulcul palpüchunlä.

23 Chayćha mas allin canman Tayta Diospa mućhuchicuyninman ćhaycunäpïtá.

Sumä cä Tayta Diospa ñawpäninćhuꞌa manamá imanaytapis atipämanchu.

24 “¿Ürümanchun chalapacuynïta ćhulayculá imamá?

¿Ürütachun ‘anmanmi chalapacuc’ nilá imatá?^a

25 ¿Cänïcunapïchun cushiculá imamá?

¿Callpäwan talishäcunapïchun alawaculá imatá?

26 ¿Intïpa sumä acchiynin caśhanpïchun ütac quillaca

sumä cayninćhu pulishanpïchun äśhalayllaman camalá imamá?

27 ¿Pacallapapis alawayculächun

ütac calullapïtapis muchayculächun imatá?^b

28 Chaynu mana allinta lulaycuptiꞌa sumä mućhuycachinaćh cäman cala;

sumä Tayta Diosta ipanchayämanćha cala.

29 “¿Ćhïnicüní llaquićhu cayaptin cushiculächun imatá?

¿Mana allinman palpüluptin cushipälächun imamá?^c

30 ‘Mana allinćhu cachun’ niyllapis

shimïwan manamari juchapaculächu.

31 Nunäcunapis nipäculamá:

‘¿Cay wasiman

ćhämücunaca mayanllá manatan maćhayculachu?’

nil.

32 Pulicü nunacunäpä wasí imaypis quićhalayälam;

juc lädu nuna manamá waśhallaćhu puñuyal imaypis wälalachu.

33 “¿Juccuna pacaśhannüchun juchäta yaꞌa pacaculá imamá?

¿Juccuna uywaśhannüchun mana allinnïta śhunꞌulläćhu yaꞌa uywalá imatá?

34 ¿Chaynu mana allin lulaśhancunapi nunacunaca manchacuśhannüchun imaypis wasi lulillaćhu yaꞌa caculá imamá?

¿Ayllücuna jamuyamänanpïchun upällalla yaꞌa caculá imatá?

35 ¡Mayanllá uyaliycamanmantan!

Cay nishäca rasun caśhanta firmäwanmá tacyalpachí.

Cananꞌa Sumä Munayniyücäri niycamächun;

imapis nimänan captinꞌa papilman isquirbiycul licachimächun.

36 Chay nimäśhantamá umrüćhu apaycuśhä;

curunactanümá umäman ćhulaycuśhä.

37 Puydïnüläćha Tayta Diospa ñawpäninman yaycuśhä;

lluy-lluy lulaśhäcunactaćh niycuśhäpis.

38 “Yaꞌapïta ćhacläcunapis manamá janay pachäman quijaculcanchu;

śhucancunapis manamá llaquicuypi waꞌapäcunchu.

39 Sïchuśh mayanpa talpuyninpi dinbaldilla

micüluptiꞌa ütac lulawshïnïcunacta usuchiptiꞌa,

40 ćhacläcunaćhu trïgu wiñamunantá,

caśhacunalla wiñamuchun;

siwä wiñamunantá ulacunalla wiñamuchun” nil.