Juda lädućhu Acazmi mandacun
28
Canan má,
Acaz ishcay ćhunca (20) watanta liyalmi mandacuyta allaycula.
Paymi ćhunca sütayu (16) wata Jerusalenpïta mandacula.
Ñatac Tayta Diospa puntanćhu awquillun Davidnüchu manamá allincunäta lulaycula.
2 Aśhwanpa Israel lädup mandänincunap mana allin lulaynincunactamari atichila.
Jinalmi jïrrucunacta fundiycachil taytacha Baalcunap liträtuncunacta lulachila.
3 Jinalculmi Hinom pampaćhu insinsiuctapis cañaycapula;
aśhta chulincunactapis taytachamanmi cañaycachipäcula.
Chaynu lulapäcula Israelpa ñawpäninpïta Tayta Dios alapacuśhan malcacunap millachicuy lulaynincunacta atichïninwanmari.
4 Chaynütacmi ulꞌucunäćhu cä uycunacunäćhu,
ulꞌunpalcücunäćhu,
pallaysapa sumä lantacunäpa lulïnincunaćhüpis uycapäcula,
insinsiucunactapis cañaycapäcula.
5 Chaynu lulapäcuśhanpïmi Siriap mandacüninpä maquinman Tayta Diosnin ćhulaycüla.
Jinaptinmi Siria nunacunaca llallilcul Damascuman achca-achcacta prïsu puśhacula.
Jinaman Israelpa mandacüninpa maquinman Acazta ćhulaycuptinmi,
llaqui-llaquicta camacaycüla.
6 Awquilluncunap Tayta Diosninta caćhaycäläliptinmari juc muyunllaćhu Remaliaspa chulin Peka,
Juda lädućhu wañüchila paćhac ishcay ćhunca walanga (120,000) allica-ama nunacunacta.a
7 Chaynütacmi Efrain ayllupi cä allin pilyä Zicri wañüchin:
Juda lädu mandacücäpa chulin Maasiasta,
palasyućhu puydï yanapä Azricamta,
mandacücäpa atimünin puydï Elcanactapis.
8 Jinaman Israel läducunaca ishcay paćhac walanga (200,000) Juda lädu nunacunactam Samariaman prïsu puśhacula:
walmicunacta,
walaśhcunacta,
wamlacunactapis.
Chaynütacmi lluy ima cänincunactapis achca-achcacta Samariaman apaculcäla.
9 Chaynu israelcunaca Samariaman yaycuyalcaptinmi,
Tayta Diospa willacünin Obed yalalcamul nin:
“Awquilluyquicunap Tayta Diosnin Juda lädupa piñacülulmari maquiquiman ćhulaycamula.
Ñatac amcuna juyu-juyupa wañuchipäcuśhayquica,
Tayta Dios caśhancämanlämá ćhälun.
10 Jinaman Juda lädućhu Jerusalenćhu cä nunacunäta uywayniquiman muyuchiytalämi munayanquipis.
Chaywan ¿manachun Tayta Diosniquip cuntran juchacta lulayanqui imamá?
11 Tayta Diosmari amcunawan sumä piñäśha cayan.
Chayurá prïsu puśhapämuśhayquicunacta caćhaycapäcuyñari.
¿Manachun wawꞌi-caśhayquicuna imatá?”
nil.
12 Niptinmi Israelpab milaynincunapïta waquin puydïnincuna pilyupi cutimücunäpä cuntran śhalcälälin.
Paycunam capäcula:
Johananpa chulin Azarias,
Mesilemotpa chulin Berequias,
Salumpa chulin Ezequias,
Hadlaipa chulin Amasapis.
13 Paycunamari nipäcula:
“Chay prïsucunäta cayman ama puśhapämuychu.
Chaywanꞌa juchacta mana allinninchictam masta ashicuyanchic;
icha ¿mana allinninchictachun masta tawayta munayanqui imamá?
Mana allin lulayninchic ancha-anchap cayaptinmari israelcunäpa cuntran Tayta Diospa piñacuynin śhanśha-yupayña walayan” nil.
14 Nipäcuptinmi prïsu puśhapämuśhancunacta caćhaycälälin;
ima cänincunacta apapämuśhantapis puydïcunäpa jinantin malcap ñawpäninmanmi ćhulaycapäcula.
15 Chayćhümi Efrain ayllup puydïnincunaca prïsucunäta yanapaycapäcula:
mana müdanayücunäta müdachipäcula,
śhucuyyachipäcula,
micuytapis yacuctapis uycapäcula,
dañäduncunactapis jampiycapäcula.
Illacalpuyäcunätañatacmi aśhnuman sillalcachil aylluncuna capäcuśhan Jerico malcaman puśhapäcula.
Jinalculmari Samariaman cutipäcula.
16 Chay timpum mandacü Acaz mañacula Asiriap mandacünin yanapänanpä.
17 Chaynu mañacula Edom läducunaca Judata llallilcul waquincunacta prïsu puśhacuptinmari.
18 Chaynütacmi Filisteo läducunäpis Juda läduman yaycuycul Sefela lädućhu cä malcacunäpi,
Neguev lädućhu cä malcacunäpi lluy ima cänincunactapis apaculcäla.
Jinaman Bet-semes,
Ajalon,
Gederot,
Soco,
Timna,
Gimzo malcacunacta malcachantin-camacta pudiracaycälilmari chayćhu yaćhayalcäla.
19 Chaynüpamá Juda läducta pinꞌayman Tayta Dios ćhulaycula,
mandacünin Acaz Tayta Diospa cuntran śhalcuculcul malcantapis mana allin lulayman jitaycuśhanpïta.
20 Jinaman Asiriap mandacünin Tiglat-pileserpis yanapänantá,
aśhwanpam mandacü Acazpa cuntran śhalcüla.
21 Masqui Acaz,
Tayta Diospa alawana wasinćhu,
palasyunćhu,
puydïcunäpa wasinćhu lluy ima cänincunactapis Asiriap mandacüninman uycuyaptinpis,
payꞌa manamá yanapayculachu.
22 Chaynu sumä sasachacuyćhu mandacü Acaz cayalpis Tayta Diospa cuntran jinalla cayalmari mas juchacta tawacuyäla.
23 Chaymari Siria lädup puydï Damasco malcanpa llallïnin taytachancunamanpis alawayninwan cañaycapäcula:
“Siriap mandacünincunacta taytachancuna yanapayaptinꞌa,
cañaywan uycuptinchicꞌa yaꞌanchictapis yanapaycamäśhunćhari” nil.
Ñatac chay lulaśhancunawan quiquinpä,
jinaman lluy Israelpa cunca cuchuynintam ashicüla.
24 Chaynütacmi Acaz,
Tayta Diospa alawana wasinćhu lluy sirbichicunapä cäcunäta juntuycul lluy amshüla.
Jinaman Tayta Diospa alawana wasinpa puncuncunactapis wićhayculmi,
jinantin Jerusalen malcap isquinancunaćhu taytachacunapä uycuna patacta lulachila.
25 Chaynütacmi Juda lädućhu cä malcacunap ulꞌuncunaćhüpis uycunacunacta lulachila taytachacunaman insinsiucta cañaycälinanpä.
Chaynu lulaśhancunawanmari awquilluncunap Tayta Diosninta sumä piñachila.
26 Ñatac Acaz mandacuyninćhu lluy lulaśhancuna allaycuyninpi camacaynincama isquirbïsha cayan Juda lädup,
Israel lädup mandacünincunap isquirbishan librunćhümari.
27 Acaz wañucuptinc masqui awquilluncuna caśhan Jerusalen malcaman pampayalcaptinpis,
manamá Israel mandacücunäpa pampaläśhancunämanchu pampapäcula.
Chayurá paypa pudirnin chulin Ezequiasñamá mandacüca cala.