24
Israel caśhtacunaca Tayta Dios allin capäcunanpä niycunanta Balaam yaćhälulmi manaña punta lishancunanüñachu Tayta Dios nishanta uyalï lila.
Aśhwanpa chunyä läduman licapayalñam quïdälun.
2 Chayćhu Israel caśhtacunaca ayllunpa-cama jamayalcäta licäluptinmi Tayta Diospa Ispiritun Balaamman pudiracuycula.
3 Chaymi Balaam willacula caynu nil:
“Cayꞌa,
Beorpa chulin Balaampa willacuyninmi;
imacunactapis sumä licäcäpa nishanmi.
4 Tayta Diospa nishancunacta uyalïcämari nin;
sumä munayniyüca licachishancäta
cućhpäśha cayalpis licäcämi nin.
5 ¡Jacob,
maynu tuquim chucllayquicuna!
¡Israel,
sumä allinmi jamapäcuśhayquicunaca!
6 Amcuna mayu chutaläcänümi cayalcanqui;
mayu patanćhu wirtanümi,
Tayta Diospa lantaśhan aloe waytacunänümi,
yacu patanćhu cä cedrocunänümari cayalcanqui.
7 Israel caśhtacunaca yacup janallanćhümi cayalcan;
talpuynincunactapis yacu manamari pishiycunchu.
Mandacüninpis Agagpïta sumä mas munayniyümá;
mandacüninpa gubirnun jatu-jatunmá.
8 Egiptopïta julaycamuśhan Tayta Diospa callpan
munti wäcapnümá sumä-sumä.
Ćhïnicünin malcacunäta millpacalpunmá;
tulluncunactapis ñutuy-ñutuytam lulälun.
Flïchancunawanmari camacaycälälin.
9 Liyunnümá uyshucuycun;
ćhina liyunnümá jitalacuycunpis.
¿Mayantá lichcaycachinman?a
¡Allin canayquipä allinta niycuśhuśhayquica
allin caycuchun!
¡Mana allin canayquipä niycuśhuśhayquica
mana allintac caycuchun!”b
nin.
Balacmi sumä piñacüśha cayan
10 Caynu Balaam nishanta Balac uyalïlulmi anchapta piñacülun.
Jinalmi maquintapis tacapacuśhtin nicuyan:
“¡Cay ćhïnicünïcuna mana allin capäcunanpä niycunayquipätan yaꞌa ayayächimuc!
¡Chaychun amñatac allin capäcunanpä quimsa cutiña niycuyanquiman!
11 ¡Canan,
wasiquita wayra pasay!
Altuman juluycunacpämá limaliculac;
ñatac Tayta Diosmi manalcächin” nil.
12 Niptinmi Balaam nin:
“Manachun willacü caćhamuśhayquita niyá:
13 ‘Masqui Balac jinantin palasyunćhu cä illayninta,
ürunta uycamaptinpis yaꞌa manamá imallactapis lulaycümanchu.
Aśhwanpa Tayta Diospa nimäśhallantamari lulaycuná’ nil.
14 Chayurá malcätañam cuticuśhä.
Ñatac śhamü muyuncunäćhu malcayquita wic malcaca imacta lulapäcuśhunayquitapis niycuśhayquimari” nil.
15 Nilculmi Balaam caynu willacun:
“Cayꞌa,
Beorpa chulin Balaampa willacuyninmi;
imacunactapis sumä licäcäpa nishanmi.
16 Tayta Diospa nishancunacta uyalïcämari nin;
sumä munayniyücäta lisïcämi,
sumä munayniyüca licachishancäta
cućhpäśha cayalpis licäcämi nin.
17 Imam pasananta licayämi,
ñatac calućhu cayätalämi licayá.
Ñawïpis ćhaytá ćhäyächinmi;
ñatac manalämá imapis pasaśhancätanülächu ćhächin.
Jacobpïta uyllurmi yalamunꞌa;
Israelpïta mandacümic śhalcamunꞌa.
Jinalmi Moabpa nunancunacta umaćhu uycülunꞌa;
Setpa lluy chulincunacta camacaycülunꞌa.
18 Edom malcam maquinman palpupäcunꞌa;
ćhïnicünin Seirmi llallïsha canꞌa.
Israel caśhtacunaca äśhalayllaman camanacunactam lulaycälinꞌa.
19 Jacobpïmi sumä munayniyü śhalcamunꞌa;
paymi malcaćhu puchücunäta camacalpunꞌa” nil.
20 Chaypïtam Balaam Amalecta licälul caynu willacula:
“Amalec lluy nasyuncunap umanmi;
ñatac pampaman muyüchisham camacanꞌa” nil.
21 Chaypïta Ceneo nunacunäta licälulmi caynu willacula:
“Yaćhaśhayquica sumä tacyämi,
ishnayqui aꞌacäćhümi cayan.
22 Ñatac Ceneo läducunaca camacaycüśham canꞌa,
Asiria malcam prïsu puśhacunꞌa” nil.
23 Chaypïta Balaam caynümi willacula:
“¡Ay!
¿Mayanćha cawsanꞌa
Tayta Dios caycunacta lulaycuptin?
24 Quitim lädu lamar patanpïmi barcucuna śhamunꞌa.
Asiriactawan Hebertam pulumächinꞌa;
quiquinpis mana caśhanmanmi muyunꞌa” nil.
25 Chaypïtam Balaam malcanta licula.
Mandacü Balacpis cuticulamari.