Mardoqueoctam altuman juluycun
6
Chay tuta mandacü Asuero puñuyta mana atipalmi,
mandacuyninćhu cawsaynincuna isquirbïsha cä libructa apachimula,
ñawpäninćhu lïgipänanpä.
2 Chaynu lïgiyalmi talïlun puncu täpänin capäśha Bigtanwan Teres nunancuna mandacü Asuerocta wañuchinanpä limanaculcäśhanta Mardoqueo willaśhanta.a
3 Chayćhümi mandacüca nin:
“¿Caynu lulaycuśhanpi Mardoqueoman imactam uycuśha cala ütac ćhulaycuśha cala?”
nil.
Niptinmi:
“Manam imallactapis uycuśhachu cala” nipäcun.
4 Niyalcaptinmi ilucta lulachishanman Mardoqueocta walcachinanpä mandacücäta mañacü Aman śhamul,
palasyup waśha lädu patyunćhu cayäla.
Chayćhümi mandacüca nin:
“¿Patyućhu mayanmi puliyan?”
nil.
5 Niptinmi sirbïnincuna:
“Amanmi” nipäcula.
Niptinmi mandacüca:
“Pasaycamuchun” nin.
6 Chayćhu Aman pasaycüluptinmi mandacüca nin:
“Má,
¿altuman juluycuyta munaśhan nunawan mandacüca imactam lulaycunman?”
nil.
Niptinmi Aman śhunꞌullanćhu nicuyan:
“¿Yaꞌapïta mastá,
mayantamá altuman juluycunman?”
nil.
7 Chaymi mandacücäta Aman nin:
“Altuman juluycuyta munaśhayqui nunäpä,
8 apachimunquiman ćhulacuśhayqui müdanactamá,
jinaman sillacuśhayqui cawalluctapis,
umanman ćhulachinayquipäpis mandacüpa curunantamá.
9 Chay müdanactawan cawallucta mas puydï yanapäniquiman uycuśha cachun,
altuman juluycuyta munaśhayqui nunacta müdachinanpä,
jinaman cawallumanpis sillalcachil malcap läsanpa puśhaśha cachun:
‘Mandacüca altuman juluycuyta munaśhan nunacta caynümi lulaycun’ ” nishtin.
10 Niptinmi mandacüca nin:
“Chayurá cay nishayquinülla canan-pacha müdanacta,
cawallucta apaculcul palasyup puncunćhu täcu Israel lädu Mardoqueowan lulaycamuy.
Nishayquicunacta jucllayllactapis mana unꞌaycullal lluyta lulaycamuy” nil.
11 Niptinmi Aman chay müdanactawan cawallucta alistalcul Mardoqueocta müdächin,
cawallumanpis sillalcachil jinantin läsap muyuchimula:
“Mandacüca altuman juluycuyta munaśhan nunacta caynümi lulaycun” nishtin.
12 Chaypïtam palasyup puncunman Mardoqueo caśhan cuticula.
Amanñatacmi ichá llaquisha,
pinꞌacuypi uyshucuśha-ima,
mana-mana wasinta pasacun.
13 Ćhayculñatacmi lluy ima pasaśhantapis walmin Zerestawan lluy apanacuśhancunacta willaycula.
Chaymi paycuna nipäcun:
“Mardoqueo Israel lädu cayaptinꞌa manamá llalliyta atipanquimanchu.
Pirdiyta allaycuyaptiquiñá aśhwanpa quiquiquitamá wañüchishunqui” nil.
14 Chaynu limayalcällaptinlämi mandacücäpa capäśha nunancuna licalilcälimul Amanta mana-mana puśhaculcan Ester lulaśhan cumbiduman.