Mefi-bosetta allinpam David licaycun
9
Juc muyunćhümi mandacü David tapula:
“¿Saulpa ayllunćhu mayanllapis cayanlächun Jonatan-laycu allinpä licaycunäpä?”
nil.a
2 Ñatac Saulpa ayllunćhümi uywaynin nuna Siba śhutiyu cala.
Paytam Davidman śhamunanpä ayächimun.
Chayćhümi mandacü David:
“¿Amchun Siba cayanqui?”
nin.
Niptinmi:
“Aw taytay,
yaꞌami cayällá” nin.
3 Niptinmi mandacüca:
“Tayta Diospa llaquipayninwan yanapaycunäpä,
¿Saulpa ayllun jucllayllapis cayanlächun?”
nin.
Niptinmi:
“Cayanlämi Jonatanpa chulin.
Paymi pulan ćhaquin wishtüśha cayällan” nin.b
4 Niptinmi mandacüca:
“¿Mayćhümi pay cayan?”
nin.
Niptinmi Siba:
“Lo-debar malcaćhu,
Amielpa chulin Maquirpa wasinćhümi yaćhayan” nin.
5 Niptinmi mandacü David puśhachimula Lo-debar malcaćhu Amielpa chulin Maquirpa wasinpïta.
6 Mefi-bosetñatacmari Saulpa willcan,
Jonatanpa chulin caña.
Paymi Davidpa puntanman unꞌulacuycul pampäcama uyshucuycula.
Chayćhümi David nin:
“¿Amchun Mefi-boset cayanqui?”
nil.
Niptinmi:
“Aw taytallay,
yaꞌami cayällá” nin.
7 Niptinmi David:
“Ama manchacuychu,
papäniqui Jonatan-laycum amta allinpä licaycuśhayqui.
Awquilluyqui Saulman lluy ćhacla tücäcunätapis anmanmi cutiycachishayqui.
Jinaman cananpi puntamanꞌa yaꞌawan cuscamari imaypis micuśhun” nin.
8 Niptinmi Mefi-boset uyshucuycul nin:
“Pasaypi mana sirbï wañüśha allꞌunüpis cayaptí,
¿imapïtam caynüpa licaycallämanqui?”
nil.
9 Chayćhümi Saulpa nunan Sibacta ayalcul David nin:
“Patrunniqui Saulpawan lluy ayllunpa cänincunactam willcan Mefi-bosetman canan cutiycayächí.
10 Chaymi canan paypa ćhaclanćhu lluy chuliquicunawan,
uywayniquicunawan lulaycachinqui.
Cusichantapis patrunniquip ayllunpämi pilwaycunqui.
Willcan Mefi-bosetñatacmi ichá imaypis yaꞌawan micunꞌa” nil.
(Ñatac Sibap chulincuna ćhunca pichayümi cala;
uyway nunancunañatacmi ishcay ćhunca capäcula.)
11 Niptinmi Siba nin:
“Mandacü taytallay,
lluy nimäśhayquitanümi cay nunallayqui lulayculläśhä” nil.
Mefi-bosetñatacmi ichá jucnin chulin-yupayña mandacü Davidpa wasinćhu micula.