Gilgalćhümi umri cayninćhu Israel caśhtacunäta siñalan
5
Inti jiꞌalpunan lädućhu cä Amhor läducunäpä puydïnincuna,
Mediterraneo lamarpa sircanćhu cä Canaan läducunäpa mandacünincunapis yaćhälälilam israelcunäpa Tayta Diosnin Jordan mayucta chaquichishanta.
Chaynu chaquillaćhu pasapämuśhanta yaćhälälilmari ćhinaśhyälälil pilyapäcunanpäpis chucchucuyalcälaña.
2 Chay timpućhümi Tayta Dios Josueta nin:
“Lumipïta cuchillucta lulalcul ipa wiñay Israel caśhtacunäta umri cayninćhu siñalay” nil.
3 Niptinmi Josue cuchillucta lulaycul Aralot ulꞌüćhu ipa wiñay Israel caśhtacunäta umri cayninćhu siñaläla.
4 Chaynu siñaläla Egipto malcäpïta yalamü pilyä wayapacunaca chunyä ulꞌu śhamuśhancunäćhu lluy wañuculcaptinmi.
5 Masqui Egiptopi yalamücunaca umri cayninćhu siñaläśha cayalcaptinpis chunyä ulꞌu śhamuśhancunäćhu näsïcunacá manamá siñalaśhachu cala.
6 Tayta Diosmi awquilluncunacta limalicula tuqui-tuquicta wayuycachï allpacta uycälinanpä.
Ñatac Egiptopi yalamü Israel caśhtacunaca mana cäsuculcaptinmi limalicula chay allpacta manaña licapäcunanpä.
Chaymi chunyäcäćhu tawa ćhunca (40) wata taplaycaćhapäcula lluy pilyä wayapacunaca wañuculcänancama.a
7 Chaynüpamari Josue siñaläla chay nunacunäpä chulincunacta.
Wañü taytancunap pudirnin cananpämari Tayta Dios ćhulala.
Paycuna chunyäcäćhu puliyalcalmá mana siñalaśhachu capäcula.b
8 Chaynu umri cayninćhu siñaläläliptinmi chay jamapäcuśhallanćhu capäcula lluy allinyapäcunancama.
9 Chayćhümi Tayta Dios Josueta nin:
“Cay siñalacuywanmi Egiptop uywaynin pinꞌay capäcuśhayquita wicapälú” nil.
Chaymi chay sityuca canancamapis Gilgalc nisha.
10 Chay Gilgalćhümi Israel caśhtacunaca jamapäcula.
Chayćhümi allaycuy quillaćhu,
ćhunca tawayu (14) muyun tardi Jerico pampaćhu lulapäcula Egiptopi Libraculcäśhan Fistacta.d
11 Chay fista muyun camacäluptinmi walantinta micapäcula talpuycunapïta:
mana libadürayu tantacta,
trïgu ancaytapis.
12 Chay muyunpïtam “Maná”e nishan micuy manaña calañachu.
Chaymi Israel malcaćhu talpuycunapïtaña micapäcula.
Tayta Diospa cachacuncunap puydïninwanmi Josue tincun
13 Chaynu Jerico malcap sircanćhu cayalmi Josue licalcuśhanćhu ñawpäninćhu licälun juc nuna ispädan chalacüśha cayäta.
Chaymi aśhuycul Josue nin:
“¿Yaꞌacuna partichun cayanqui icha ćhïnicüní partichun?”
nil.
14 Niptinmi:
“Má,
Tayta Diospa cachacuncunap puydïninpämi yaꞌa śhamú” nin.
Niptinmi Josue pampäcama uyshucuycul nin:
“Taytallay,
¿cay uyway nunallayquita imallactatan niycamanqui?”
nil.
15 Niptinmi Tayta Diospa cachacuncunap puydïninca nin:
“Śhucuyniquita julucuy.
Chay allpa jaluśhayquica chuyam” nil.
Niptinmi chay nishantanülla Josue lulala.