Jerusalenman Esdraswan cutimücunaca
8
Canan má,
Artajerjespa mandacuyninćhu cayaptin yaꞌa Esdraswan Babilonia lädupi cutimücunaca ayllunpi-cama puydïnincuna caycunam:
2 Finees ayllupïtam Gerson;
Itamar ayllupïtañatacmi Daniel;
David ayllupïtañatacmi Hatus.
3 Hatusꞌa Secaniaspa chulinmi cala.
Paros ayllucunapïñatacmi Zacarias cala.
Paycunawan cuscatacmi paćhac picha ćhunca (150) wayapacuna listaćhu capäcula.
4 Chaynütacmi Pahat-moab ayllupïtañatac Zeraiaspa chulin Elioenai;
paywanmi ishcay paćhac (200) wayapacuna capäcula.
5 Secanias ayllupïtañatacmi Jahazielpa chulin;
paywanmi quimsa paćhac (300) wayapacuna capäcula.
6 Adin ayllupïñatacmi Jonatanpa chulin Ebed;
paywanmi picha ćhunca (50) wayapacuna capäcula.
7 Elam ayllupïtañatacmi Ataliaspa chulin Jesaias;
paywanmi anćhish ćhunca (70) wayapacuna capäcula.
8 Sefatias ayllupïtañatacmi Micaelpa chulin Zebadias;
paywanmi pusä ćhunca (80) wayapacuna capäcula.
9 Joab ayllupïtañatacmi Jehielpa chulin Obadias;
paywanmi ishcay paćhac ćhunca pusäniyu (218) wayapacuna capäcula.
10 Selomit ayllupïñatacmi Josifiaspa chulin;
paywanmi paćhac süta ćhunca (160) wayapacuna capäcula.
11 Bebai ayllupïñatacmi Bebaipa chulin Zacarias;
paywanmi ishcay ćhunca pusäniyu (28) wayapacuna capäcula.
12 Azgad ayllupïñatacmi Hacatanpa chulin Johanan;
paywanmi paćhac ćhunca (110) wayapacuna capäcula.
13 Adonicam ayllupïñatacmi lluypïpis ipacta cutipämü Elifelet,
Jeiel,
Semaiaspis capäcula;
paycunawanmi süta ćhunca (60) wayapacuna capäcula.
14 Bigvai ayllupïñatacmi Utaiwan Zabud;
paycunawanmi anćhish ćhunca (70) wayapacuna capäcula.
Alawana wasićhu sirbïcunaca
15 Paycunacta yaꞌa Esdrasmi Ahava mayu patanman juntuycachil chayćhu quimsa muyun capäculá.
Chayćhu lluy nunacunäta sasirdüticunäta fintachiptí jucllay levitallapis manam cañächu.
16 Chaymi malcap puydïnin Eliezerta,
Arielta,
Semaiasta,
Elnatanta,
Jaribta,
Elnatanta,
Natanta,
Zacariasta,
Mesulamta jinaman yaćhayniyu Joiaribtawan Elnatantapis ayachimulá levitacunacta puśhamunanpä.
17 Paycunactam yaćhaycachilá:
“Casifia malcap puydïnin Iddoman lulawshï-masin levitacunämanpis lilcälilmi nipäcunqui:
‘Tayta Diosninchicpa alawana wasinpa sirbïnincunacta caćhamullay’ ” nil.
18 Chaymi Tayta Dios yaꞌacunawan cayaptin caćhamumäla Israel lädu Levi ayllu Mahlipa chulin sumä yaćhayniyu Serebiasta.
Paywanmi chulincuna,
wawꞌi-caśhancuna ćhunca pusäniyu (18) lluy śhapämula.
19 Merari ayllupïñatacmi Hasabiastawan Jesaiasta caćhamula.
Paywanmi chulincuna wawꞌi-caśhancuna ishcay ćhunca (20) śhapämula.
20 Jinaman alawana wasićhu Davidpa ćhulaśha cä sirbïcunäpïtapis ishcay paćhac ishcay ćhunca (220) sirbï nunacunactam caćhamula.
Paycunap awquilluncunactam camachicücuna ćhulala levitacunäta yanapänanpä.
Paycunam śhutinpa-cama listaman ćhulaśha cala.
21 Chay Ahava mayup patanćhu cayalcalmari Tayta Diospa ñawpäninćhu uyshucaycälil ayunapäcunäpä nilá.
Chayćhu mañaculcälá yaꞌacunacta,
ayllücunacta lluy ima cänintinta allinllacta ćhächipämänanpämi.
22 Mandacücäta nilämari:
“Tayta Diosní ashïnincunacta yanapaycunmi.
Ipanchänincunamanñatacmi ichá sumä piñacuyninta caćhalpaycamun” nil.
Chaynu niyalmi ćhïnicunïcunapïta caminućhu licaycälimänanpä,
mandacücäta pinꞌacuypi sillädancunacta manaña mañaculcälächu.
23 Chaymi ayunal Tayta Diosnïta mañaculcaptí pay uyaliycälimäla.
24 Chaypïta ćhunca ishcayniyu (12) puydï sasirdüticunactam japächayculá:
Serebiasta,
Hasabiasta,
ćhunca sasirdüti-masincunactawan.
25 Paycunamanmi mandacüca,
yanapänincuna,
puydïnincuna jinaman chayćhu cä lluy Israel läducunaca Tayta Diosnïpa alawana wasinpä uycapäcuśhan üructa,
illayta,
sirbichicunapä cäcunätapis tupuycul uyculá.
26 Chaynu uyculá ishcay ćhunca jucniyu walanga tawa paćhac picha ćhunca (21,450) quïlu illayta,
illaypi cä sirbichicü cäcunactañatac quimsa walanga quimsa paćhacta (3,300),
quimsa walanga quimsa paćhac (3,300) quïlu üructa,
27 jinaman ürupi ishcay ćhunca (20) täsa pusä quïlu llasä-camacta,
brunsipi ishcay bäsuctapis üru-yupay chipipicyayalcätam uyculá.
28 Chaypïtam niyculá:
“Amcunapis cay sirbichicunapä lluy cäcunäpis Tayta Diosllapämi japächäśha chuya cayalcanqui.
Llapan śhunꞌunwan üructa,
illayta uycapäcuśhancunaca awquillunchicpa Tayta Diosninpämari cayan.
29 Caycunacta sumätamá licaycälinqui aśhta Jerusalenćhu Tayta Diospa alawana wasiman ćhäpäcunayquicama.
Ćhaycul chay sasirdüticunäpa levitacunäpa puydïnincunap,
Israel läducunäpa puydïnincunap ñawquinćhümari tupuycälinqui” nil.
30 Chayćhümi sasirdüticunäwan levitacunaca tupuycuśha cä illaycunäta,
ürucunäta,
sirbichicunapä cäcunätapis ćhasquiycälila,
Jerusalenćhu cä Tayta Diosninchicpa alawana wasinman apapäcunanpä.
31 Chayurá wamä quillap ćhunca ishcayniyu (12) muyunninćhümi Ahava mayupïta yaluculcälá Jerusalenman.
Tayta Diosninchicñatacmi ñawillanćhu caycachil ćhïnicücunapïpis,
juyu nunacunäpïpis libraycälimäla.
32 Jerusalenman ćhälälilñatacmi quimsa muyun chayćhu jamapapäculá.
33 Tawa muyuncäćhüñatacmi ürucunäta,
illaycunäta,
sirbichicunapä cäcunätapis Tayta Diosninchicpa alawana wasinćhu tupuycapäculá.
Jinalculmi sasirdüti Uriaspa chulin Meremotman uycapäculá.
Paywanmi cayalcäla Fineespa chulin Eleazar,
levita Jesuap chulin Jozabad,
Binuip chulin Noadiaspis.
34 Chay muyunmi lluyta fintaycul,
tupuycul ayca caśhanpis isquirbisha cala.
35 Chaypïta prïsu caśhanpi cutimücunämi Israelpa Tayta Diosninman cañaywan uycälila lluy Israel läducunäpïta:
ćhunca ishcayniyu (12) wäcacunacta,
isun ćhunca sütayu (96) carnicunacta,
anćhish ćhunca anćhishniyu (77) uwishcunacta,
juchanpïñatac ćhunca ishcayniyu (12) ulu capishcunactapis.
Lluy caycunactamari Tayta Diosman cañaywan uycapäcula.
36 Chaypïtam mandacüca camachishancunacta malcap puydïnincunaman,
Eufrates mayup chimpa lädu puydïnincunamanpis niycula.
Chaymi paycuna Israel läducunäta Tayta Diospa alawana wasinta lulayta yanapapäcula.