3 “Sïchuśh taytanpa maquillanćhüla cawsä wamla Tayta Diosman limalicüluptin ütac imactapis lulananpä limalicüluptin,

4 chay limalicuśhanta taytan yaćhayal imactapis mana niptinꞌa,

wamlaca limalicuśhanmannümi lulaycunan.

5 Ñatac taytan yaćhälul lulananpä mana munaptinꞌa ima limalicuśhantapis wamlaca manam lulananñachu.

Chaynu taytan mana munayaptinmari Tayta Diospis manaña jicutanꞌachu.

6 “Sïchuśh juc wamla Tayta Diosman limalicuyal ütac tuquicta mana tantiacuycul ima lulananpäpis limalicuyal casaracülunꞌa,

7 chayta wayapan yaćhälul imactapis mana niptinꞌa,

chay limalicuśhanta walmica lulaycunanmi.

8 Ñatac wayapan yaćhälul lulananpä mana munaptinꞌa,

tuquicta mana tantiacul limalicuśhantapis wamlaca manam lulananñachu.

Chaynu wayapan mana munayaptinmari Tayta Diospis manaña jicutanꞌachu.

9 “Ñatac japanyäśha ütac laquinacüśha walmica ima limalicuśhantapis lulaycunanmi.

10 “Sïchuśh casädu walmi wayapanpa wasinćhu cayal ima lulananpäpis imactapis śhaycaycachil limalicülunꞌa,

11 chayta wayapan yaćhälul upällacuycul imactapis mana niptinꞌa chay walmica ima limalicuśhantapis lulaycunanmi.

12 Ñatac wayapan yaćhälul lulananpä mana munaptinꞌa,

tuquicta mana tantiacul limalicuśhantapis walmica manam lulananñachu.

Chaynu wayapan mana munayaptinmari Tayta Diospis manaña jicutanꞌachu.

13 “Walmica ima lulananpäpis ütac ayunananpäpis limalicuśhanta wayapanmi ‘aw’ ninan ütac ‘manam’ ninanpis.

14 Ñatac wayapan yaćhälul achca muyunña pasayaptinpis chay limalicuśhanpi imactapis mana niptinꞌa ‘aw’ niyanñamari.

Chay upälla caśhanmi lluy limalicuśhancunäta tacyalpayächin.

15 Sïchuśh yaćhälul-pachalla mana manalcachilꞌa walminpa juchanta payñam apanꞌa” nil.

16 Caycunactamari quiquin Tayta Dios Moisesman camachila,

walmi-cari,

chaynütac wamla chulin taytanpa wasillanćhüla cäcäpis imanuy lulapäcunanpäpis.