2 Juc cutićhümi Siria malcap juyu nunancuna Israel läducunäman lipäcul juc tacsha wamlallacta puśhaculcäla.

Paymi Naamanpa walminta sirbila.

3 Chay wamlam patrünanta nin:

“Mamay,

Samariaćhu cä Tayta Diospa willacünin Eliseoman patrunní liptin lipranpïta allinyächinmanmi” nil.

4 Chaymi mandacücäman lilcul Israel lädu wamlaca nishanta Naaman willaycula.

5 Niptinmi Siria malcap mandacünin nin:

“Allin,

lïluyꞌari.

Israelpa mandacüninman yaꞌami juc cartacta apachishayqui” nil.

Chaymi Naaman quimsa ćhunca walanga (30,000) illayta,

süta walanga (6,000) üructa,

ćhunca muśhü müdanacta apaculcul licula.

6 Chaynütac Israel lädup mandacüninman carta apachishanćhümi nin:

“Lipra ishyayninpi allinyaycachinayquipämi cay cartantinta uywayní Naamanta caćhayämú” nil.

7 Chay cartacta Israelpa mandacünin lïgiyculmi müdananta laćhyacuyan:

“¿¡Tayta Dioschun imamá yaꞌa cayá nunacta wañuchinäpäpis ütac cawsachinäpäpis!?

¿Imapïmá lipra ishyayninpi allinyachinäpä caćhamumäla?

Rasunpa,

cayꞌa achäquictamá ashipayäman” nil.

8 Chaynu mandacüca müdananta laćhyaśhanta willacü Eliseo yaćhälulmi nichila:

“¿Imapïmi müdanayquita laćhyälunqui?

Yaꞌamanꞌari śhamuchun Israel lädućhu willacünin caśhanta yaćhananpä” nil.

9 Chaymi Naaman cawalluncunawan,

carritancunawan lil Eliseop wasinpa puncunćhu śhaycuycula.

10 Eliseoñatacmi willacüninwan willacachimula:

“Lipra ishyayniquipi tuqui allinyanayquipä Jordan mayuman lilculmi anćhish cuti chuyanchacamunqui” nil.

11 Niptinmi Naaman sumä piñäśha cuticula cay nishtin:

“Ćhasquïní yalalcamulćha Tayta Diosninta mañacapamanꞌa.

Jinaman ‘maquinwan chacchayculćhá lipra ishyaynïta allinyaycachimanꞌa’ nilämá.

12 ¿Israel lädup mayunpïtá Damasco malcaćhu Abana,

Farfar mayucunälächun mas allin cayan imatá?

¿Chay mayucunäćhu chuyanchacülul manachun allinyäśha imamá?”

nil.

Chaynu nishtinmi sumä piñäśha licula.

13 Uyway nunancunañatacmi aśhuycälil nipäcun:

“Taytay,

sasa lulanacta lulanayquipä willacüca nishuptiqui lulaycunquimanćha cala.

Chaychun allinyanayquipä mayućhu chuyanchacunallayquipä niyäśhuptiquiꞌa mana lulaycunquimanchu” nil.

14 Nipäcuptinmi Jordan mayuman lilcul Tayta Diospa willacünin nishanmannu anćhish cuti Naaman chuyanchacüla.

Chaymi tuqui allinyälun,

aychanpis tacsha walaśhpa aychannülla llampuy-llampuy chuya licalïlun.

15 Chaypïtam Naaman lluy liwshïnincunawan Eliseoman cutipäcula.

Ćhayculmi Naaman nin:

“Cananmi yaćhá Israel lädullaćhu Tayta Dios caśhanta;

manamá jucćhuꞌa canchu.

Ama chaynu caychu,

cay nunallayqui apamuśhäta ćhasquiycallämay” nil.

16 Niptinmi Eliseo:

“Licamäní Tayta Dios tuquictam yaćhan;

manamá ćhasquishayquichu” nin.

Maynüpa Naaman jicutapaptinpis Eliseo manamari ćhasquiyta munalachu.

17 Chaymi Naaman nin:

“Ama chaynu caychu,

cay Israel lädupïta ishcay mulá allpacta apananpä awniycallämay.

Cay nunallayqui canan pachapïta Tayta Diosllactañam alawayculläśhä.

Taytachacunamanꞌa manañam uycuśhächu nï cañaywanpis uycuśhächu.

18 Ñatac cay nunallayquita pampachaycallämanquim:

Rimon taytachaman mandacüní alawä yaycul licläman iscatacaycamuptin yaꞌapis paywan cuscam unꞌulacuycuśhä.

Chayta lulaśhäpïta Tayta Dios pampachaycallämächun” nil.

19 Niptinmi Eliseo:

“Jawcalla cuticuy” nin.

Niptin caluscactañam liyäla.

20 Chaynu liyaptinñam Tayta Diospa willacünin Eliseop uywaynin Giezi tantiapacülun:

“Sirio lädu Naaman apamuśhanta mana ćhasquiyculmi,

licunanpä patrunní caćhaycülun.

Tayta Diostam licänïpä ćhulaycú.

Wayra-wayra alcansalculmi imallantapis mañapacämuśhä” nil.

21 Chaymi Naamanta alcansä wayra-wayra Giezi pasacun.

Naamanñatacmi wayra-wayra ipanta atishanta licälul carritanpi jiꞌalpuycul nin:

“¿Allinchun cayalcanqui?”

nil.

22 Niptinmi Giezi:

“Lluy allinmi cayan.

Tayta patrunnïmi caynu nichimuśhunqui:

‘Efrain lädu ulꞌupïtam ishcay müsu willacücuna ćhälälimun.

Ama chaynu caychu quimsa walanga (3,000) illaytawan ishcay muśhü müdanacta uycullay’ ” nin.

23 Niptinmi Naaman:

“Allin,

süta walanga (6,000) illayta apapuy” nil.

Chaynu jicutapayalmi süta walanga (6,000) illaycäta ishcay muśhü müdanacta ishcay luncucunaman winaycul ishcay uywayninwan apachila.

Chaynüpam Giezicta apawshipäcula.

24 Chay ulꞌuman ćhälälilñatacmi ishcay luncüta wasinman Giezi ćhulacuycun.

Jinalculmi apawshïcunäta cuticulcänanpä nila.

25 Chaypïta patrunnin Eliseo caśhanman yaycuptinmi pay nin:

“Giezi,

¿maypïtam śhayämunqui?”

nil.

Niptinmi Giezi:

“Cay nunallayqui manam maytapis lilächu” nin.

26 Niptinpis Eliseo:

“Chay nunaca ćhasquishunayquipä carritanpi jiꞌalpuśhanta Tayta Diosmi licachimäla.

¿¡Illayta,

müdanacta,

ulïbus lantacunacta,

üba lantacunacta,

uwishcunacta,

wäcacunacta,

uyway nunacunacta ćhasquinanchic timpućhüchun cayanchic imatá!?

27 Chaynu lulaśhayquipïmi Naamanpa lipra ishyaynin wiña-wiñaypä amćhu,

jinaman lluy milayniquićhüpis canꞌa” nin.

Chay nishannüllam Eliseop ñawpäninpïta yulä-yulä lipra ishyayniyüña licula.