Aaronpa garutillanmi chillquimun
17
Chaypïtam Moisesta Tayta Dios nin:
2 “Israel caśhtacunäćhu ayllunpi-cama puydïnincuna juc garuticta apapämuchun;
chayurá ćhunca ishcayniyu garuticunam canꞌa.
Amñatacćha chay garuticunäćhu śhutincunacta isquirbinqui.
3 Levi ayllup garutinćhümi Aaronpa śhutinta isquirbinqui.
Ayllunćhu puydïninpa-camamari juc garuti canꞌa.
4 Chaytam tincuna carpaćhu cä limalicuśhan babulpa chinpanman ćhulaycunqui;
amcunawan tincunanchiccämanmari.
5 Aclacuśhäpa garutillantam chillquichimuśhä.
Jinaptïmi puntäćhu Israel caśhtacunaca cuntrayqui manaña limapäcunꞌañachu” nil.
6 Chaynu Moises Israel caśhtacunäta willaptinmi ayllupi puydïcunaca garutinta apapämula;
chayurá ćhunca ishcayniyu (12) garuticunam lluy cala.
Chayćhümari Aaronpa garutinpis cala.
7 Moisesñatacmi Tayta Dios caśhancäman,
limalicuśhan babulcäpa puntanman ćhulaycula.
8 Chay walantinta Sumä Chuya Sityuman Moises yaycunanpämi Levi ayllućhu cä Aaronpa garutillan chillquïmuña;
jinaman mucmümuña,
almendractapis wayümuñämari.
9 Chaypïta Tayta Diospa ñawpäninpi lluy garuticunäta Moises julalcamulmi Israel caśhtacunäpa ñawpäninman ćhulaycula.
Jinaptinmi garutinta-cama apticalcälila.
10 Chaypïtam Moisesta Tayta Dios nin:
“Limalicuśhä babulpa puntanman Aaronpa garutinta caśhan ćhulaycuy.
Chayćha Tayta Diospa cuntran śhalcücunäpä licachipä caycunꞌa.
Chaynüpamari cunträ manaña limayalcal nï wañupäcunꞌañachu” nil.