Mänu caśhancunacta pampachanacunan watapïmi nin
15
“Imaymana mänup shipuchicüśhacunätam anćhish watapi-cama pampachapäcunqui.a
2 Caynüpam pampachapäcunqui:
mayanpis imactapis mañäcämi mañacüninta pampachanꞌa.
Chay mañaśhanta wawꞌi-caśhan captinpis,
ütac malca-masin captinpis manañam mañanꞌañachu,
Tayta Dios pampachaycuna wata cananpä camachishan-laycu.
3 Amcunaćhu yaćhä juc caśhtacunätam ichá cutiycachishunayquipä jicutapäcunqui.
Malca-masiquitañatacmi imacta mañaycuśhayquitapis pampachaycunquiña.
4 Chaynüpam amcunaćhu manaña wacchacuna canꞌañachu.
Chay tücäniquipä uycuśhuśhayqui allpäćhu quiquin Tayta Diosniquimari allicta camaycachishunqui.
5 Chaynu caycunꞌa canan camachishäcunacta sumäta uyaliculcal lulayman lluy ćhulapäcuptiquimari.
6 Tayta Diosniquiꞌa limalicuśhanmannümi allinpä licaycälishunqui.
Chaymi achca malcacunamanpis mañanayquipä canꞌa;
amñatacmi ichá mañapacuyta ama ashiyanquichu.
Achca nasyuncunactamari maquillayquićhu caycachinqui;
amtañatacmi ichá mayanllanpis munayninćhu mana cachipäcuśhunquichu.
7 “Tayta Diosniqui uycuśhuśhayqui allpäćhu mayannin malcaćhüpis malca-masiqui waccha captinꞌa ama lumi śhunꞌu caychu nïtac cućhcuśhyayaychu.
8 Aśhwanpa llaquipaycul pishipacuśhanta mañaycuy.b
9 Ñatac śhunꞌuyquićhu ama cayächunchu:
‘Mänucta pampachaycuna anćhish wataca cayllaćhüñam cacuyan’ niycuna.
Chaynu nilꞌa waccha malca-masiquicunacta mana allinpä licalmi imallactapis mana mañapäcunquichu.
Jinaptiquićh amcunap cuntrayqui Tayta Diosta mañacuptin juchayüña canqui.
10 Ama cućhcuśhyayaychu,
aśhwanpa llaquipayniyu caycuy.
Chayćha Tayta Diosniqui ima ayca lulaśhayquićhüpis allinpä licaycuśhunqui.
11 Cay pachäćhu waccha nunacuna imaypis caycälinꞌamá.c
Chaymi malca-masiquicunawan,
wacchacunäwan,
pishipacücunäwan mićha mana caycälinayquipä niycuc.
Uyway nunacta libri caćhaycunan watapïmi nin
12 “Sïchuśh walmi ütac wayapa Israel caśhta-masiqui uywayniqui cananpä quiquinta lanticüśhüptiquiꞌad süta watam sirbichicunqui;
anćhish watäćhüñatacmi ichá libricta caćhaycülunqui.
13 Libricta caćhaycülulꞌa amam cala maquillactá caćhaycunquichu.
14 Aśhwanpam uywayquicunapïta,
cusichayquicunapïta,
bïnuyquicunapïta uycälinqui.
Tayta Dios uycuśhuśhayquimannümari uycälinqui.
15 Egipto malcaćhu uyway nuna cayalcaptiqui Tayta Diosniqui juluycuśhuśhayquitari amcunapis yalpapäcuy.
Chaymi caycunacta niycuc.
16 “Ñatac uyway nunayqui amćhu allin cayal:
‘Ampis lluy aylluyquipis śhunꞌupänu captinmi mana caćhaycuśhayquichu’ nishuptiquiꞌa,
17 alishnacta apticulcul wasip puncunman arimaycul linlinta alishnawan ućhcülälinqui.
Chaynüpam wiña-wiñaypäña uywayniqui caycunꞌa.
Chaynüllamari walmi uywayniquiwanpis lulaycälinqui.
18 Chayurá uyway nunayquicunacta libri cananpä caćhaycul ama llaquiculcaychu.
Lulapacücäpa parti pägullanpämi payꞌa süta watantin sirbishulanqui.
Chaynu lulaycäliptiquiꞌa Tayta Diosniquim ima lulaśhayquicunaćhüpis allinpä licaycälishunqui.
Uywancunap wamä wawinta japächapäcunanpämi nin
19 “Lluy wäcayquicunapïta,
uwishniquicunapïta wamä ulu wawinta Tayta Diosniquipämi japächapäcunqui.e
“Chay wäcayquip wamä wawinwan amam ärapäcunquichu,
nïtac uwishniquip wamä wawinpa millwantapis lutupäcunquichu.
20 Tayta Diosniqui yaćhananpä japächaśhan sityućhu watan-watanmi lluy aylluyquicunawan micapäcunqui.
21 Sïchuśh chay uywacunäćhu wishtu,
apla,
ima mana allinniyüpis captinꞌa Tayta Diosniquiman amam uycälinquichu.
22 Ñatac malcayquićhu uywacta wañulcachil aychanta micapäcunquimanmi.
Chay aychacta chuyanchacüśha ütac mana chuyanchacüśha cayalcalpis lluymi micapäcunquiman luychup ütac tarucap aychantanüpis.
23 Ñatac yawarnintá amam micapäcunquichu,f
aśhwanpa yacuctanu pampäman jićhaycälälinqui.