Davidwan Abigail
25
Chaypïta Samuelmi wañucun.
Jinaptinmi lluy Israel caśhtacunaca juntunacalälila llaqui-llaquicta waꞌaculcänanpä.
Chaypïtam Rama malcanman pampälälila.
Jinalculmi Paran chunyäcäman David licula.
2 Maon malcaćhüñatacmi Calebpa milaynin Nabal śhutiyu nuna yaćhaña.
Paymi sumä rïcu quimsa walanga (3,000) uwishniyu,
walanga (1,000) capishniyu cala.
Chaymi Carmel malcaćhu millwanta lutuyäla.
Nabalꞌa lumi śhunꞌu,
mana allin cawsayniyümi cacula.
Walmin Abigailñatacmi ichá tuquish walmi,
allin tantiayniyu cala.
3 Awari,
paymi Calebpa milaynin cala;
śhutinñatacmi Nabal cala.
Paymari lumi śhunꞌu,
mana allin cawsayniyu cacula.
Walminpañatacmi Abigail śhutin cala.
Payñatacmi ichá tuquish walmi,
allin tantiayniyu cacula.
4 Ñatac chunyäcäćhu David cayalmi uyalïlun Nabal uwishnincunacta lutuśhanta.
5 Chaymi David ćhunca nunancunacta caćhälun cay nil:
“Carmel malcacta lipäculmi Nabal nunacta yaꞌa partipïta limaycälinqui.
6 Chayćhümi niycälinqui:
‘Jawca allinlla caycuchun amćhu,
aylluyquićhu,
chaynütac lluy ima cäniquićhüpis.
7 Millwa lutuchishayquitam yaćhälú.
Yaćhaśhayquinüpis uywa michïniquicuna Carmelćhu yaꞌacunawan cayalcaptin manamá imaypis mana allinpä licapäculächu,
nïtac imactapis waycapäculächu.
8 Michïniquicunacta tapuycuptiquipis chaynütamari niycälishunqui.
Chayurá caćhamuśhá müsucunäta allinpä ćhasquiycullay;
allin muyunćhümi ćhälälimunpis.
Capuśhuśhayquita cay nunayllayquicunaman uycälillay.
Yaꞌapis chuliquinümari callá’ ” nil.
9 Niptinmi Davidpa nunancuna Nabalman liculcal yaćhachishanmannülla niycälila.
Nilculmi chayćhu alcayalcäla.
10 Nabalñatacmi nin:
“¿¡Mayantá David!?
¿Mayanmá chay Isaipa chulin?
Canan timpucuna duyñunpïta achca uyway nunancunam ayiyalcan.
11 Manamá maypi caśhantapis yaćhächu.
Chaylächun ¿millwa lutünïcunap caśhan tantactalä,
yacuctalä,
aychactalä uyäman mana lisishäcunaman imatá?”
nil.
12 Niptinmi nunancuna caśhan cuticalcämula.
Davidman ćhaycälilmi Nabal ima nishantapis willaycälila.
13 Chaymi David sumä piñacülul nin:
“¡Ispädayquicunacta allichaculcay!”
nil.
Niptinmi lluy nunancuna aśhta quiquin Davidpis ispädanta allichacälälila.
Jinalmi tawa paćhac-yupay (400) nunacuna Davidwan lipäcula;
ishcay paćhacñatacmi (200) imapis cäninta täpaśhtin quïdapäcula.
14 Nabalpa jucnin uyway nunanñatacmi Nabalpa walmin Abigailta nin:
“Patrunnïta limaycunanpämi chunyäcäpïta David willacünincunacta caćhamuña.
Payñatacmi mana allinpä ćhasquïlun.
15 Davidpa nunancuna yaꞌacunacta allinpamari licaycälimäla.
Paycunawan ulꞌucunäćhu imaypis pulipäcuśhäćhu manamá imanapämälachu nïtac imactapis waycapämälapischu.
16 Aśhwanpamari uwishcunäta michipäcuśhäćhu tutapapis muyunpapis uywantinta yanapapämäla.
17 Wayapayqui Nabalꞌa pasaypi mana mayanpapis limaycuna juyu nunamá.
Cananꞌa sumäta tantiaycuy imacta lulanayquipäpis.
Mana allinca duyñunchicman jinantin ayllunman ćhänanpäñam cacuyan” nil.
18 Niptin-pacham Abigail juntülun ishcay paćhac (200) tantacta,
ishcay wacuy bïnucta,
picha uwish cancäśhacta,
tawa ćhunca (40) quïlu trïgu ancäśhacta,
culpachäśha paćhac (100) pasäśhta,
chaquïsha ïguspi ishcay paćhac (200) culpachäśhactapis.
Chaycunactamari aśhnuncunaman cargälun.
19 Jinalculmi uyway nunancunacta nin:
“Puntapäcuy;
ipayquitam yaꞌa śhamuśhä” nil.
Caycunapïta wayapan Nabalta manam imactapis willalachu.
20 Abigailmi aśhnun sillacüśha pacapällanpa liyäla.
Davidñatac nunancunawan pay läduman liyaptinmi Abigailꞌa payman talipäla.
21 Davidñatacmi caynu limala:
“Chunyäcäćhu yanꞌal-yanꞌalmi Nabalpa ima cänincunactapis allinpä licayculá.
Manamá imallanpis chincayculachu.
Chaychun mana allincäwan cutiycayächimanman.
22 Chayurá cananmi Nabalta lluy nunantinta camacaycämuśhä.
Manam jucllactapis cawsayniyüta caćhaycuśhächu.
Chaynu mana lulaptiꞌa Tayta Diosninchic sumäta mućhuycachimächun” nil.
23 Abigailmari Davidta licälul aśhnunpïta jiꞌalpuycul paypa puntanman unꞌulacuycul pampäcama uyshucuycula.
24 Jinaman Davidpa ćhaquinta macallacuyculmi nin:
“Taytallay,
yaꞌami juchayüca cayällá.
Ama chaynu caychu,
cay limäśhäta uyaliycallämay.
25 Taytallay,
cay pasaypi luclu Nabalpaa limaśhanta ama cäsuychu.
Payꞌa śhutinman tincümi luclu nuna callan.
Luclu cayninmi mayćhüpis paywan cayan.
Ñatac cay uyway nunallayquiꞌa caćhamuśhayqui nunayquicunacta manamari licallalächu.
26 “Aśhwanpa Tayta Diosmi manalcächishunqui quiquiqui maquiquiwan mućhuycälichimänayquipïta,
jinaman yawarta jićhaycunayquipïtapis.
Tayta Diosꞌari ćhïnicüniquicunacta,
mana allinniquita ashïcunäta Nabaltanu mućhuchichun.
27 Ñatac cay uyway nunallayqui rigälu apamuśhäcunacta nunayquicunaman aypuycullay.
28 Cay uywayllayquip juchanta pampachaycullayꞌari.
Amtapis milayniquitapis mandacü cananpä Tayta Diosmi tacyaycachishulanqui.
Chaynu Tayta Diospä pilyänin captiquim cawsaśhayquicama ima mana allinpis nï ćhäśhunquichu.
29 Mayanpis wañuchishunayquipä aticaćhaśhuptiquipis ampa cawsayniquiꞌa Tayta Diospa maquinćhümi cayan.
Ćhïnicüniquicunactañatacmi ichá waracawan lumicta waracäcänu wicapälunꞌa.
30 Amtá Tayta Dios nishuśhayquitanümi Israel caśhtacunäpä mandacünin canayquipä ćhulaycuśhunqui.
31 Chayćhuꞌa juchayüta ütac mana juchayütapis cutichicuyniquiwan wañuchishayquipïta manañam llaquicunayqui nïtac śhunꞌuyquipis jucmanyänan canꞌachu.
Chaynu imaćhüpis Tayta Dios allinpä licaycuśhuptiquiꞌa cay uyway nunallayquita amam unꞌaycallämanquichu” nil.
32 Niptinmi Abigailta David nin:
“Israel caśhtacunäpa Tayta Diosnin altuman juluycuśha cachun.
Paymi caćhamuśhulanqui yaꞌawan canan tincuycunanchicpä.
33 Allin yaćhayniquipïta amtapis Tayta Dios allinpä licaycuśhunqui.
Mana juchayu nunacunäta cutichicuynïwan yawarta jićhanäpïtamari manalcachimälanqui.
34 Israel caśhtacunäpä cawsä Tayta Diosninmi mana allinta lulanacpïta manalcachimäla.
Am juclla mana śhamuptiquiꞌa wala-wälapä Nabalpis nï jucllay nunallanpis manaćh quïdanmanñachu cala” nil.
35 Nilculmi rigälu apamuśhanta ćhasquiycul nin:
“Jawcallaña wasiquita cuticuy.
Mañacuyniquitamari canan uyaliycucña” nil.
36 Chaypïta Abigail wasinman cutilmi wayapan Nabalta talïlun juc mandacünülä jatun cumbiducta lulacuycul cayäta.
Chayćhümi cushisha pasaypi shinca cayäña.
Chaymi walantincama walmin imactapis mana nilachu.
37 Chay walantin Nabal malläyäśha cayaptinñam ima pasaśhantapis walmin willaycula.
Chayta Nabal uyalïluptinmi śhunꞌun śhaycülun;
jinaptinmi luminu quïdälun.
38 Chay ćhunca muyunpïtam Tayta Dios yapañatac Nabalpa śhunꞌunta śhaycächin;
jinaptinmi wañucula.
39 Chaynu Nabal wañucuśhanta yaćhälulmi David nin:
“Tayta Dios altuman juluycuśha cachun.
Jalutacamäśhanpïtam Nabalta wañüchin;
mana allinta lulanäpïtam manalcächiman.
Nabalpa mana allin lulaynintamari quiquinman Tayta Dios ticlapächin” nil.
Chaypïtam Abigailwan casaracunanpä payman juc willacüta David caćhälun.
40 Chaymi Davidpa willacünincuna Carmel malcaćhu cä Abigailman ćhälälil nipäcun:
“Davidmi amwan casaracuyta munan” nil.
41 Niptinmi Abigail unꞌulacuycun cäranpis pampäman ćhänancama:
“Davidpa uyway nunallanmi cayällá.
Nunancunap ćhaquincunacta paꞌanäpämi cayällá” nin.
42 Nilculmi Abigail juclla allichacula.
Chaypïtam aśhnunman sillaculcul picha yanapänincunacta puśhaculcul Davidpa nunancunap ipanta lila.
Chaynüpamari Davidwan masanchacula.