Parti Benjamin ayllucunapämi walminta ashipäcun
21
Israel caśhtacunämi Mizpa malcaćhu Tayta Diosman limalicälälila:
“Wamla chulïcunacta Benjamin ayllucunäwanꞌa manamá cuscachipäcuśhächu” nil.
2 Chaypïta Bet-elman lipäculmi Tayta Diospa ñawpäninćhu tutalpunancama alli-allicta waꞌaśhtin mañaculcäla:
3 “Israelpa Tayta Diosnin,
¿imatan pasälälilläman,
Israel caśhtaćhu juc ayllu chincananpä?”
nil.
4 Chay walantinñatacmi Israel caśhtacunaca wäla-wälalla śhalcacalcälil uycuna patacta lulaycälil cañaywan uycunactapis,
allin cawsaśhanpi uycunactapis Tayta Diosman uycapäcula.
5 Chayćhümi Israel caśhtacunaca tapunaculcäla:
“¿Mizpa juntunacuyninchicćhu mayan ayllullanchicꞌa manatan calachu?”
nil.
Paycuna caytanüñam limanacälälila:
“Tayta Diosninchicwan limanapä Mizpaman mayanpis mana lïcá ‘wañuchisham canꞌa’ ” nil.
6 Israel caśhtacunämari sumä llaquisha cayalcäla Benjamin ayllu-masinwan pasaśhanpïta.
Chaymi ninaculcäla:
“Israel caśhtanchicpïta cananmi juc ayllu chincacun.
7 Benjamin ayllu puchücunaca casaraculcänanpä wamlacta,
¿maypïtaćh talishun?
Yaꞌanchicꞌa Tayta Diosta limalicülunchicñam wamlanchiccunawan mana cuscachinanchicpä.
8 Chayurá ¿cayćhu cayanchun Israel caśhtanchicpi jucllay ayllullapis,
Mizpaćhu Tayta Diospa puntanman mana śhamü?”
nil.
Chayćhümi yalpälälin chay juntunacuyman Jabes-galaad malcapi jucllayllapis mana śhamuśhanta.
9 Manyapi lluy ayaptinmi Jabes-galaadpïta nï jucpis calachu.
10-11 Chaymi lluy israelcunaca ćhunca ishcayniyu walanga (12,000) alli-cama pilyäcunacta caćhälälin cay nil:
“Jabes-galaad malcaćhu wayapactapis,
walmictapis uchuchäcunällactapis ispädawanmi camacaycülunqui.
Manalä umricta lisï wamlacunätam ichá caćhaycunqui” nil.
12 Chaymi Jabes-galaad malcaćhu manalä umricta lisï tawa paćhac (400) wamla cäcunäta,
Canaan lädućhu Silo malca yaćhapäcuśhancäman puśhapämula.
13 Chayćhümi Israel ayllucunaca Rimon ulꞌućhu cä Benjamin ayllucunäman willacachimula allin jawcallaña paycunawan capäcunanpä.
14 Chaynu Benjamin ayllucunaca śhapämuptinmi Israel caśhtacunaca Jabes-galaadpi puśhapämuśhan wamlacunäta walmincunäpä uycapäcula.
Ñatac lluypá manam camalachu.
15 Israel caśhta ayllucunämi llaquiculcäla Benjamin ayllucta Tayta Dios chincächishanpi.
16 Chaymi yaśhancuna juntunacuycul ninaculcan:
“Benjamin ayllućhu lluy walmicunaca camacaycüśha cayaptinꞌa,
¿imanaśhuntan cay puchü wayapacunaca walmiyü-cama cananpä?
17 Israel caśhtanchicćhu juc ayllullapis mana chincananpä cay Benjamin ayllu puchücunaca milayniyümi capäcunan.
18 Ñatac yaꞌanchic manam wamla chulinchiccunawan cuscachichwanchu;
limaliculanchicñam:
‘Benjamin ayllucunäwan wamlanchicta cuscachïcá pasaypi mana allinpä licaśham canꞌa’ nil.
19 Canan,
má imanuy cacuptinpis watan-watanmi Siloa malcaćhu Tayta Diospä jatun fistacta lulapäcun” nil.
(Má,
chay malca Bet-elpa nurti lädunćhu,
Shiquem malcaman lina inti ishpimunan lädućhu,
Lebona malcap sur lädunćhümari cayan).
20 Chaynu ninaculculmi Benjamin ayllucunäman willachimula:
“Lipäcuy,
Silo malcaćhu übas lantacunäman pacacamü.
21 Chayćhümi uyat-uyatllaña capäcunqui.
Silo malcayu wamlacunaca tuśhuśhtin yalapämuptinmari üba lantaćhu pacalapäcuśhayquipïta yalapämul jucnincä-cama walmiquipä pasachiculcanqui.
Jinalculmi tücaśhuśhayqui allpayquiman puśhaculcanqui.
22 Sïchuśh taytancuna ütac tulincuna imactapis nipämaptinꞌa:
‘Ama chaynu capäcullaychu,
pilyapämul manam lluypächu walmincunacta talipäculá.
Ñatac am quiquiquicunachu manam uycuyalcanqui limalicuśhayquita jalutaculcänayquipä’ nilćha nipäcuśhä” nil.
23 Chaynümari Benjamin ayllucunaca lulapäcula.
Tuśhü wamlacunäpïtamari jucta-cama walminpä puśhaculcul allpanman cuticulcäla.
Chayćhu malcanta caśhan śhalcachipäculmi yaćhapäcula.
24 Chaynütacmi Israel caśhta waquin ayllucunäpis allpanman-cama,
ayllunman-cama,
wasinman-cama cuticulcäla.
25 Ñatac chay timpucuná Israel caśhtacunaca mana mandacüniyu capäculmi uman chalaśhanta-cama lluy lulapäcula.b