Acabpa aylluncunactam Jehu camacaycun
10
Canan má,
Samariaćhu anćhish ćhuncam (70) Acabpa chulincuna cala.
Chaymi Samariaćhu cä Jezreel malcayücunäpa puydïnincunaman,
yaśhancunaman,
jinaman Acabpa chulincunacta licäcunäman cartacta Jehu apachila.
Chay cartaćhümi nila:
2 “Mandacüninchicpa chulincunacta licäcuna,
pilyananpä cä carritayücuna,
cawalluyücuna,
armayücuna,
sumä murälläśha malcaćhu cäcuna,
cay cartacta ćhasquïlul-pacha,
3 mandacüniquipä sumä allinnin chulinta aclapäcuy.
Jinalcul papäninpa pudirninpä dispächunman ćhulaycäliy.
Chaynüta lulaycul mandacüniquita pilyäshinayquipä listu capäcuy” nil.
4 Chaynu carta nishanta licaycälilmi paycuna sumä-sumä manchälälil ninacücuyalcan:
“Ishcay mandacüpis mana atipayaptin ¿imanuypaćh yaꞌanchic atipäluchwan?”
nil.
5 Chaymi palasyucta licäca,
malcap puydïninca,
yaśhacunaca,
jinaman chulincunacta licaycüca Jehuta nichila:
“Nunayquicunam capäcullá;
imam nipämäśhayquitaćh lulaycapäculläśhä.
Manamá mayantapis mandacüpä ćhulapäcuśhächu.
Amcunari munaśhayquimannu lulaycäliy” nil.
6 Nichiptinmi cartacta Jehu yapa apachila cay niyäta:
“Sïchuśh yaꞌa parti cayalcal nishäta cäsuculcänayqui captinꞌa mandacücäpa chulincunap umanta apaculculmi wala muyun caynu üra Jezreel malcaman śhapämunqui” nil.
Mandacücäpa anćhish ćhunca (70) walaśh chulincuna malcaćhu licaycünin puydïcunäwanmi capäcula.
7 Chaymi cay licäcunaca cartacta ćhasquïlälil mandacücäpa anćhish ćhunca (70) walaśh chulincunacta muꞌülälin.
Jinalculmi umancunacta canaśhtaman winaycul Jezreel malcaćhu cä Jehuman apälächin.
8 Juc willacüñatacmi Jehuman ćhaycul willaycula:
“Mandacücäpa chulincunap umantam apälälimun” nil.
Niptinmi Jehu:
“Malcap puncunman ishcay partiman muntunaycul wälacama caćhaycäläliy” nin.
9 Chay walantinñatacmi malcap puncunman lilcul lluy malcantinta nicuyan:
“Amcuna mana juchayümi capäcunqui.
Mandacünïpa cuntran yaꞌami śhalcuculcul wañüchilá.
Ñatac caycunactá ¿mayantan wañüchila?
10 Licapäcuyꞌari,
Acabpa lluy milaynincunapi Tayta Dios nishanca lluy-lluymi lulacacuyan.
Willacünin Eliaswan nichishannüllamá quiquin Tayta Dios lulaycuyan” nil.
11 Nilculmi Jezreela malcaćhu Acabpa quïdä lluy aylluncunacta,
puydï nunancunacta,
sasirdütincunactapis Jehu camacaycüla.
Manamá jucllactapis caćhayculachu.
12 Chaypïtam Samaria malcaman Jehu licula.
Chaynu liyäśhanćhümi uwish michïcuna Bet-equedman ćhälun.
13 Chayćhümi Juda lädup mandacünin Ocoziaspa wawꞌi-caśhancunacta talïlul nin:
“¿Mayancunam cayalcanqui?”
nil.
Niptinmi paycuna:
“Ocoziaspa aylluncunam capäcú.
Chaymi mandacücäpa jinaman puydï mamanpa aylluncunacta watucuycü śhapämulá” nin.
14 Niptinmi Jehu:
“Cawsayäta chalapäcuy” nin.
Chaynu chalalcälilmi Bet-equed püsup lädunćhu muꞌülälin.
Chay tawa ćhunca ishcayniyu (42) wayapacunätam wañüchila;
manamá jucllayllapis puchuyculachu.
15 Chaypi Jehu liculmi Recabpa chulin Jonadabwan tincülun.
Chayćhu limayculmi Jehu nin:
“¿Amwan allin cayta munaśhänüchun ampis yaꞌawan cayta munanqui?”
nil.
Niptinmi Jonadab:
“Awari” nin.
Niptinmi:
“Chaynu captinꞌa maquinchicta unacuycuśhun” nin.
Chayćhu Jonadabwan maquinta unacuyculmi carritanman Jehu ishpilcachil nin:
16 “Maynu-maynu Tayta Diospi sumä-sumä wañupacuśhäta licanayquipä acu lishun” nil.
Nilculmi carritanćhu puśhacula.
17 Samaria malcaman ćhälulmi Acabpa quïdä lluy aylluncunacta Jehu camacaycüla.
Chaynu lulaycula Eliaswan Tayta Dios willacachimuśhannümari.
Taytacha Baalta alawäcunätam Jehu camacaycun
18 Chaypïtam jinantin malcäta juntuycul Jehu nin:
“Taytacha Baalta alawaycaćhalam Acab.
Yaꞌañatacmi ichá sumäpa alawaycuśhä.
19 Baalpa lluy willacünincunacta,
yanapänincunactawan,
sasirdütincunactapis ayapämuy.
Baalpä sumä-sumäta uycuna cayaptinmi jucllanpis mana faltaycunmanchu.
Mayanpis mana śhamücá wañunꞌam” nil.
Ñatac Baalta lluy alawäcunäta wañuchinanpämi casquillanwan Jehu chaynu nila.
20 Chaypïtam Jehu nin:
“Baalta altuman juluycunapä jatun fistapä japächaycuy” nil.
Chay nishannüllamari lluy-lluyta ayachila.
21 Chay jinantin Israel läduman willacücunacta Jehu caćhäluptinmi Baalta alawäcunaca lluy śhapämula.
Manam jucllayllapis faltayculachu.
Chaymi Baalta alawana wasica sumä junta-junta cayäla.
22 Chayćhümi müdanacunacta ćhulä nunacta Jehu nin:
“Baalta sirbïcunäpä müdanacunacta julapämuy” nil.
Niptinmi lluy julamula.
23 Jehuñatacmi Recabpa chulin Jonadabwan Baalta alawana wasiman yaycuycul Baalta sirbïcunäta nin:
“Sumäta licapäcuy,
yanꞌalätac Tayta Diosta sirbïcuna cayćhu cayalcanman.
Baalta alawäcunällam cayćhu canan” nil.
24 Chaypi Baalta alawä sirbïcunämi uycapäcunanpä,
cañaywan uycälinanpä yaycälälin.
Chayćhu Jehuñatacmi pusä ćhunca (80) nunacunacta puncuman ćhulaycul nin:
“Cay nunacunäta maquiquimanmi ćhulaycayämú.
Jucllactapis cawsayniyüta ayichïcá bïdanwanmari päganꞌa” nil.
25 Chaynu cañaywan uycuyta camacäläliptinmi pilyänincunactawan puydïnincunacta Jehu nin:
“Yaycuycul wañuchipämuy.
Ama mayanllapis ayichunchu” nil.
Chaymi pilyäcunäwan puydïcunaca ispädawan camacaycälälil waśhaman wicapapämula.
Jinalculmi Baalpa mas chuya sityunman yaycaycälil,
26 taytachancunacta julälälimula.
Jinalculmi cañaycälälila.
27 Uycuna patactapis,
quiquin alawana wasictapis pampamanmi muyülächila.
Chaynu ishpacuna sityuman muyüśham canancamapis cayan.
28 Chaynüpam taytacha Baalta Israel lädupïta Jehu chincächila.
29 Chaynu lulayalpis Israel läducta juchapacachï Nabatpa chulin Jeroboampa mana allin lulaynincunacta Jehu manam caćhayculachu.
Bet-el,
Dan malcacunaćhu ürupïta wäcacunäta jinallamari alawayäla.b
30 Chaymi Jehuta Tayta Dios nin:
“Munaśhämannümi allinta lulayculanqui.
Acabpa aylluncunawan lulayta munaśhäta lulaycuśhayquipïmi tawa milayniquicama Israel lädućhu mandacü capäcunꞌa” nil.
31 Ñatac Israel lädup Tayta Diosninpa camachicuyninta manam llapan śhunꞌunwanchu Jehu cäsucula.
Jinaman Jeroboam Israel läducta mana allin lulachishancunactapis manam caćhayculachu.
32 Chay timpum Israel läducunäpa allpancunacta mïnusyachiyta Tayta Dios allacuycula.
Mandacü Hazaelmari jinantin Israel lädup culindancunap yaycul quitayta allacuycula.
33 Jordan mayup inti ishpimunan lädućhu cä Galaad lädu lluy partictam quitäla.
Chay Galaadćhu Gad,
Ruben,
Manases ayllucunap tücänincunamari cala.
Chaynüpam Arnon mayup patanpa cä Aroer malcapïta aśhta Basan partip culindancama quitäla.
34 Ñatac Jehupa mandacuyninćhu lluy lulaśhancuna,
jinaman sumä munaywan lulaśhancunapis Israel lädu mandacünincunap isquirbishan librunćhümari cayan.
35 Pay wañucuptinmi Samariaman pampälälila.
Pudirninñatacmi chulin Joacaz mandacü cala.
36 Chayurá Jehu ishcay ćhunca pusäniyu (28) watam Samaria malcapi Israel läducta mandacula.