4 “Sïchuśh malca-masiquip aśhnun ütac wäcan caminüćhu cućhpäluptin śhalcachïshïluy.

Amari upatucuycuychu.^a

5 “Chaynütacmi wayapacunaca walmip müdananwan ama müdaculcanꞌachu;

nïtac walmicunäpis wayapap müdananwan müdaculcanmanchu.

Chaynu müdacücunäta Tayta Diosniqui millachicunmari.

6 “Sïchuśh puliyal jaćhäćhu ütac pampäćhu ishnacta talïluptiqui,

luntunta ütac mallwanta maman üllalayaptin amari mallwäta mamantinta apaychu.

7 Mallwällacta apacul mamantá caćhaycüluy.

Chaynüpaćh achca wata cawsal cushisha canqui.

8 “Mayanpis muśhü wasicta lulalꞌa altuśhninpa lluy muyülïninta atajananpä pilanquim.

Jinaptiquim manaña mayanpis palpunꞌachu,

ni wañunꞌachu.

Chayćha lluy aylluyquipis wañuypïta manaña juchachäśhañachu canꞌa.

9 “Mayanniquipis üba ćhaclayquiman amam juccunactá talpupäcunquichu.

Chaynu lulälulꞌa,

chay talpuśhayquicunätawan üba lantayquicunacta Tayta Diosllapäñam japächapäcunqui.

10 “Amamá wäcactawan aśhnucta mataycachil äranquichu.

11 “Amatacmi lïnuctawan millwacta jucllachaycul luläśha müdanawan müdacunquichu.^b

12 “Müdanayquip tawan isquinanćhümi shallshi-sallshinta lulanqui.^c

13 “Sïchuśh juc umri walmiwan casaracülul puñupäcunꞌa;

chaypïta manaña munätucuyninwan,

14 yanꞌal tumpanꞌa:

‘Cay walmiwan puñuyculmi tantialú umricta lisïña caśhanta’ nil.

15 Chaynu captin wamläpa maman taytanñatacmi malcap puncunćhu cä yaśhacunäman umricta manalä lisï camalachicunta apaculcul lipäcunꞌa.

16 Chayćhümi wamlap taytan yaśhacunäta nipäcunꞌa:

‘Walmi chulïta cay umriwan casarächiptïmi canan mana allinpaña lican.

17 Jinalmi pinꞌayman ćhulayninwan liman:

“Cay chuliqui umricta lisïñam caña” nil.

Ñatac cayꞌari umricta rasunpa manalä lisï camalachicunta licapäcuy’ nil.

Chaynu taytancuna nilculmi malcap yaśhancunacta puñupäcuśhan säbanacta licachipäcunꞌa.

18 Niptinmi malcap yaśhancuna chay umricta chalalcälil lawćhälälinꞌa.

19 Jinaman umricta manalä lisï Israel caśhta wamlacta pinꞌayman ćhulaśhanpïtam wamlap taytancunaman paćhac (100) illayta päganꞌa.

Jinalcul walminpïta manam laquicunmanchu;

aśhwanpam cawsaśhancama cusca capäcunꞌa.

20 “Ñatac umricta lisï wamla rasunpa captinꞌa,

21 taytanpa wasin puncunman jululculmi malcaca tamshaywan wañülächinꞌa.

Caynu lulaśha canꞌa Israel malcaćhu millachicuyta lulaśhanpam,

jinaman taytanpa wasinćhu ipanchaśhanpam.

Chaynüpamari amcunaćhu cä mana allincäta chincachipäcunqui.^d

22 “Chaynütac wayapayu walmiwan juc umri puñuyal talichicülulꞌa pulanmi wañuchisha capäcunꞌa.

Umrïpis walmïpis wañuchishamari capäcunꞌa.

Chaynüpam Israel caśhtacunäćhu cä mana allincäta chincachipäcunqui.

23 “Sïchuśh umricta manalä lisï wamla casaraculcänanpä limaśha cayal,

juc umriwan puñüläliptinꞌa,

24 malcap puncunmnan puśhalculmi tamshaywan pulan wañuchisha capäcunꞌa;^e

wamlaca malcaćhu cä nunacunäta yanapänanpä mana ayaśhanpïta;

umrïñatac malca-masinpa limay-masinta pinꞌayman ćhulaśhanpïta.

Chaynüpamari amcunapïta mana allincäta chincachipäcunqui.

25 “Sïchuśh limay-masiyu cä wamla ćhaclaćhu cayaptin juc umri talilcul firsäluptinꞌa,

chay firsä umrillam wañuchisha canꞌa.

26 Ñatac wamlaca juchacta mana lulaśhanpïtam mana wañuchishachu canꞌa.

Cay lulay cayan nuna-masinta wañuchishannümari.

27 Chay wamlaca ćhacläćhu japallan cayäta umrica talïluptin wamlaca maynu apalcaćhaptinpis manamá mayan salbaycüninpis calachu.

28 “Sïchuśh umricta manalä lisï,

mana limay-masiyu cä wamlawan juc umri unꞌaypi tincülul mana munayäta awnilcachil puñuyalcäta talichicülulꞌa,

29 wamläpa taytantam umrica päganꞌa picha ćhunca (50) illayta.

Jinaman wamläta pinꞌayman ćhulaśhanpam casaranꞌaña.

Jinalcul wañunancama manañamari laquinacunmanñachu.^f

30 “Manatacmá mayanpis papäninpa walminwan canmanchu.

Chaynu lulalꞌa papänintam jalutacuyan.^g