2 “Cay nishayquitanuꞌa uyaliycüñamá.

¡Imacá luclu limapäcümá amcuna capäcunqui!

3 ¿¡Yanꞌal limaycunäpa camacaynin

manañachun can imatá!?

¿Imañatá chaynu-chaynüpa niyalcämänayquipä limayalcächishunqui?

4 Yaꞌa pasaśhätanu amcuna pasayalcaptiquiꞌa

yaꞌapis chaynüćha limäman.

Umäta aywicaćhaśhtinläćha allin

limätucuynïwan yaꞌapis limapayalcacman.

5 Chaynu captinpis tuqui shimilläwanćha

yaꞌa callpanchaycälicman;

allin limaynïwanćha cunsuylaycälicman.

6 “Chaynu limaptïpis nanayní manamá jawcayalpunchu;

upälla captïpis manatacmá susyalpunchu.

7 Quiquin Tayta Diosmari pasaypictaña illacalpächiman;

lluy aylluntintamari pichaypa-pichaycäman.

8 Pasaypi utanllantawan tullunllantañam caćhaycäman;

caynu llaquipä caśhäcämi,

cuntrá śhalculcul cäraycayäman.

9 Tayta Dios piñacuyninćhu aticaćhamalmi,

laćhyaypä-pawäman;

cunträmi quiluntapis lawćhićhicyachin.

Ćhïnicünintanümi ñawinwanpis ñaćhaña millpäman.

10 Nunacunaca juntunacuyculmi burlapapäman;

lluypis juntunacuyculmi uyshulächipämänan-laycu,

lapyaypa camacapäman.

11 Mana allin nunacunap maquinmanmi Tayta Dios ćhulaycäman;

juyu nunacunap munayninmanmi jitaycäman.

12 Yaꞌa allin cacuptïmari pay camacaycäman,

cucutïpi chalacuyculmi ticshiy-pawäman,

flïchawan ćhächicamänanpämi ćhulacaycaman.

13 Wicnïpa caynïpam flïcha ćhächïnincuna cunćhacaycäliman.

Mana llaquipayculmi lulunnïpapis pasälächiman,

jayapnïpis pampämanmi llawacacülun.

14 Dañäduy-dañäduyta lulalcamalpis

pilyänülämá yaꞌaman jiꞌacaycayämun.

15 “Llaquicuypïtam aychämanpis awituctaña jilacülú.

Umätapis pulbümanñam śhatïlú.

16 Ancha waꞌaśhäpïtam cäräpis manaña cärachu;

ñawïpis manca ñawïshañamá cayan.

17 Chaynümi pasayá ima juyu lulayta mana lulayalpis,

chuya śhunꞌulläwan mañacuyalpis.

18 “Allpa,

cay yawarlläta amari pampaycuychu;

mañacuylläta amari pacaycuychu.

19 Sïlüćhümari licäní cayan;

janay pachäćhümi śhalcüní cayan.

20 Waꞌacuynïwan aśhuycuptïmi,

apanacuśhäcäní Tayta Diosman limalcapaman.

21 Maynümi nunaca shimip-shimip chalanaculcan,

chaynümi apanacushäca Tayta Diospa puntanćhu shimip-shimip limalcapaman.

22 Juc ishcay watallañamari cacuyan;

chaypïta manaña cutimümi pasaypipä licuśhä.