Israel lädup juchancunapïtam Esdras mañacun
9
Chay anćhish quillallap ishcay ćhunca tawayu (24) muyuncäćhümi lluy Israel läducunaca juntunacälälil ayunapäcula shicacü müdanawan ćhulacälälisha,
umanmanpis allpacunacta mächicälälisha.
2 Chayćhu juc lädu caśhtacunäpïtaa japächaculculmi śhäcuyalcal:
“Yaꞌacunapis unay awilücunapis juchasapam capäcullá” nipäcula.
3 Chaynu śhäcuyalcaptinmi lluypa puntanćhu Tayta Diosninpa camachicuynin isquirbïsha caśhancäta quimsa üra lïgila.
Chaypi quimsa üratacmi imapis mana allin lulaśhancunacta willapaculcul Tayta Diosta alawapäcula.
4 Chaypïta levita Jesua,
Bani,
Cadmiel,
Sebanias,
Buni,
Serebias,
Bani,
Quenanipis patacman ishpilcälilmi callpa-callpawan Tayta Diosta mañaculcäla.
5 Chaynütacmi levita Jesua,
Cadmiel,
Bani,
Hasabnias,
Serebias,
Hodias,
Sebanias,
Petaiaspis caynu nipäcula:
“Śhalcapäcuy unaypïpis imaycamapis cä Tayta Diosninchicta alawanapä” nil.
Caynu nipäcula:
“Taytallay,
śhutiquiꞌa sumä-sumämá;
śhutiquipïtá imallamá altuman juluycuypis,
allinpä licaycuypis,
lluy imapis.
6 “Amllamá Tayta Dios canqui.b
Anmi lulalanqui janay pachäta lluy sïluntinta,
cay allpätapis lluy cänintinta,
lamarcunätapis lluy cänintinta.
Lluy ima cäcunätapis anmari cawsayta uyculanqui.
Janay pachäćhu lluy cäcunäpis alawapäcuśhunquimá.
7 “Anmi Tayta Diosllay,
Abramta aclalanqui.
Anmi,
Caldeo lädu Ur malcapic julalcamul
śhutintapis Abrahamta ćhulayculanqui.d
8 Pay,
chalapacü śhunꞌuyu caśhantamari licayculanqui.
Chaymi payman limaliculanqui milaynintinpa
Canaan,
Het,
Amhor,
Ferez,
Jebus,
Gerges
nunacunäpa allpancunacta uycunayquipä.
Amꞌa,
tincüninman licaycü calmari,
cay limalicuśhayquita lliw lulayculanqui.e
9 “Egiptoćhu awquillücuna imanuy ñacapäcuśhantapis licayculanquimá;f
Puca Lamar patanćhu ruygaculcäśhantapis uyaliyculanquimari.g
10 Egiptocunaca nunatucuyninwan malcayquita
ima lulaśhantapis licalmi Faraoncäman
yanapänincunaman,
jinantin malcanmanh
äśhalayllaman camanacuna jatun milagrucunacta cuntran ćhächilanqui.
Chaynüpam canancamapis lisisha-lisisha canqui.
11 Paycunap ñawquin lamarcätapis wicman cayman
laquiycuptiquimari chaqui caminullapña pasapämula.
Wañuchinanpä atimünincunactañatacmi ichá lumicta
wicapäcänu lamarpa luli-lulinmanlä wicapalpülanqui.i
12 Jinalculmi malcayquita wichayman
suytunpäśha pucutaywan muyunpa puśhalanqui,
tutanpañatac acchiptin mayninpa lipäcunanpäpis
wichayman suytunpäśha nina waläyäwan puśhalanqui.j
13 “Sinai ulꞌumanmi jiꞌalpamulanqui;
janay pachäpïmi limapämulanqui.
Allin yaćhachicuytam,
rasun camachicuytam,
sumä nishayquitawan willacuycunactam uyculanqui.
14 Jamana muyuncäta japächaycälinanpäpis yaćhaycachilanquim.
Nunayqui Moisespamari yaćhachicuyniquita,
nishayquita,
camachicuyniquita uyculanqui.k
15 “Micuypi capäcuptinpis janay pacha tantactam uyculanqui.l
Yacunaptinpis aꞌacäpi yacucta juluyculmi uyculanqui.m
Jinalculmi chay malcaman yaycapäcunanpä
maquiquita chacchalcul limaliculanqui.n
16 “Ñatac awquillücunawan paycuna pasaypi nunatucü-cama,
tullu uma-cama capäculmi yaćhachicuyniquita nï uyaliculcälachu.
17 Sumä milagrucunacta paycunapä lulaśhayquitapis
unꞌaycälilmari nï cäsuculcäśhulanquipischu.
Pasaypi tullu uma capäculmi puydïninta ćhulälälin
uyway nuna capäcunanpä,
Egiptoman caśhan cutichinanpä.o
Am Tayta Diosñatacmari ichá pampachaycü,
allin śhunꞌuyu,
llaquipayniyu,
sasacta piñacü,
jatun cuyacuyniyu cal mana caćhayculanquichu.p
18 “Masqui fundïsha jïrrupi wäca taytachanta lulacalcälil:
‘Egiptopi julamäninchic diosninchic caymi’ niyalcaptinpis,q
masqui maynüpa jalutacuyalcäśhuptiquipis,
19 sumä llaquipayniyu calmi
chunyäcäćhu nï caćhayculanquichu.
Muyunpa caminaycunanpä suytunpäśha
pucutayca paycunacta manamari caćhayculachu.
Tutapapis suytunpäśha ninaca manatacmi caćhayculachu,
maypa lipäcuśhantapis acchiycunanpä.
20 “Allin Ispirituyquiwantacmi paycunacta tantiaycachilanqui.
Micapäcunanpäpis Manárs nishan micuyta
manam pishiycachilanquichu;
yacunaptinpis yacucta uyculanquimá.
21 Chunyäcäćhu tawa ćhunca (40) watamari micuyta uyculanqui.
Manamá imallanpis pishiycapäculachu.
Müdananpis manamá mawcacälilachu;
ćhaquincunapis manatacmá puśhllulachu nï nanapacuyllapis nanapaculapischu.
22 “Nasyuncunactawan malcacunacta maquinman
ćhulayculmi ayllunpa-cama lluy-lluy allpacunäta tücaycachilanqui.
Chaymari paycuna yaycapäcula aśhta mandacü Sehon
mandaśhan Hesbon allpaman;
Og mandaśhan Basan allpancamapis.t
23 Janay pachäćhu uyllurcunänu
achca-achcactamari chulincunactapis uyculanqui.u
Awquilluncunaman limalicuśhayqui
allpamanmi puśhayculanqui.v
24 Chaymi milaynincuna yaycaycälil duyñuchacaycälila.
Chay Canaan lädućhu yaćhäcunätam
paycunaman uyshuycachilanqui.
Mandacünincunactawan lluy nunancunacta paycunap
maquinmanmari ćhulayculanqui,
munaśhanta imactapis lulapäcunanpä.w
25 Chaynütacmi duyñuchacaycälila sumä murälläśha
malcacunacta,
allinnin allpacunacta,
lluy ima cäniyu
wasicunacta,
quićhäśha püsucunacta,
üba ulïbus ćhaclacunacta,
imaymana micunapä wayuyniyu lantacunactapis.
Chaymari maćhaycunancama micapäcul wirayälälilapis.
Chaynu sumä llaquipayniquipïmari cushisha capäcula.x
26 “Ñatac mana cäsucü-cama capäculmi cuntrayqui
śhalcapäcula,
camachicuyniquitapis ipanchapäcula,
anman cuticalcämunanpä anyapaycü
willacüniquicunactapis wañülächila.
Chaynu lulapäcuśhanwanmari
ancha-anchap piñachil jalutaculcäśhulanqui.
27 Chaymi ćhïnicünincunap maquinman
ćhulaycülanqui ñacachipäcunanpä.
Chayćhu ñacayalcalñatacmi yanapänayquipä
ruygacalcämuptin amñatac janay pachäpïta uyaliyculanqui.
Jinalmi ćhïnicünincunap maquinpïta
libraycunayquipä sumä llaquipayniyu cal
nunayquicunacta libraycälinanpä caćhayculanqui.
28 Ñatac libraycuśhaña jawca cayalcalꞌa
caśhanñatacmi cuntrayqui mana allinta lulapäcula.
Chaymi ćhïnicünincunap maquinman
jitaycülanqui munaśhanta lulapäcunanpä.
Chay ñacaycäćhu cayalcalñatacmi yapa
ruygaculcäśhuptiqui janay pachäpïta uyaliyculanqui.
Jatu-jatun llaquipayniyu calmari yapalcul-yapalcul librayculanqui.y
29 Yaćhachicuyniquita cäsuculcänanpäpis anyapayculanquimá.
Ñatac paycuná yaćhätuculmi
yaćhachicuyniquita mana uyalïtuculcälachu.z
Aśhwanpa ‘cäsucücunäta cawsayta uycü’ nishayqui
camachicuyniquitamari jalutaculcäla.
Uta linli,
tullu uma capäculmá
mana uyaliculcälachu.
30 “Amꞌa achca watam awantayculanqui.
Willacüniquicunawanmi Ispirituyquipacama
anyapayculanquipis.
Ñatac paycuná manam uyalïtuculcälachu.a
Chaymi läduyquićhu cä
nasyuncunap maquinmanña jitaycülanqui.
31 Ñatac jatu-jatun llaquipayniyu calmi nï
camacaycülanquichu,
nï pasaypi unꞌälanquipischu.
Allin śhunꞌuyu,
llaquipayniyu Tayta Diosmari am canqui.
32 “Canan má,
Tayta Diosllay,
am canqui sumä munayniyümi,
lluypa manchayninmi,
limalicuśhayquitapis
lulaycümi,
imaypis cuyacümi.
Chayurá Asiriapb unay mandacünincuna timpupi canancama
mandacünïcuna,
puydïnïcuna,
sasirdütïcuna,
willacünïcuna,
taytäcuna,
jinaman lluy nunacunaca
ñacapäcuśhäta amari ashllapa licaycuychu.
33 Ñatac cay pasapämäśhancunaćhu
amꞌa tincüninmanmari lulayculanqui.
Amꞌa allintamá lulayculanqui;
yaꞌacunam ichá mana allincunacta lulaycapäculá.
34 Mandacünïcuna,
puydïnïcuna,
sasirdütïcuna,
taytäcuna camachicuyniquitapis,
anyapäśhayquicunactapis manamá
cäsuculcälachu,
uyaliculcälachu.
35 Aśhwanpa paycuna mandacuyninćhu
cayalcaptin achca ima cänincunacta
uycuptiquipis,
allinnin tuqui allpacta
uycuptiquipis manamari sirbipäcuśhulanquichu,
nïtac mana allin lulaynincunactapis
caćhaycapäculachu.
36 “Chaymi canan uyway nuna cayalcá.
Awquillücunaman tuquinnin allpap wayuynincunacta
micapäcunanpä uycuśhayqui malcaćhümari uywayña cayalcá.
37 Juchäcunapïmi mandacücunap
maquinman ćhulaycälälimälanqui.
Paycunapäñamari allinnin allpacunäpa wayuynincunapis.
Maquinćhu cayalcaptïmi munaśhanta imactapis
yaꞌacunawan uywäcunawanpis lulapäcun.
Maynu sumä llaquićhümi cayalcá” nil.
Camachicuyta cäsuculcänanpämi malcaca limaliculcan
38 Chaymi chaycunacta lluy yalpapäcul yaꞌacuna papilman isquirbiycul ćhuncay-ćhuncay limaliculcá.
Chaynu limaliculcäśhätam puydïnïcunapis,
levitacunäpis,
sasirdüticunäpis papilćhu firmaycälin.