Sasirdüticunaca imanuypa chuya caycälinanpämi nin
21
Chaypïtam Moisesta Tayta Dios nin:
“Aaronpa milaynincuna sasirdüticunäta nimuy:
Wañüśha malca-masinta yataycuyninwan ama anlacuyalcächunchu.
2 Yatayculꞌa yataycunman mamanta,
taytanta,
wawꞌi-caśhanta ütac chulintam.
3 Chaynütac umricta manalä lisï panillantam,
mana wayapan caśhan-laycu yataycunman.
Chaycunallawanmi sasirdütica anlapä licaśha canman.
4 Sasirdütica walminpa jucnin ayllun wañüluptin ayaman ama aśhuycuchunchu;
aśhuycüluptinꞌa millachicuy anlapämi licaśha canꞌa.
5 Amam ächanta siplay-siplayta lutucunꞌachu,
nïtac śhaplantapis cuchucunꞌachu,
nïtac aychantapis cuchucunꞌatacchu.a
6 Paycuna japächaśha chuya caśhanpam Tayta Diosta mana jalutaculcanmanchu.
Paycuna Tayta Diospa micunanta cañaywan uycüca cayalcalmi chuya caycälinan.
7 “Sasirdütica Tayta Diosllapä japächäśha calmi mana casaracunmanchu waticawan,
jitanacüśhawan nïtac firsäśhawanpis.
8 Chaynu Tayta Diosman micuycäta uycuśhan-laycum japächäśha caycälinꞌa.
Paycuna chuya caycälinꞌa amcunacta chuyanchä yaꞌa Tayta Diosniqui chuya caśhäpamari.
9 “Chaynütac sasirdütip wamla chulin waticacuyta allayculꞌa taytantamari jalutacuyan.
Chaymi cawsayäta cañäśha canꞌa.
10 “Mayanpis wawꞌi-caśhancunapi puydï sasirdütipa japächaycuśha cäcämi,
japächaycunapä cä asaytiwan umanman llusiycuśha cala.
Jinaman chuya müdanacunawan müdacunanpämi japächäśha cala.
Chaymi ächanta mana ñächacuśhä nï canmanchu,
nïtac müdanantapis laćhyanmanchu.
11 Amatacmi wañüśha cäcämanꞌa maymanpis yaycunꞌachu.
Manamari taytan ütac maman wañüśhawanpis anlaman muyuchicunꞌachu.
12 Amatacmi carpapi yalamunꞌachu nïtac Tayta Diosninpä Chuya Sityuntapis millachicuyman ćhulanꞌachu.
Payꞌa yaꞌallapäña japächäśha cayan umanman japächanapä cä asaytiwan llusiycuśha caśhanpam.
Yaꞌa Tayta Diosniquimari cayá.
13 “Casaracunꞌa umricta manalä lisï wamlawanmi.
14 Amam japanyäśhawan,
nï jitanacüśhawan,
nï firsäśhawan,
nïtac waticawanb casaracunꞌachu.
Sinuꞌa caśhta-masinpi umricta manalä lisï wamlawanmi casaracunꞌa.
15 Amam milaynincunacta millachicuy anlaman malcanćhu muyuchinꞌachu.
Yaꞌa Tayta Diosniquimari chuyanchäca cayá” nil.
Mayancuna sasirdüti mana cananpämi nin
16 Chaypïtam Moisesta Tayta Dios nin:
17 “Aaronta cayta nimuy:
Milayniquicuna aychanćhu ima mana allinniyu cäcunaca uycuna micuyta Tayta Diosman manam uycunmanchu.
18 Manamari aychanćhu ima mana allinniyu cä wayapa aśhuycunmanchu:
aplacuna,
wishtucuna,
cutüśhacuna,
wiscucuna,
19 ćhaquin ütac maquin paquïshacuna,
20 curcucuna,
pućhucuna,
ñawin ñibïshacuna,
sarnayücuna,
sacsayniyücuna,
nïtac luntun dañäduśhacunäpis aśhuycunmanchu.
21 Manamari sasirdüti Aaronpa mayannin milayllanpis ima mana allinniyuꞌa Tayta Diosman cañaywan uycunancäta uycü aśhuycunmanchu.
Chaynu mana allin calmi micuyta uycüllapis mana aśhuycunmanchu.
22 Ñatac uycamäśhan micuypi,
sasirdütïpa lluy japächaycuśha chuyannin cäcunäpïtam ichá micunman.
23 Chay mana allinniyücunaca Chuya Sityucta millachicuy anlaman mana muyuchinanpämi curtïnap ipanman mana pasaycunꞌañachu,
nïtac uycuna patacmanpis aśhuycunꞌañachu.
Yaꞌa Tayta Diosmari chuya capäcunanpä japächaycú” nil.
24 Cay nishancunätamari Moises niycula Aaronman,
lluy milaynincunaman,
jinaman jinantin Israel caśhtacunämanpis.