Is-bosettam wañuchin
4
Chaynu Hebron lädućhu Abner wañüśhanta Saulpa chulin Is-boset yaćhälulmi jucmanyacülun.
Chaynütacmi jinantin Israelpis ćhinaśhyälälin.
2 Má,
chay Is-bosetpam Benjamin ayllupïta ishcay nunancuna cala.
Paycuna Beerot malcayu Rimonpa chulincunam capäcula:
Baanawan Recab.
Paycunamari sumänin lulaycunap puydïnincuna cala.
(Ñatac Beerotćhu yaćhäcunätamá “Benjamin ayllupïta” nil nipäcula.
3 Paycunamari Gitaim malcaman ayiculcäla.
Chayćhümi canancama jamapacünu yaćhapäcun.)
4 Ñatac Saulpa chulin Jonatanpam pasaypi wishtua chulin Mefi-boset śhutiyu cala.
Mefi-boset picha watayu cayaptinmi Jezreel malcapïta willacuy ćhämun:
“Saulwan Jonatanmi wañuculcan” nil.
Chaymi ishpichïnin walmica Mefi-bosetta apaculcul wayra-wayra ayiyäśhanćhu sätapacüña.
Chaynüpam pasaypi wishtu quïdäla.
5 Canan má,
Beerot lädu Rimonpa chulin Recabwan Baanam liculcan Is-bosetpa wasinman.
Ćhänanpämi ćhawpi muyun anchap lupaycäćhu Is-boset jamapäyäśhanćhu pasäñab.
6 Ñatac wasicta täpänin walmipis trïgucta aclayäśhanćhümi puñüña.
Chaymi mana mayanpis licaptin Recabwan Baana yaycälälin wasiman.
7-8 Yaycapäcunanpäñatacmi Is-boset cämanćhu puñuyäña.
Chayćhümi wañüpa tucsïlul umanta jululcälil Arabaman lï caminunpa walächi apaculcäla,
Hebronćhu mandacü David caśhanman.
Ćhayculmi Davidta nipäcun:
“Taytay,
cayꞌari ćhïnicüniqui wañuchiyta munaśhüniqui Saulpa chulin Is-bosetpa uman.
Cananmi ichá Saulta lluy milaynintinta Tayta Dios cutichicülun” nil.
9 Niptinmi Beerot malcayu Rimonpa chulin Recabtawan Baanacta David nin:
“Cawsä Tayta Dios imaymana llaquipïta libraycamänïmi canan camacaycünacpa licäní cayan.
10 Rasunpa,
chay ‘Saul wañucunmi’ nil unay willaycamäca ‘allintaćh lulaycuyá’ nilaćhá.
Yaꞌañatacmi ichá chay willacuyninpïta Siclagćhu chalalcul wañüchilá.c
11 Chayurá amcuna paypïtapis mas mana allinninlämá cayalcanquipis.
Mana juchayu allin nuna wasinćhu puñuyaptinmari wañuchipäculanquilä canpis.
¿Chaychun cay pachäpïta canan amcunacta mana chincälächicmanchu?”
nil.
12 Nilculmi David nunancunacta nin:
“Chay nunacunäta wañuchipämuy,
maquincunacta ćhaquincunacta witulcul Hebron istanquiman walcälälimuy.
Is-bosetpa umantañatacmi ichá Hebronćhu cä Abnerpa pampaläśhanman pampämuy” nil.