Tayta Diostam Ana alawan
2
Chaymi Tayta Diosta Ana mañacuyninćhu caynu nin:
“Taytallay,
llapan śhunꞌüwanmi cushicú.a
Amllaćhümi yaꞌa callpanchacú.
Nunatucüśha ćhïnicünïcunactam
cananꞌa uyshulächí.
Libraycamäśhayquipïtamari cushicú.
2 Tayta Diosllay,
amnuꞌa
manamá mayanpis chuya caycunchu.
Ampïtá manam juc wanca mayanpis caycunchu.
Am licaycamänïnuꞌa manam mayanpis caycunchu.
3 Amari mayanpis nunatucüśhá,
allintucüśhá limachunchu.
Amari mayanpis alawacuchunchu.
Tayta Diosmi lluy imactapis tuquicta yaćhayan;
Paymi lulapäcuśhanmannu lluytapis cäraycunꞌa.
4 Payꞌa callpasapacunäpa flïchancunactapis paquïlunmi;
mana callpayu nunacunätá callpayümanmi muyuchin.
5 Puntacta usu-usuyninpawan cäcunaca
cananꞌa partin tantallapäñam lulapaculcan.
Puntacta micuypi cäcunaca cananꞌa maćhaycüśham capäcun.
Wawicta mana talicü walmipis anćhish cutictam ishyacülun.
Achca wawiyücunäñatacmi ichá
mana wawiyüña cayal llaqui-llaquicta waꞌaculcan.
6 Tayta Diosmi cawsaytapis wañuytapis uycamanchic.
Payllatacmi wañücuna caśhanman jiꞌalpachimanchic;
chaypïtapis cutichimanchicmi.
7 Tayta Diosllam wacchayächimanchic,
rïcuyächimanchic.
Payllatacmi uyshulächimanchic,
altumanpis julumanchic.
8 Tayta Diosllam wacchacunätapis altuman juluycun;
Payllam limusnïrucunätapis allinman śhalcachin.
Jinalcul puydï mandacücunawanlämi dispächunćhu taycaycachinpis;
allinnincunamanlämi ćhulaycunpis.
Tayta Diosmi jinantin pachäpa paradïruncunacta tacyaycachin;
simintunmanmi sumäta tacyaycachin.
9 Paymi chalapacünincunap puliynincunactapis
ñawillanćhu caycachinꞌa.
Mana allin nunacunämi ichá tutawyaycäćhu camacapäcunꞌa.
Quiquillanpa callpallanwanꞌa manamá mayanpis allin caycunmanchu.
10 Tayta Diosmi ćhïnicünincunacta camacaycülunꞌa;
janay pachäpïtam räyucunacta paycunaman caćhaycämunꞌa.
Jinantin pachätam Tayta Dios cäraycunꞌa;
aclacuśhan mandacücätam callpanchanꞌa;
aclacuśhanpa munaynintam altuman juluycunꞌa” nil.
11 Chaypïtam Rama malcaćhu wasinman Elcanawan cuticula.
Chulin Samuelñatacmi sasirdüti Elipa maquinćhu quïdacula Tayta Diosta sirbinanpä.
Elipa chulincunam mana allinta lulapäcun
12 Ñatac Elipa chulincuna pasaypi-cama Tayta Diostapis mana manchaculcämi capäcula.
13 Paycuna caytanümi lulapäcula:
Tayta Diosman uycunanpä apapämuśhanman sasirdütïpa yanapäninmi jatun tinidurninwan śhamü cala.
Chayćhu aychäta yanuyaptinlämi
14 paylamanpis,
mancamanpis,
caldunmanpis tinidurta śhatiycul sasirdütipä aychäta julamü cala.
Chaynütam lulayta ćhapala Silo malcaman lï Israel caśhtacunäwan.
15 Chaynütacmi wilactapis manalä cañaycuyaptin sasirdütïpa yanapänin śhalcamul cañäcäta nin:
“Sasirdütipa cancaycapunäpä aychacta umay.
Yanüśhactá manañam ćhasquishunquimanchu;
aśhwanpa ćhawallactam ćhasquishunqui” nil.
16 Niptinmi uywacta uycü nunaca nin:
“Puntactá wilancunalä lupaycuchun.
Chaypïtaćh munaśhayquimannu julucuycunqui” nil.
Niptinmi yanapäca:
“Manam,
cananmi umanqui.
Mana umaptiquiꞌa quitäśhayquim” nicuyan.
17 Chaynüpam müsu sasirdüticunaca sumä jatun juchacta lulapäcü cala;
Tayta Diospä uycälishantamari jalutaculcäla.
18 Samuelñatacmi ichá lïnupi chalicun ćhulacüśha Tayta Diosta sirbila.
19 Mamanñatacmi uchuy sutänacta lulapü cala.
Chaytam watan-watan Tayta Diosman uycunanpä wayapanwan lipäcuśhanćhu Samuelpä apapü cala.
20 Chaymi Elcanactawan walmin Anacta allin caycälinanpä sasirdüti Eli caynu nin:
“Cay chuliquita Tayta Diospä japächaycuśhayquipïtam cay walmiquićhu mas chulicta pay uycuśhunqui” nil.
Chaypïtam wasinta cutipämula.
21 Tayta Dios allinpä licaycuptinmi Ana patacta talicülü cala.
Chaymi Anap quimsa walaśh,
ishcay wamla wawincuna cala.
Samuelñatacmi Tayta Diospa puntanćhu wiñala.
22 Ñatac Sasirdüti Eli anchap yaśhaña cayalpis chulincuna imaymana mana allinta Israel caśhtacunäwan lulaśhanta yaćhälam;
jinaman chuya carpap puncunćhu sirbï walmicunäwan puñupäcuśhantapis yaćhalatacmi.
23 Chaymi nin:
“Jinantin malcämi mana allin lulapäcuśhayquipïta limacuyalcan.
¿¡Imapïtatan caytanu lulapäcunqui!?
24 Nunacunaca mana allin lulapäcuśhallayquipïmi limapäcun.
Mana allintamari lulayalcanqui.
Iju,
chaycunactá amañari lulapäcuychu.
25 Sïchuśh mayanpis nuna-masinpa cuntran juchacüluptinꞌa Tayta Dios allichaycunmanmi.
Ñatac mayanpis Tayta Diospa cuntran juchacüluptinꞌa,
¿mayantan allichaycunman?”
nil.
26 Samuelñatacmi jatunyayälaña,
Tayta Diospäpis,
nunacunäpäpis allin licaycuśhä.
27 Juc muyunćhümi Tayta Diospa willacünin nuna ćhaycul Elita nin:
“Tayta Diosmi caynu nin:
‘Egiptoćhu Faraonpa maquinćhu awquilluyquicuna cayalcaptin yaꞌa camalachicuśhäta yaćhayalcanquimari.
28 Jinantin Israel ayllucunäpi Aarontam aclayculá sasirdüti cananpä.
Paymi uycuna patacćhu cañaywan uycamäca,
insinsiucta cañaycüca chalicunwan ćhulacuśhab sirbiycamäca cala.
Israel caśhtacunaca lluy uycapäcuśhancunactapis amcunamanñatacmari uycapäculac.c
29 ¿Imapïñatan uycamäśhancunäta jalutaculcälanqui?
¿Imapïñatan yaꞌapïtapis mastalä chuliquicunacta altuman juluycunqui?
Israel caśhtacunap allinnin uycamäśhancunawanmi paycunacta wirayächinqui’ nil.
30 “Chaymi israelcunäpa Tayta Diosnin caynüta nin:
‘Yaꞌam limaliculá awquilluyquicunapis,
milayniquicunapis wiña-wiñaypä sirbipämänanpä.
Cananmi ichá limalicuśhäta mana lulaśhäñachu.
Altuman julamänïtam altuman juluycuśhä;
ipanchamänïtañatacmi ichá pinꞌayman ćhulaycuśhä.
31 Janayquićhüñamari cacuyan ampa awquilluyquicunap munaynintapis mana caśhanman muyuchinäpä.
Manam jucllay ayllullayquipis yaśhayänancama ćhanꞌachu.
32 Israelcunäta allicta yanapaptïmi llaquishalla licaylla licapanqui.
Manamá jucllay milayllayquipis yaśhayänancama ćhanꞌachu.
33 Masqui waquin milayllayquita uycuna patacćhu sirbimänanpä caćhaycuyaptïpis lluy milaynincunacta callpallanćhüla cayaptin wañuchishäta lical waꞌapäcunꞌam,
śhunꞌunpis nanaypam nanaycunꞌa.
34 Yaćhanayquipämi chuliqui Ofniwan Finees chay muyunlla wañupäcunꞌa.
35 Yaꞌañatacmi allin sasirdüticta aclaśha śhunꞌüpa cäta,
munaśhämannu luläta.
Milayninpis allin caycunꞌa,
japächacuśhá mandacücätam muyun-muyun sirbiycunꞌapis.
36 Chay aylluyquićhu lluy quïdäcunämari payman uyshuycälinꞌa cay nil:
Ama chaynu callaychu,
ashllacta pägamänayqui captinpis ütac partin tantallacta uycamänayqui captinpis sasirdütinu lulapacuyta uycallämay.
Chaynüpaćh ashllactapis micuycuśhä’ ” nin.