Jordan mayuctam chimpapäcun
3
Chay walantinmi wäla-wälalla Josue lluy Israel caśhtacunäwan Sitim lädupïta yalapäcula Jordan mayuman.
Ñatac manaläpis chimpapäculmi mayu pantanćhu jamapäcula.
2 Quimsa muyunpïtañatacmi lluy puydïcunaca jamapäcuśhancunäta muyupämula,
3 jinantin malcäta caynu nishtin:
“Tayta Diospa limalicuśhan babulta Levi ayllu sasirdüticunaca apapäcuśhanta licalmi chay capäcuśhayquipi yalapämunqui ipanta atipäcunayquipä.a
4 Chaymi yaćhapäcunqui maypa lipäcunayquipäpis.
Chay caminup manamari imaypis pulipäculanquichu.
Ñatac babulcäman ancha amam aśhuycapäcunquichu;
sinuꞌa isun paćhac (900) mitru calu ipantam atipäcunqui” nil.
5 Chaypïta Josuemi jinantin malcäta nin:
“Wala muyunmi Tayta Dios sumä milagrucunacta amcunaćhu lulaycunꞌa.
Chaymi chuyanchaculcänayqui” nil.
6 Chaynütacmi sasirdüticunätapis nin:
“Limalicuśhan babulcäta apaculcul malcap puntanta ñawpapäcuy” nil.
Niptinmi sasirdüticunaca babulcäta apaculcul malcap puntanta ñawpapäcula.
7 Tayta Diosñatacmi Josueta nin:
“Cananpi-pacham jinantin Israelwan sumä allinpä licachiyta allaycuśhayqui.
Chaynüpaćh Moiseswan caśhänu amwanpis caśhäta yaćhapäcunꞌa.
8 Amñatacmi limalicuśhá babul apä sasirdüticunäta ninqui:
‘Jordan mayup patanman ćhaycälilmi yacućhu śhaycaycälinqui’ ” nil.
9 Josueñatacmi Israel caśhtacunäta nin:
“Aśhuycapämuy;
Tayta Dios nipäcuśhunayquita uyalipäcuy.
10 Cananmi yaćhapäcunqui cawsä Tayta Dios amcunawan caśhanta.
Jinaman ampa puntayquipi Canaan,
Het,
Hev,
Ferez läducuna,
Gerges,
Amhor,
Jebus läducunäta alapacuśhantapis yaćhapäcunquitacmi.
11 Chaynüpam sumä munayniyu Tayta Diospa limalicuśhan babulca amcunap puntayquita Jordan mayucta chimpanꞌa.
12 Chaypämi ćhunca ishcayniyu (12) Israel ayllucunäpi juc wayapacta-cama aclapäcunqui.
13 Cay pachäćhu sumä munayniyu Tayta Diospa limalicuśhan babulcäta apä sasirdüticunaca Jordan mayüman jaluycäliptinmi mayuca wicman cayman laquicacülunꞌa.
Chaymi janapi śhamü yacuca śhaycülul pilanu ulꞌunpalcüśha quïdanꞌa” nil.
14 Chaypïtam jinantin malcaca Jordan mayucta chimpapäcunanpä jamapäcuśhancunapi yalapämula.
Paycunap calu puntantam limalicuśhan babulcäta sasirdüticunaca ñawpachipäcula.
15 Má,
Jordan mayuca cusicha timpućhu juntälulmi patancunapña lï cala.
Chaynu cayaptinpis babulta apä sasirdüticunaca Jordan mayućhu yacüman jaluycüluptinmi,
16 janapaypï śhamü yacuca lluy śhaycüla.
Saretan lädućhu cä Adam malcap dirichunćhüla śhaycülulmari ućhacacüla.
Yacu pasäcäñatacmi chaquinancama Puchucü Lamarcäman jiꞌacuycula.
Chaynüpa yacuca laquicacüluptinmi Israel caśhtacunaca Jerico malca läduman chimpapäcula.
17 Tayta Diospa limalicuśhan babulta apä sasirdüticunaca mayup ćhawpin chaquillaćhu śhaycapacaycäliptinmi jinantin Israel malcaca chaquillanpa lluy chimpapäcula.