Juda läductam mandacü Sisac llallin
12
Chaypi Roboampa mandacuynin tacyaycuptinmi paypis lluy israelcunäpis Tayta Diospa camachicuyninta caćhaycälälin.
2 Chaynu Tayta Diosta ipanchäläliptinmi mandacü Roboampa picha wata mandacuyninćhu,
Egiptop mandacünin Sisac,
Jerusalenta camacaycü yaycüla:
3 Walanga ishcay paćhac (1,200) pilyananpä carritancunawan,
süta ćhunca walanga (60,000) sillädancunawan,
jinaman fintaytapis mana atipana Egiptopi śhamü achca-achca nunacunawanpis.
Paycunam Libia,
Suquies,
Etiope läducuna capäcula.
4 Jinalmi Juda lädućhu sumä murälläśha malcacunactapis Jerusalencama lluy cunćhacaycälila.
5 Chaynu Sisacpi ayïninwanmi Juda lädup lluy puydïnincunawan Jerusalenćhu juntunacüśha Roboam cayalcäla.
Chayman willacü Semaias ćhaycamulñatacmi nin:
“Tayta Diosmi caynu nin:
‘Amcuna caćhaycälimäśhayquinümi,
canan yaꞌapis mandacü Sisacpa maquinman caćhaycälälic’ ” nil.
6 Niptinmi mandacücäwan lluy israelćhu puydïcunaca uyshucaycälil nicuyalcan:
“¡Tayta Diosꞌa tincüninmanmá yaꞌanchicwan lulaycuyan!”
nil.
7 Chaynu uyshucaycälishanta licalñatacmi Semaiasta Tayta Dios nin:
“Uyshucaycälishanpïtamá manaña camacaycuśhächu.
Aśhwanpa ñaꞌascallamanñam libraycuśhä.
Manañamá Sisacwan piñacuynïta Jerusalenman ćhaycachishäñachu.
8 Ñatac mandacü Sisacpa maquinćhümi capäcunꞌa.
Chaymi tantiaculcanꞌa yaꞌacta sirbiy imanuy caśhanta,
chaynütac juc nasyuncunap mandacünincunacta sirbiy imanuy caśhantapis” nil.
9 Egiptop mandacünin Sisac Jerusalenman yaycuyculmi Tayta Diospa alawana wasinpïtawan palasyupïta lluy-lluy cänincunacta pudiracuycun;
aśhta ürupïta atajachicucta Salomon lulachishancunactapis apaculam.a
10 Ñatac chay atajachicucunap pudirnintam brunsipïta mandacü Roboam lulachila.
Jinalculmi palasyup puncunta täpäcunäpa puydïnincunaman uycula licapäcunanpä.
11 Chaymi Tayta Diospa alawana wasinman mandacüca liptin,
täpäcunaca atajachicuncuna apälälisha liwshipäcula.
Chaypïtá ćhulalänan wasimanmi caśhan cutiycachipäcü cala.
12 Chayurá chaynu Roboam uyshucuycuptinmi jinaman Juda lädućhu ima allinllapis cayaptinlämi Tayta Diospa piñacuynin manalcüla.
Jinaptinmi manaña camacaycülachu.
13 Chayurá mandacü Roboampa mandacuynin caśhan tacyaycuptinmi Jerusalenćhu jinalla mandacula.
Mandacuyta allaycula tawa ćhunca jucniyu (41) watanta liyalmi.
Jerusalenćhu ćhunca anćhishniyu (17) watamari mandacula.
Chay malcactam jinantin Israel ayllucunäpi Tayta Dios aclaycula chayćhu yaćhananpä.
Roboampa mamanñatacmi Amon lädu Naama cala.
14 Roboam llapan śhunꞌunwanchu manamá Tayta Diosta ashiycula.
Chaymari mana allincunäta lulaycula.
15 Ñatac mandacü Roboampa allaycuyninpi camacaynincama lluy lulaśhancuna willacü Semaiaspa librunćhu,
jinaman licacü Iddop isquirbishan librunćhümari cayan.
Roboamꞌa mandacuyninćhu Jeroboamwanmi pilyayllaćhu capäcula.
16 Roboam wañucuptinñatacmi Davidpa Malcan nishanman pampälälila.
Chayurá Roboampa pudirnin chulin Abiasñam mandacüca cala.