Eliasmi mnadacü Acabman cutin
18
Chaynu quimsa wata pasäluptinñam Eliasta Tayta Dios nin:
“Canan Acab caśhanman liy.
Cay pachämanmari tamyachimuśhäña” nil.
2 Niptinmi mandacü Acab yaćhaśhanman Elias licula.
Ñatac sumä-sumä micuy wanam Samariaćhu cacula.
3 Chaynu pasacuyaptinmi mandacü Acab yanapänin Abdiasta ayachila.
Abdiasñatacmi Tayta Diosta manchacuywan cäsucü nuna cala.
4 Paymi Tayta Diospa willacünincunacta Jezabel wañuchicuyaptin ishcay maćhayman pacäla,
picha ćhuncacta-cama.
Jinalculmi chayman micuytapis,
yacuctapis apapü cala.
5 Chaynu Abdiasta ayalcachimulmi Acab nin:
“Jinantin malcanchiccunaćhu mayucunäman,
pucyucunäman yacu ashï lishun.
Icha chaycunaćhu cawallunchiccuna,
mulanchiccuna cawsananpä pastucunacta talichwanläpis.
Manaña talilꞌa uywannäñaćh quïdäśhun” nil.
6 Chaymi tücachinaculcul wicpa caypa ashï liculcäla.
Acab juc lädunpa liptinmi Abdiasñatac juccä ladup lila.
7 Chaynu Abdias liyalmi Eliaswan tincülun.
Chayćhu lisïlulmi puntanman unꞌulacuycul nicuyan:
“¿¡Tayta Eliaschun am cayanqui!?”
nil.
8 Niptinmi:
“Aw,
Eliasmi cayá.
Cayćhu caśhäta mandacüniquiman willaycamuy” nin.
9 Niptinmi Abdias nin:
“Cay nunallayqui,
¿ima mana allintam lulällalá,
Acabpa maquinman chalaycachimaptiqui wañuchimänanpä?
10 Tayta Diosniqui tuquictam yaćhan;
may malcactapis nasyuntapis lluy-lluyñamari ashichimuśhulanqui.
Chayćhu:
‘Manam cayćhu canchu’ nipäcuptinꞌa limalicachilam chayćhu rasunpa mana caśhayquita.
11 Chaychun canan niyämanquiman:
‘Mandacüniquita nimuy,
Eliasmi cayćhu cayäña’ nil.
12 Willacü licuśhäcamaćh Diospa Ispiritun mana lisishá läduman puśhacuśhunqui.a
Chayćha Acab mana taliculcul yaꞌacta wañüchimanꞌa,
masqui cay nunallayqui müsu caśhäpi Tayta Diosta manchacuywan sirbiyaptïpis.
13 ¿Manachun willapäcuśhulanqui Tayta Diospa willacünincunacta Jezabel lluy wañuchicuyaptin ima lulaśhätapis?
Paćhac (100) willacücunacta ishcay maćhayman picha ćhuncacta-cama (50) pacayculmari micuypi,
yacupi sirbiyculá.
14 Chaychun,
¿mandacüniquiman lil willaycamuy ‘Eliasmi caychu cayäña’ nil niyämanquiman imamá?
¿Wañuchimänantachun munanqui imatá?”
nil.
15 Niptinmi Elias nin:
“Sumä munayniyu Tayta Diospa ñawpäninćhümi cayá.
Canan-pacham mandacü Acabwan tincuśhä” nil.
16 Niptinmi Acabta ashï Abdias pasacula.
Willaycuptinñatacmi Eliaswan tincunanpä Acab śhamula.
17 Eliasta licälulmi Acab nin:
“¿Amćhá cacuyanqui israelcunäta ñacaycunacta pasachïca aw?”
nil.
18 Niptinmi Elias nin:
“Yaꞌachu manam israelcunäta ñacaycunacta pasayächí.
Sinuꞌa anmi lluy aylluntin Tayta Diospa camachicuynincunacta caćhaycul taytacha Baalcunaman muyucalcälishayquiwan ñacaycunacta pasayächinqui.
19 Cananꞌari lluy israelcunäta Carmelo ulꞌuman juntuchimuy.
Chaynütac taytacha Baalpa tawa paćhac picha ćhunca (450) willacünincunapis,
jinaman mamacha Aserap tawa paćhac (400) willacünincunacta Jezabel micachishantapis juntuchimuy” nil.
Baalpa willacünincunawanmi Elias licanacun
20 Chaymi Acab lluy israelcunätawan willacücunäta Carmelo ulꞌuman ayachimula.
21 Chayćhümi jinantin israelcunäman aśhuycul Elias nin:
“¿Amcuna imaycamatan ishcay śhunꞌüśha cayalcanqui?
Tayta Dios rasunpa Dios captinꞌa paytari atipäcuy;
sïchuśh Baal Diosniqui captinꞌa paytatacꞌari atipäcuy” nil.b
Niptinmi malcaca upällayllaman camäśha cacuyalcan.
22 Eliasñatacmi nicuyan:
“Tayta Diospa willacünincunapïtá yaꞌa japallämi quïdäśha cayá.
Ñatac taytachayqui Baalꞌa tawa paćhac picha ćhunca (450) willacünincunawanmi cayalcan.
23 Canan má licaycuśhun:
Ishcay wäcacta puśhapämuptiqui paycuna jucninta ćhipilcul cuartuśhchapäcuchun.
Jinalcul yamta jananman ćhulaycul ninacta ama latachichunchu.
Juc wäcactañatac yaꞌapis ćhipilcul yamta jananman ćhulaycuśhä;
yaꞌapis manatacmari ninacta latachishächu.
24 Chaynu jinayculćha ninacta caćhalpamunanpä diosniquita mañaculcanqui.
Chaynütacćha yaꞌapis Tayta Diosnïta mañacuśhä.
Chayćhu mayanninpis ninacta caćhalpamücämi rasunpa cawsä Dios canꞌa” nil.
Niptinmi malcaca:
“Aw,
allinmi.
Chaynu cachun” nicuyalcan.
25 Chaymi Baalpa willacünincunacta Elias nin:
“Amcuna achca cayalcalmi jucnin wäcacta aclacalcälil puntacta lulapäcunqui.
Mana latachillal taytachayquita mañaculcay ninacta caćhalpamunanpä” nil.
26 Chaymi ćhasquishan wäcacta ćhipiycälil wälapïta aśhta ćhawpi muyuncama taytachan Baalta ayay-ayay cayalcan:
“¡Tayta Baal,
uyalipällämay!”
nil.
Chaynu nishtinmi Baalpa willacünincuna uycuna patac lulaśhanpa muyülïninćhu muyuy-muyuy cayalcan.
Ñatac manamá mayanllapis imallactapis nilpamunchu.
27 Chaynu ćhawpi muyunña cacuyaptinmi Elias asipäla:
“Mas callpawan ayaycaćhapäcuy;
paypis diosmari.
Ichapis lulaynincunaćhu cayan,
ütac acacuyan,
ütac calu imacta yalülun.
¡Icha puñülü imanćha,
licchachipämuyꞌari!”
nil.
28 Paycunañatacmi apalcaćhaśhtin custumrincunamannu cuchilluwan,
nabäjawan cuchucücuyalcan yawartay-yawartayta.
29 Chaynu ćhawpi muyun pasäluptinpis lücunümi jinalla willacücunaca paćhcaycaćhaśhtin apalcaćhayalcäla,
cañaywan uycunan üracama.
Ñatac manamá mayanpis nilpamulachu nï imallactapis uyaliycapäculapischu.
30 Chaymi lluy nunacunäta Elias nin:
“Aśhuycälimuy” nil.
Chaynu lluy nunacunaca aśhuycäliptinmi Tayta Diosta uycunan patac tunïshäta allichayta allaycula.
31 Chaypämi Jacobpa ćhunca ishcayniyu ayllucunamannu ćhunca ishcayniyu lumicunacta juntula.
Jacobtamari Tayta Dios śhutichäla Israelwan.c
32 Chay ćhunca ishcayniyu (12) lumicunäwanmi Tayta Diospa uycuna patacninta lulapula.
Chay patacpa muyülïninmanmi wayucta ućhcuchila ćhunca pichayu (15) litru yacu yaycütanu.
33 Jinalculmi yamtacta ćhulaycul janäninman wäcap aychanta cuartuśhchaycul ćhulaycula.
34 Jinalculmi nin:
“Tawa wacuy yacucta apalcamul cañaywan uycuna aychäman,
yamtäman jillpuycapäcuy” nil.
Chaynu quimsa cutictam jillpuycachila.
Nunacunäñatacmi Elias nishantanu lulapäcula.
35 Chaymi uycuna patacpa muyülïninćhu yaculla unyayal wayucta lulachishanmanpis lluy juntäla.
36 Cañaywan uycunan üraca ćhämuptinmi willacü Elias aśhuycul nin:
“Abrahampa,
Isaacpa,
Israelpa Tayta Diosnin cananꞌari Israel malcap Diosnin caśhayquita camalachicuy.
Chaynütac nunayqui caynïwan nimäśhayquimannu caycunacta lulaśhätapis camalaycachiy.
37 Tayta Diosllay,
uyaliycallämayꞌari.
Am Tayta Dios caśhayquita cay nunacunaca yaćhapäcunanpä,
jinaman anman cuticalcämunanta alcaśhayquita yaćhapäcunanpäri uyaliycallämay” nil.
38 Chaynu niyällaptin Tayta Dios ninacta caćhalpämuptinmi cañaywan uycuna aychacta,
yamtäta,
lumicunäta,
allpätapis lluy lupäla.
Chay wayućhu ućhalä yacütapis lluymi chaquïchila.
39 Chayta lluy nunacuna licälälilmi pampäman uyshucaycälil nicuyalcan:
“Tayta Diosꞌa rasunpa Diosmi;
Tayta Diosꞌa rasunpa Diosmi” nil.
40 Chayćhümi Elias nin:
“Taytacha Baalpa willacünincunacta chalapäcuy.
Jucllanpis ama ayichunchu” nil.
Chaynu lluy chalaläliptinmi Cison mayuman pushalcul chayćhu lluy muꞌuchila.
Tamyamunanpämi Elias mañacun
41 Chaypïtam Acabta Elias nin:
“Tamyamunanpä sumäñam suynaćhacayämun;
micü,
upyä licunquimanñam” nil.
42 Niptinmi Acab micü,
upyä licula.
Eliasñatacmi Carmelo ulꞌup puntanman ishpilcul unꞌulacuycula,
cärantapis unꞌulninman ćhänancama.
43 Chayćhümi yanapäninta nin:
“Cayman ishpilcamul lamar läducta licay” nil.
Niptinmi yanapänin licalcamul nin:
“Manam imapis canchu” nil.
Niptinmi Elias:
“Licamü liy” nin.
Chaynu anćhish cutim nila.
44 Chay anćhish cuti licamuśhanpïmi yanapänin nin:
“Maquinchicnüllam uchuy pucutaylla lamarcäpi yalayämuña” nil.
Niptinmi Elias nin:
“Acabman lil nimuy:
‘Tamyaca mana camacäśhunayquipä canallanshi carritayquiwan licunqui’ ” nil.