Mandacü Jabintawan yanapänin malcacunätam Josue llallin
11
Chay pasaśhancunacta Hazorpa mandacünin Jabin yaćhälulmi Madon lädup mandacünin Jobabta,
Simronpa,
Acsafpa mandacünincunactapis ayächin.
2 Chaynütacmi nurti lädu ulꞌucunäćhu,
Arabatpa sur lädu Cineretćhu,
inti jiꞌalpunan lädu Dora lädućhu,
pampacunäćhu cäcunäpa mandacünincunactapis ayächimun.
3 Chaynütacmi inti ishpimunan lädupïta,
inti jiꞌalpunan läducama Canaan lädu cäcunäta ayächimula:
Amhor,
Het,
Ferez,
ulꞌucunäćhu cä Jebus läducunätapis,
chaynütac Mizpaćhu Hermon ulꞌup wätancunaćhu cä Hev läducunätapis ayächimula.
4 Lluy paycunam pilyänincunawan,
cawalluncunawan,
gïrrapä carritancunawan-cama yalülälin.
Paycuna lamarcäćhu awishquinümi achca-achca caculcäla.
5 Paycunamari jucllachanacaycälil Merom mayup sircascanćhu ćhulanacälälila Israel caśhtacunäwan pilyapäcunanpä.
6 Chayćhümi Josueta Tayta Dios nin:
“Ama manchacuychu,
cay üranu wala muyunmi israelcunap maquinman wañüśhactaña ćhulaycamuśhä.
Jinaptïmi amcunañatac cawalluncunap ancunta cuchülälinqui,
carritancunactapis cañaycälälinqui” nil.
7 Chaynu niptinmi Josue pilyänincunawan liculcal Merom mayup sircanćhu ćhïnicünincuna cayalcäta talilcul mana musyacüta allacaycälin.
8 Chayćhümi israelcunäpa maquinman Tayta Dios ćhulaycüla.
Chaymi llallilcul atipäcula jatun Sidonb läducama,
Misrefot-maimcama,
chaynütac inti ishpimunan lädumanꞌa Mizpap pampancama.
Mana jucllactapis cawsayniyüta caćhayculmari lluyta wañüchila.
9 Josueñatacmi Tayta Dios nishantanülla lulaycula:
ćhïnicünincunap cawallunpa ancuncunactam cuchüla,
carritancunactapis cañaycülam.
10 Cutimuyninćhüñatacmi Hazorta duyñuchacuycul mandacüninta ispädawan wañüchila.
Hazor malcam chay malcacunap puydïnin cacula.
11 Lluy cawsayniyücunätam israelcunaca ispädawan wañüchila.
Chay Hazor malcaćhu lluy imapis cäcunäta camacayculmari cañaycüla.
12 Chay mandacücunäpa puydï malcancunactam Josue duyñuchacuycula.
Mandacünincunactañatacmi ispädawan camacaycüla.
Chaynüpam Tayta Diospa uywaynin Moises nishanta Josue lulaycula.
13 Ñatac ulꞌucunäćhu cä malcacunätá israelcunaca manam cañaycapäculachu;
aśhwanpa Hazor malcällactamari cañaycälälila.
14 Jinalculmi chay malcacunäpa uywancunactawan imapis cänincunacta duyñuchacaycälila.
Lluy nunancunactam ichá jucllactapis mana caćhaycul ispädawan camacaycüla.
Moises nishantanüllamari Josue lulaycun
15 Ñatac Tayta Dios uywaynin Moisesta nishannüllamari Moisespis Josueta nila.
Josueñatacmi Tayta Dios Moisesman nishantanülla lluy-lluyta lulaycula.
16 Josuemi duyñuchacuycula:
ulꞌucunäćhu,
Neguevćhu,
Gosenćhu,
pampacunäćhu,
Araba pampacunäćhu,
Israelpa ulꞌuncunaćhu pampancunaćhu lluy cäcunätapis.
17 Chaynütacmi duyñuchacuycula Seir lädupi lï Halac ulꞌucunäpi aśhta Libanop pampanćhu Baal-gaadcama,
Hermon ulꞌup wätancama.
Cay malcacunäpa mandacünincunactam Josue chalalcul wañüchila.
18 Chay mandacücunäwan Josue achca timpum pilyayćhu capäcula.
19 Ñatac jawca cawsapäcunanpä Gabaonćhuc yaćhä Hev läducunämari Israel läducunäwan limanaculcäla.
Juc malcacunätam ichá llallilcul camacaycüla.
20 Chay ćhïnicü malcacunap śhunꞌunta quiquin Tayta Diosmi lumiyächila israelcunäpa cuntran śhalcapäcunanpä.
Jinaptinmi israelcunaca mana llaquipaycul camacaycälälila Moisesta camachishanmannu.d
21 Chay timputacmi Josue camacaycüla Anac caśhtacunäta,
Hebron ulꞌüćhu,
Debirćhu,
Anabćhu cäcunäta,
Juda ayllu yaćhanan ulꞌüćhu cäcunäta,
chaynütac israelcuna yaćhanan cä ulꞌucunäćhu cäcunätapis.
Lluy paycunacta malcantinta-camamari Josue camacaycüla.e
22 Israelcunaca duyñuchacuśhan allpaćhu manam jucllay Anac caśhtallapis quïdayculachu.
Aśhwanpa Gaza,
Gat,
Asdod malcacunällaćhüñam puchula.f
23 Tayta Dios Moisesman nishanmannüllamari Josue lluy malcacunäta,
allpacunäta duyñuchacuycula.
Chay allpacunätam Israel caśhtacunäman ayllunpa-cama tücachila.
Chaynüpamari allpaca pilyaycunapi jamaycula.