Yawarcäta chächuycunanpämi nin
17
Chaypïtam Moisesta Tayta Dios nin:
2 “Cayta nimuy Aaronta,
chulincunacta,
jinantin Israel caśhtacunäta:
Caynümi Tayta Dios nin:
3 Israel caśhtacunäpi mayan nunapis wäcacta,
uwishta,
ütac capishta yaćhapäcuśhanćhu ütac waśhaćhu wañuchïca,
4 juchayüpämi licaśha canꞌa yawarta jićhaśhanpa;
jinaman tincuna carpaćhu Tayta Dios caśhancäman uycunanpä mana apaśhanpam.
Chaymari chay nunaca malcapïta alüśha canꞌa.
5 Cay camachicuyca cayan Israel caśhtacunaca yaćhapäcuśhanpi waśhaćhu uywa wañuchipäcuśhancunacta tincuna carpap puncunman uycunanpämi.
Chayćhu sasirdütiman uycuptinmi payñatac allin cawsaśhanpi Tayta Diosman uycunꞌa.
6 Jinaman tincuna carpap puncunćhu cä Tayta Diospä uycuna pataccämanmi sasirdütica yawarcäta chächuycunꞌa.
Jinamanꞌa wiläta cañaycunꞌa Tayta Diosman tuqui mishqui aśhnä ćhaycunanpämi.
7 Chaynüpam Israel caśhtacunaca manaña mastá chay capishnilä supaycäman uycälinꞌañachu.
Chaycunacta sirbiyninwanmari watica walminüpis juchapacalälin.
Cay camachicuymari lluy milayniquicunapäpis wiña-wiñaypä caycunꞌa.
8 “Ñatac Israel caśhta ütac mana Israel caśhta amcunaćhu yaćhäcämi Tayta Diosman uycunꞌa ütac cañaycunꞌa.
9 Chaynu lulayalpis tincuna carpap puncunćhu Tayta Diosman uycunanpä mana apalꞌa malcanpïta alüśham canꞌa.
Yawarta mana micunanpämi nin
10 “Chaynütac Israel caśhta ütac mana Israel caśhta amcunaćhu yaćhäca ima yawartapis micüluptinꞌa licaytapis manaña munalmi malcanpïta alapacüśhä.a
11 Yawarcämari aychanchicpä cawsaynin.
Yaꞌa quiquïmi uywacunäpa yawarninta uyculac,
uycuna patacćhu uycälimaptiqui chuyaña capäcunayquipä.
Chay yawarcäwanmari chuyanchäśhaña cayan.b
12 “Chaymi lluy Israel caśhtacunäta niycú:
‘Amam mayanllayquipis yawarta micapäcunquichu;
nïtac amcunaćhu yaćhä mana Israel caśhtacunäpis yawarta micapäcunꞌachu’.
13 Chaynütacmi Israel caśhta ütac amcunaćhu yaćhä mana Israel caśhtapis micunapä cä uywacta ütac pälïcunacta chalälul yawarninta śhutuycachil allpawan pampaycunꞌa.
14 Yalpayꞌari,
yawarcämi lluy uywacunap cawsaynin.
Chaymi lluy Israel caśhtacunäta nilá:
‘Lluy uywacunap yawarninta ama micapäcuychu.
Chay yawarninmari uywacunäpa cawsaynin.
Chaymi mayanpis micücá alapacüśha canꞌa’ nil.
15 “Chaynütacmi mayan Israel caśhtapis ütac mana Israel caśhtapis wañüśha uywap ütac munti uywap ticshïsha aychanta micücá müdananta täśhanꞌa,
jinaman quiquinpis almacunꞌam.
Chay tutacamam anlapä licaśha canꞌa.
Chaypïlämi chuyanchaycuśha caycunꞌa.
16 Ñatac müdananta mana täśhaptin nïtac quiquinpis mana almacuptinꞌa mana cäsucuyninpa wayuynintam apaycunꞌa” nil.