Nehemiasmi allincäman lluy cutiycachin
13
Chay timpum lluypa ñawquin Moises isquirbishan camachicuyta lïgila.
Chayćhümi talïlälin:
“Amon,
Moab läducunaca manam imaypis Tayta Diospa malcanwan jucllaćhu capäcunmanchu” nïta.
2 Chaynu nila unay timpu Israel läducunäta ima micuyllactapis yacullactapis mana uycälishanpïmi.
Jinaman mana allin capäcunanpä Balaamta mincacuśhanpïmari.a
Ñatac má,
mana allincäta Tayta Diosninchicꞌa allinmanmi muyuycachila.b
3 Chaynu camachicuy nishanta uyalïlälilmi juc caśhtacunäta Israel läducunäpïta lluy japächapäcula.
4 Chay manalä pasaptinmi Tayta Diospa alawana wasićhu ima cäcunätapis licä sasirdüti Eliasib aylluchacüśha Tobiaswan capäcula.
5 Chaymi jatun cuartucta payman uycula.c
Chay cuartum uycunacunacta,
insinsiucunacta,
sirbichicunapä cäcunacta,
ćhuncapi jucta-cama trïgu ćhulanacunacta,
bïnucunacta,
asayticunacta ćhulanapä cuartu cala.
Chaycuna levitacunäman,
taquïcunäman,
puncu täpäcunäman,
jinaman sasirdüticunäman uycunanpämi cala.
6 Má,
chaycuna pasaptin Jerusalenćhüchu manam yaꞌa cayälá.
Aśhwanpa Babiloniap mandacünin Artajerjes quimsa ćhunca ishcayniyu (32) wata mandacuyaptinmi Babiloniaman caśhan cutilá.
Chaypi unaytam Jerusalenman cutimunäpä mandacücäta mañaculá.
7 Chaypi ćhaycamulmi talïlú Tayta Diospa alawana wasinpa jucnin cuartunta Tobiasman Eliasib uycuśhanwan mana allin lulaśhanta.
8 Chaymi sumä piñacülul Tobiaspa lluy ima cänincunactapis waśhaman wicapämulá.
9 Jinalculmi chay cuartucta chuyanchalcul Tayta Diospa alawana wasinćhu sirbichicunapä cäcunäta,
uycuśhancunäta,
insinsiucunäta cutiycachinanpä nilá.
10 Chaynütacmi levitacunämanpis tücänincunacta mana upäcuśhanta yaćhälú.d
Chay laycumari alawana wasićhu sirbï levitacunäwan taquïcunaca allpancunaman-cama cuticulcäña.
11 Chaymi chay puydïcunäta anyälá:
“¿Imapïmi Tayta Diospa alawana wasin caynu pasaypi jitäśha cayan?”
nil.
Nilculmi sasirdüticunätawan levitacunäta lulayninman-cama caśhan cutiycachilá.
12 Jinaptinmi jinantin Judacuna juntunacuna cuartuman apapämula ćhuncapi jucta-cama trïgucunäpi,
bïnucunäpi,
asayticunäpïpis.e
13 Chaycunacta cuartućhu licaycunanpäñatacmi ćhulayculá:
sasirdüti Selemiasta,
isquirbï Sadocta,
levitacunäpïñatac Pedaiasta.
Paycunacta yanapänanpäñatacmi ćhulayculá Mataniaspa willcan Zacurpa chulin Hananta.
Lluy paycuna chalapacunamari capäcula.
Chaymi paycunaña lulä-masincunaman aypücunaca capäcula.
14 Jinalculmi Tayta Diosta nilá:
“Tayta Diosllay,
cay lulaycuśhäcunacta licaycuy;
ampäwan alawana wasiquipä allincäta lulaycuśhäta amari unꞌaycuychu” nil.
15 Chay timputacmi Juda lädućhu waquincuna jamana muyunćhu übacunacta apchipäcuña,
maqui-maqui watäśha trïgucunacta aśhtapäcuña;
aśhnuncunawantacmi bïnucunacta,
übacunacta,
ïguscunacta,
jinaman imaymana cargacunacta Jerusalenmanf apapäcuña.
Chaynu jamana muyunćhu lanticulcäśhanpïmari anyälá.
16 Chaynütacmi Jerusalenćhu yaćhä Tiro malcayücunäpis Israel läducunäta lanticulcänanpä jamana muyunćhu apapämuñälä canpis challwacunactawan imaymanacunacta.
17 Chaymi Judapa puydïnincunacta anyälá:
“¿¡Jamana muyunta jalutacuśhayquiwan ‘allintam lulayá’ niyalcanquichun imatá!?
18 ¿Manachun awquillunchiccunapis chaynu lulapäcuśhanpïta Tayta Diosninchic yaꞌanchictawan cay malcacta mućhuycachimälanchic imamá?
¿Jamana muyuncäta jalutacuyniquiwan Tayta Diosta mastalächun piñachiyta munayanqui imamá?”
nil.
19 Nilculmi birnis tardi inti jiꞌacalpuśhanpïta Jerusalen malcap puncuncunacta wićhaycälil chay walantin tardicama mana quićhapäcunanpä nilá.
Jinaman waquinnin nunäcunactam puncucunaman ćhulalá ima lanticütapis jamana muyunćhu mana yaycachimunanpä.
20 Chaynu niptïpis waquin lantïcuna,
lanticücunapis juc ishcay cuti Jerusalenman mana yayculmi waśhallaćhu wäläläliña.
21 Chaymi paycunacta nilá:
“¿Imanuypatá murällap ipanćhu aylliyalcanquiman?
Caśhan chaynu aylliyalcaptiquiꞌa carsilmanmi wićhälächishayqui” nil.
Chay nishä-pachapïmi jamana muyunćhuꞌa manaña imaypis licalipämulañachu.
22 Chaypi levitacunätañatacmi chuyanchaculcänanpä jinaman puncucunacta täpapäcamunanpä nilá.
Chaynüpa jamana muyunca mana jalutacüśha cananpämari.
Chaypïtam Tayta Diosta nilá:
“Tayta Diosllay,
cay lulaycuśhätapis amari unꞌaycullaychu;
sumä cuyacuyniyu caśhayquimannu llaquipaycallämay” nil.
23 Chay timpućhütacmi licälú waquin Juda nunacunaca Asdod,
Amon,
Moab lädu wamlacunawan casaracälälisha caśhanta.
24 Chaymi parti chulincuna Asdod malcap limaynintawan juc malcacunap limaynintaña limapäcula.
Israel läducunäpa limaynintañatacmi ichá manaña limapäcuñächu.
25 Chaymi paycunawan palanacalcälil pasaypi mana allin capäcunanpä nilá,
waquintañatacmi asutilá,
ächancunactapis chutälämi.
Jinalculmi munäta mana munätapis Tayta Diosman limalicachilá,
walaśh-wamla chulincunacta paycunap chulincunawan mana cuscachinanpä,
nïtac quiquincunapis cuscapäcunanpä.g
26 Canan paycunactam nilá:
“¿Manachun Israel lädup mandacünin Salomonpapis chay juchan cala?
Paynuꞌa Tayta Diospa cuyaśhan mandacü may nasyunćhüpis manamá calachu.h
Chaymari jinantin Israel lädup mandacüninpä ćhulaycuśha cala.
Chaynu cayaptinpis juc caśhta walmicunämari juchaman palpächila.i
27 Chayurá ¿¡amcunapis juc caśhta walmicunawan casaracälälil Tayta Diosta jalutaculcäśhayquipi limapäcuśhunayquitachun munayalcanqui imatá!?”
nil.
28 Aśhta puydï sasirdüti Eliasibpa willcan,
Joiadapa chulinpis Horon lädu Sanbalatpaj wamla chulinwanmi casaracüña.
Chaymi ñawpänïpïta alapacülá.
29 Chaypïtam nilá:
“Tayta Diosllay,
mana unꞌaycul yalpalayꞌari sasirdüticunaca levitacunaca limaliculcäśhanta mana cäman ćhulapäcuśhanpïta” nil.
30 Chaymi sasirdüticunäta levitacunäta juc caśhtacunäpïta chuyanchaycul lulayninman-cama caśhan ćhulayculá.
31 Chaynütac unanchäśha muyuncunällaćhu yamta apamücunäpis,
wamä cusichanta apamücunäpis apapämunanpä nilá.
¡Tayta Diosllay,
mana unꞌaycullalꞌari yanapaycallämay!