Tayta Dios Libraycuśhan Fistacta lulananpämi nin
9
Egiptopi yalamuśhanpi juc wata pasäluptin,
allaycunan quilläćhümi Tayta Dios chunyä Sinaićhu Moisesta nin:
2 “Israel caśhtacunaca unanchaśha cä muyunćhümi Tayta Dios Libraycuśhan Fistacta lulapäcunꞌa.
3 Cay quillaćhu ćhunca tawayu (14) muyun tardićhümi lulapäcunꞌa.
Imanuy lulapäcunayquipäpis camachicuyćhu caśhanmannümi lulaycälinqui” nil.
4 Chaymi Israel caśhtacunaca Tayta Dios Libraycuśhan Fistacta lulapäcunanpä Moises nila.
5 Jinaptinmi lulapäcula chunyä Sinai ulꞌućhu allaycuy quillaćhu,
ćhunca tawayu (14) muyun tardićhu.
Moisesta Tayta Dios lluy nishantanüllamari Israel caśhtacunaca lulaycälila.a
6 Ñatac waquinnincuná wañüśhacunacta yataycapäcuśhanpam anla cayalcäla,
chay Libraycuśhan Fistaćhu capäcunanpä.
Chaymi chay muyunlla Moisesman,
Aaronman aśhuycälil nipäcula:
7 “Wañüśhacta yataycapäcuśhäpam anlaña cayalcá.
Chayurá ¿caychun manalcachipämanꞌa juc Israel caśhta-masïcunawan cusca Tayta Diosman uycälinäpä?”
nil.
8 Niptinmi Moises:
“Alcaycäliy,
caycunapïta quiquin Tayta Dios imanuy cananpäpis nimänancama” nin.
9 Niptinmi Moisesta Tayta Dios nin:
10 “Israel caśhtacunäta nimuy:
‘Waquinnincuna ütac milayniquipis wañüśhacta yataycuśhayquiwan anla cayalꞌa ütac juc malcaćhu cayalpis Tayta Dios Libraycuśhan Fistacta lulaycunquimanmi.
11 Ñatac ishcay quillaćhu,
ćhunca tawayu (14) muyun tardim lulapäcunqui.
Aychätañatacmi libadürannä tantactawan,
ćhacćhä jaćhantinta micapäcunqui.
12 Chay walantinpä amam uchuy aychallactapis caćhaycunquichu,
nïtac jucllay tullullantapis paquiycunquipischu.b
Nishanmannüllamari cay Libraycuśhan Fistacta lulaycälinqui.
13 “ ‘Ñatac mayanpis chuya cayal,
ütac malcallanćhu cayalpis Libraycuśhan Fistacta mana lulaptinꞌa,
malcanpïta alapacüśham canꞌa.
Chay nuna Tayta Dios unanchaśhan muyuncäćhu uycunancäta mana uycuśhanpïtamari juchanpa wayuyninta apaycunꞌa.
14 “ ‘Ñatac mana Israel caśhta amcunaćhu yaćhäca Tayta Diosta yalpayninwan Libraycuśhan Fistacta lulayta munalꞌa,
lluy camachishämannüllamari lulaycälinꞌa.
Cay camachicuyllam Israel caśhtapäpis ütac juc lädu malcayücunäpäpis caycunꞌa’ ”c nil.
Carpap janäninmanmi pucutay taycämun
15 Chuya carpacta lluy ishpïlächiptinñatacmi janäninman pucutay ñiticalpula;
tutalpüluptinñatacmi achicämunancama ninanu walala.d
16 Chaynüllam imaypis caycula:
muyunpa pucutayca ñitiläla,
tutapañatacmi suytunpäśha nina waläca cala.
17 Chay pucutayca chuya carpapi pallaculcuptinmi Israel caśhtacunaca jamapäcuśhanpi pasayta allaycapäcula.
Mayćhüpis pucutayca śhaycuśhanćhütacmi śhaycapäcula.
18 Chaynu Tayta Dios niptinmi Israel caśhtacunaca śhaycapäculapis ütac pasapäculapis.
Chay carpap janäninćhu pucutayca mana pallaculcuptinꞌa chayllaćhümi capäcula.
19 Masqui achca muyuncuna carpap janäninćhu pucutayca cacuptinpis Israel caśhtacunaca Tayta Diosta cäsuculcalmi chayllaćhu capäcula.
20 Chaynütacmi pucutayca ash timpulla carpa janäninćhu caycuptinpis Tayta Dios niycuśhanmannu śhaycaycälilapis ütac lipäculapis.
21 Abisnintá pucutayca juc tutalla cayculpis walantinta pallaculcuptinꞌa pasapäcümi cala.
Chaynüpam tutapapis ütac muyunpapis pallaculcuptinꞌa pasapäcü cala.
22 Masqui pucutayca carpap janäninćhu ishcay muyun,
ütac juc quilla,
ütac wata cacuptinpis Israel caśhtacunaca chayllaćhümi quïdapäcula;
manamari pasapäculachu.
Ñatac pallacalcuptinmi ichá pasapäcula.
23 Chaynu Tayta Dios camaycachiptinmi Israel caśhtacunaca lipäculapis ütac śhaycapäculapis.
Tayta Dios Moisespacama camachishanmannümari lluy lulaycälila.