2 “¿Chaynüćhá pishi callpayücunäta yanapaycunchic aw?

¿Chaynüćhá mana atipäcunäta salbaycunchic aw?

3 ¿Mana tantiayniyücäta imallactá limapayculanquimá?

¿Ima sumä yaćhayllactá camalaycachilanquimá?

4 ¿Mayanmá chaynu yaćhaycunacta uycuśhunqui?

¿Mayanpa yanapayninwantá chaycunacta limapaycunqui?

5 “Allpa lulićhu wañüśhacunäpis chucchupäcunmá;

lamar lulićhu yaćhäcunäpis catcatapäcunmá.

6 Awari,

Tayta Diospá wañücuna caśhancäpis,

manamari pacalanchu.

Paypá luli pachäpis camalayanmá.

7 Paymá imapis mana caśhancäman sïlüta maśhtaycun;

imapis mana caśhancäman cay pachäta walcaycun.

8 Yacuctapis pucutaycämanmá winaycun;

chaynu captinpis yacup llasayninwan pucutayca manamá laćhyanchu.

9 Quillap^a cärantapis pucutaywan

maśhtayculmi tutawyaycachin.

10 Paymá yacucunäpa culindantapis ćhulaycun,

acchïtawan muyuncätapis laquiycun.

11 Pay piñacuptinꞌa sïlup paradïruncunapis

manchacuypïmá chucchupäcun.

12 Paymá munayninwan lamarcäta wicman-cayman wicapacachin.

Yaćhayninwanmá yacućhu cä Rahab nishan sumä manchanaśhcätapis llallïlun.^b

13 Maquinwanmari chay śhullwä culibraycäta camacaycülun;

pücayninwanmari sïlütapis lliwyay-lliwyayta caćhaycülun.

14 Caycunallá parti lulaśhallancunamari cayan;

waqui-waquin uyaliycuśhallanchiccunallamari cayan.

Chayurá ¿sumä-sumä munayninta mayanmá tantiaycunman?”

nil.