Ruben, Gad, ćhawpi ayllu Manasesmi allpanman cutipäcun
22
Chaypïtam Josue ayachila Ruben,
Gad jinaman ćhawpi ayllu Manasestapis.
2 Chayćhümi nin:
“Tayta Diospa uywaynin Moises nishancunäta amcuna lluymi lulaycälilanqui.
Jinaman ima nishäcunactapis cäsuculcälanquim.
3 Chaynütacmi chay timpucunapi canancamapis Israel caśhta-masiquicunacta mana caćhaycapäculanquichu.
Aśhwanpam Tayta Diospa lluy nishancunacta lulaycälilanqui.
4 Cananꞌa Tayta Diosninchic limalicuśhanmannümi cay caśhta-masiquicunacta jawcactaña cawsaycälichin.
Chayurá Jordan mayup chimpanćhu Tayta Diospa uywaynin Moises allpa tücachipäcuśhuśhayquiman,
wasiquimanpis cutipäcunquimanñam.a
5 Tayta Diospa uywaynin Moises camachishancunätawan yaćhachicuycunätam ichá manchacuywan cäsuculcanqui:
Tayta Diosta cuyayta,
munaśhanmannu cawsaycäliyta,
camachicuynincunacta cäsucuyta,
payllaćhu masïsu tacyaycuyta,
payllacta llapan śhunꞌuyquiwan llapan cawsayniquiwan sirbiytapis” nil.
6 Chaypïta Josue paycuna allin capäcunanpä niyculmi jamallá niptin wasinta-cama cuticulcäla.
7 Chayurá má,
Manases parti ayllucunactam Basan lädućhu Moises tücachila.
Ćhawpi ayllu Manasestañatacmi Josue tücachila inti jiꞌalpunan lädu Jordan mayup chimpanćhu ayllu-masincunap allpanwan cuscacta.
Paycunactapis allin capäcunanpä niyculmi Josue caćhäla malcanta cuticulcänanpä.
8 Chayćhümi nin:
“Ćhïnicüniquicunacta quitaśhayquita apacälälisha malcayquita alli cäniyu cutipäcuy:
ürucunacta,
illaycunacta,
brunsicunacta,
jïrrucunacta,
jinaman achca-achca müdanacunactawan alli-alli uywacunactapis.
Chaycunactari caśhta-masiquicunawan aypunacaycäliy” nil.
9 Má,
chaypïtam Israel capäcuśhan Canaanćhu cä Silo malcaman caćhaycul Ruben,
Gad,
jinaman ćhawpi ayllu Manasespis Galaadman cutipäcula.
Chay Galaad lädumari Tayta Diospa uywaynin Moises nishanmannu paycunaman tücachisha cala.
Jordan mayu lädunćhu uycuna patactam lulapäcun
10 Cay Ruben,
Gad,
ćhawpi ayllu Manases cutiyalcalmi Canaan lädu Jordan mayup patanman ćhälälil uyaypa cä jatu-jatun uycuna patacta śhalcachipäcula.
11 Parti Israel caśhta-masincunañatacmi yaćhälälin Ruben,
Gad,
ćhawpi ayllu Manases Jordan mayup patanćhu,
quiquincunap tücänin allpaćhu uycuna patacta śhalcälächishanta.
12 Chayta yaćhälälilmi parti Israel caśhtacunaca Silo malcaćhu juntunacälälin paycunawan pilyä linanpä.
13 Ñatac manalä liyalcalmi sasirdüti Eleazarpa chulin Fineesta Israel läducuna caćhapäcula Galaadćhu cä ishcay ayllu ćhawpin cäcunäman.
14 Fineeswantacmi lipäcula ćhunca ayllupi juc puydï-cama;
paycuna ayllućhu-cama puydïnincunamari cala.
15 Chay Galaadman ćhälulmi ishcay ćhawpi ayllucunäta nipäcula:
16 “Lluy Israel caśhta-masinchiccunam yaćhayta munapäcun.
¿Imapïtá chay lulapäcuśhayquiwan Tayta Diosta ipanchalcul jalutacälälinqui?
¿Imapïmá uycuna patacta lulayniquiwan Tayta Diospa cuntran śhalcälälinqui?b
17 ¿Peor lädućhu juchacuśhanchicta mana cäpächun licayanqui imamá?
¿Masqui Tayta Dios wañuywan mućhuycayächimaptinchicpis jina juchayüllala caśhanchicta manachun tantiaculcanqui imatá?c
18 ¿Imapïtá Tayta Diosta ipanchayta ćhapapäcunqui?
Sïchuśh paypa cuntran śhalcäläliptiquiꞌa lluy Israel caśhtacunäwan sumä piñacülulmi imactapis lulämäśhun.
19 Sïchuśh amcuna:
‘Cay tücamäśhanchic allpaca manam chuyachu’ niyalcalꞌa Tayta Diospa patacnin caśhan allpaman śhapämul chayćhu alawapäcuy.
Jinal yaꞌacunawan cusca yaćhapäcuy.
Ñatac juc uycuna patacta śhalcachïniquiwanꞌa amari Tayta Diostapis nï yaꞌacunactapis jalutacuyalcaychu.
20 ¿Manachun yalpapäcunqui camacaycunanpä japächäśha cäcäta Zerap chulin Ajan nuna apacuptin Tayta Diospa piñacuynin lluy Israel läducunäman ćhämuśhanta imatá?
Manamari Ajan nunallachu mana allinninpi wañula” nil.d
21 Niptinmi Ruben,
Gad jinaman ćhawpi ayllu Manasespis nin:
22 “Sumä munayniyu Tayta Diosninchicmi,
lluy imapïpis puydïnincämi tuquicta yaćhan mana jalutacuynïwan nïtac cuntran śhalcuynïwan lulapäcuśhäta.
Cayta jinantin Israel caśhta-masinchiccunapis yaćhapäcuchunꞌari.
Ñatac jalutacuynïwan captinꞌa lluyta wañülächimay.
23 Sïchuśh uycuna patacta Tayta Diospïta japächaculcänäpä,
ütac cañaywan uycälinäpä,
śhunꞌüpi yalamuśhanpi uycälinäpä,
ütac allin cawsaśhanpi uycälinäpä luläläliptiꞌa quiquin Tayta Dios cäraycälimächun.
24 Rasunpa,
śhamü timpucunacta pinsaynïwanmá cayta śhalcachipäculá.
Manchaculcämari śhamü timpucunäćhu amcunap milayniquicuna yaꞌap milaynïcunacta caynu nipäcunanta:
‘Israelcunap Tayta Diosninwan manam imapis lulapäcunayqui canchu.
25 Am Ruben,
Gad ayllucunapïta Tayta Diosmi Jordan mayuwan laquimälanchic.
Chayurá Tayta Dioswan manañamari imacta lulanayquipis canchu’ nil.
Chaynüpaćh milayniquicuna juchayu canman yaꞌap milaynïcuna Tayta Diosta mana cäsuculcänanpä.
26 “Chay-laycumá cay uycuna patacta śhalcachipäculá,
manamá uycunapächu nï cañaywan uycunapächu.
27 Aśhwanpa yaꞌacunawan amcuna,
jinaman milayninchiccunapis Tayta Diosllacta chuya carpanćhu sirbishanchicta yalpachimänanchicpämi canꞌa.
Chayćha milaynïcunapis allin cawsaśhanpi,
uycunapä,
cañaywan uycunapä cäcunätapis Tayta Diosman uycälinꞌa.
Chaynüpaćh milayniquicuna manaña milaynïcunacta ninꞌachu:
‘Tayta Dioswan manam imacta lulanayquipis canchu’ nil.
28 Chaynu yaꞌacunacta ütac milaynïcunacta nipämaptinꞌa nipäcümanćha:
‘Awquillücuna Tayta Diospa uycuna patacnintanüllam cayćhu śhalcachipäculá.
Manam uycunapächu nï cañaywan uycunapächu,
sinuꞌa amcunawan yaꞌacuna jucllay Tayta Diosllacta alawaśhanchicta yaćhanapämari’ nil.
29 Chayurá cayta śhalcachishäwan manamá Tayta Diospa cuntranchu śhalcuyalcá nïtac japächacuyalcäpischu.
Ñatac Tayta Diospa chuya carpanpa puncunćhu uycuna patac cayaptinꞌa,
¿imapäñamá uycunapä,
cañaywan uycunapäpis juc lädućhu uycuna patacta lulayalcäman?”
nil.
30 Chaynu Ruben,
Gad ćhawpi ayllu Manases limapäcuśhanta uyalilmi sasirdüti Finees,
ayllucunap puydïnincunapis allinpä licaycälila.
31 Chaymi paycunacta nin:
“Cananmi yaćhaycú Tayta Dios yaꞌanchicwan caśhanta.
Tantiapacümi Tayta Diosta mana jalutaculcäśhayquita.
Chayurá Tayta Diospa mućhuchicuyninpi lluy-lluytam salbaycälimanqui” nil.
32 Chaypïtam sasirdüti Eleazarpa chulin Fineeswan ayllucunap puydïnincuna Galaad lädućhu cä Ruben,
Gad ayllucunäta caćhaycälälila.
Chaypïta Canaan malcacta cutil Israel-masincunacta willaycapämula.
33 Israel caśhta-masincunañatacmi willaycuśhancäta allinpä ćhasquiycälil Tayta Diosta alawapäcula.
Chaymi pilyaytapis nï malcanta camacaypïpis manaña mastá limapäculañachu.
34 Ruben,
Gad ayllucunäñatacmi chay uycuna patac śhalcachipäcuśhanta “Licänin” nïwan śhutichälälila.
Chaynüta nipäcula:
“Amcunawan yaꞌacuna jucllay Tayta Diosllacta alawaśhanchicta caymi yalpachimänanchicpä cayan” nil.