Allincunällacta tincüninman lulaycälinanpämi nin
19
Chaypïtam Moisesta Tayta Dios nin:
2 “Lluy Israel caśhtacunäta cayta niycuy:
Yaꞌa Tayta Diosniqui chuya caśhä-laycu amcunapis chuya caycäliy.a
3 “Mamayquita taytayquita manchacuywan licaycälinqui.b
“Jamana muyuncäćhüpis jamapäcunquim.
Yaꞌamari Tayta Diosniqui cayá.c
4 “Ama taytachacunäman cutiyalcaychu nïtac jïrrupi taytachacunacta lulacuyalcaychu.d
Yaꞌamari Tayta Diosniqui cayá.
5 “Chaynütac allin cawsaśhanpi Tayta Diosta uyculꞌa paypa śhunꞌunpänu lulaycäliy.
6 Chay uycuśhan uywap aychanta chay muyunllam ütac walantillantam micapäcunqui.
Quimsa muyunyänantá cañaycüśhañam canꞌa.
7 Sïchuśh quimsa muyunyänanta micäläliptiquiꞌa millachicuyñam canꞌa;
uycuśhayquica mana ćhasquishañamari canꞌapis.
8 Chaynu micüca quiquinpa mana allinnintam ashicuyan;
Tayta Diospäña japächäśha caśhantamari millachicuy anlamanña muyuyächin.
Chaymi malcanpi alüśhaña canꞌa.
9 “Chaynütac cusicha timpu ćhämuptin amam manya-manyapiꞌa calaypa-calanquichu nïtac pampäman usüśhacunätapis pallayanquichu.
10 Amatacmi üba cusichayquićhu lluy-lluytañá ashipälunquichu nïtac juc ishcay palpücätapis lläwalpuyalcanquiñachu.
Chaycunactá wacchacunäpä,
mana Israel caśhtacunäpäñam caćhaycülunqui.
Yaꞌamari Tayta Diosniqui cayá.e
11 “Amatac suwaculcaychu,f
casquiculcaychu nïtac quiquiqui-pulapis ingañanaculcaychu.g
12 “Amatac śhutïta tistigupä śhaycaycachil limaliculcäśhayquiwanh Diosniquita jalutacuyalcaychu.
Yaꞌamari Tayta Diosniqui cayá.
13 “Amatacmi nuna-masiquita ñacachinquichu nïtac imallantapis suwälunquichu.
Lulachicuśhayqui nunäpa pägunta ama juc muyunpälä quïdacaycachiychu.i
14 Mana uyalïcunäta ama mana allin cananpä nipayalcaychu.
Aplacunäpa puntanmanpis ama ima sasachacuyllactapis ćhulayalcaychu.j
Aśhwanpari Tayta Diosta manchaculcay.
Yaꞌamari Tayta Diosniqui cayá.
15 “Imapis allichanayqui captin cäninman-cama allichaycuy.
Amari wacchacunäta llaquipayaychu nïtac ricucunäman uyshuycuyaychu.
Aśhwanpa tincüninman-camari allichaycuy.k
16 Malcayquićhu amatac waśha limaycunactá artiyaychu.
Amatac articunawan nuna-masiquip cawsayninta mana allinman ćhulayaychu.
Yaꞌamari Tayta Diosniqui cayá.
17 “Amatac wawꞌi-caśhayquita śhunꞌullayquićhu ćhïnicuyaychu.
Aśhwanpa cäraycuy chay juchanpal wayuyninta ampis mana apayänayquipä.
18 Amatac malca-masiquita cutichicuyaychu nïtac ćhïnicuyaychu.
Aśhwanpa nuna-masiquita quiquiquitanu cuyacuywan licaycuy.m
Yaꞌamari Tayta Diosniqui cayá.
19 “Chaynütac cay camachicuynïcunactapis lulayman ćhulaycuy:
Amam uywayquicunacta juc licchä uywacunawan chalachinquichu.
Talpulpis amam ishcay licchä ćhacla micuycunactá mujülunquichu.
Amatacmi ishcay licchä puchcacunawan luläśha müdanawan müdacunquichu.n
20 “Sïchuśh juc nuna puñülunꞌa cuscananpäña limalinacüśha uyway wamlawan,
chay uyway wamla manalä lantisha ütac manalä libri cayaptinꞌa,
pulanmi mućhuycachisha canꞌa.
Ñatac chay uyway wamla manalä libri caśhanpam pulanpis mana wañuchishachu capäcunꞌa.
21 Chay umri mana allin lulaśhanpïtam juc ulu uwishta Tayta Diosman uycunꞌa.
Chayta tincuna carpap puncunmanmi apaycunꞌa.
22 Chay mana allinninpi uycuśhan ulu uwishcätam sasirdütica Tayta Diosman uycunꞌa.
Chaynüpam chay umrip juchan chuyanchaycuśha caycunꞌa.
23 “Chaynütac chay malcaman yaycälälil micuna lantacunacta lantapäcul quimsa watalämi wayuynincunacta anlapä licapäcunqui.
Chay watacuna amam wayuyninta micapäcunquichu.
24 Tawa watäćhülämi Tayta Diosta alawayniquiwan chay lantaśhayquip wayuynincunacta japächaycälinqui.
25 Pichayänan watäćhüñatacmi lantap lluy wayuynincunacta micapäcunquiña.
Chaynu lulaycäliptiquim wayuynincuna allicta wayuycunꞌa.
Yaꞌamari Tayta Diosniqui cayá.
26 “Amam imactapis yawarniyütá micunquichu.o
“Amatac licacuycunactá lulayalcaychu nïtac śhamü timpucunäćhu ima pasanancunapïtapis niyalcaychu.p
27 “Amatac ächayquip muyülïninta lutucuyalcaychu,
nïtac śhaplayquip puntantapis cuchucuyalcaychu.
28 “Amatac wañücuna-laycu aychayquicunaćhu cuchucuyalcaychu;
amatac mana chincäcunactá aychayquićhu lulachicuyalcaychu.q
Yaꞌamari Tayta Diosniqui cayá.
29 “Amatac wamla chuliquita waticapä uycuśhayquiwan mana allinman jitaycuyaychu.r
Chaynüpa amari malcäta mana allin anlacunawan juntayalcächiychu.
30 “Jamana muyuncäćhu jamanquim;
jinaman Chuya Sityuctapis manchacuywanmi licanqui.
Yaꞌamari Tayta Diosniqui cayá.s
31 “Amatac licacücunäman rüjacunäman liyalcaychu.t
Chaycunawan licachicuyalcalꞌa anlamanmi muyülälinqui.
Yaꞌamari Tayta Diosniqui cayá.
32 “Yaśhaćhu ütac mayurniquićhu cayal śhaycalcälil rispïtuwan licaycuy.
Caywanꞌa Tayta Diosniquitam manchacuywan licaycuyanqui.
Yaꞌamari Tayta Diosniqui cayá.
33 “Amcunaćhu mana Israel caśhta tacyäluptin ama usuchipäcuychu.
34 Aśhwanpa quiquiquipa caśhtayquitanu licaycäliy;
quiquiquitanuꞌari cuyaycäliy,
amcunapis Egiptoćhu mana lisishamari capäculanqui.u
Yaꞌamari Tayta Diosniqui cayá.
35 “Chaynütac imactapis allichanaculcalꞌa ama ingañacuyalcaychu tupucta,
quïlucta,
litructapis;
imam cäcällactam unaculcanqui.
36 Chaymi balansayquicuna,
tupucuyquicuna tincüllanćhu cabal caycunan.v
Yaꞌamari Egiptopi julamüniqui Tayta Diosniqui cayá.
37 “Chayurá lluy camachicuynïmannümi,
yaćhachicuynïmannümi cawsaycälinqui;
lulaymanmari ćhulaycälinqui.
Yaꞌamari Tayta Diosniqui cayá” nil.