Allin cawsaśhanpïta Tayta Diosman uycuypïmi nin
3
“Chaynütacmi allin cawsaśhanpïta Tayta Diosta uycuyta munalꞌa wäcacta uycunan.
Chay uycuśhanca allinnin malta türum ütac waquillam canman.
2 Chay uywap umanman maquinta ćhulayculmi tincuna carpap yaycunanćhu muꞌulunꞌa.
Chaypïtam Aaronpa chulin sasirdüticunaca uycuna patacpa muyülïninman yawarninta chächuycälinꞌa.
3 “Chaynu allin cawsaśhanpi Tayta Diosman uywacta uyculꞌa ninäćhu cañaywanmi uycunan.
Uycälinꞌa allashquinćhu wilanta,
pata wilanta,
4 lulunninta wilantincamacta,
lümunćhu wilantapis,
chaynütac ñatinninćhu wilancunactapis lulunnintinta.
5 Caycunactam Aaronpa chulincuna cañaywan uycuśhancäwan cuscacta uycuna pataccäćhu,
yamta waläcäćhu uycälinꞌa.
Cay uycuśhancämari Tayta Diosman tuqui mishqui aśhnä ćhaycunꞌa.
6 “Ñatac allin cawsaśhanpïta Tayta Diosman uwishta uyculꞌa allinnin ćhina ütac ulu uwishtam uycunꞌa.
7 Chaynu Tayta Diosman uwishta uyculꞌa,
8 uycuśhanpa umanmanmi maquinta ćhulaycunꞌa.
Jinalculmi tincuna carpap yaycunanćhu muꞌulunꞌa.
Chaypïtam sasirdüticunaca uycuna patacpa muyülïninman yawarcäta chächuycälinꞌa.
9 “Chay uycuśhan partictañatacmi allin cawsaśhanpi Tayta Diosman cañaywan uycunꞌa:
wilanta,
siqui tunäninpi cuchüśha ćhupanta,
allashquinćhu wilancunacta,
pata wilancunactapis.
10 Chaynütacmi lulunnintapis wilannintinta,
lümunćhu wilantapis,
chaynütac ñatinninćhu wilancunactapis lulunnintinta uycapäcunꞌa.
11 Chaycunactam sasirdütica uycunan patacćhu cañaywan uycunꞌa.
Chaymi caycunꞌa Tayta Diospä ćhacla micuy uycuśhannu sumä mishqui-mishqui tuqui aśhnayniyu.
12 “Chaynütac Tayta Diosta uycunanpä capishta apamulꞌa,
13 chaypa umanmanmi maquinta ćhulaycunꞌa.
Jinalculmi tincuna carpap yaycunanćhu muꞌulunꞌa.
Chaypïtam Aaronpa chulincuna uycuna patacpa muyülïninman yawarcäta chächuycälinꞌa.
14 “Partictañatacmi Tayta Diosman cañaywan uycunꞌa:
allashquinćhu wilancunacta,
pata wilancunactapis,
15 chaynütac lulunnintapis wilannintinta,
lümunćhu wilantapis,
chaynütac ñatinninćhu wilancunactapis lulunnintinta uycapäcunꞌa.
16 Chaycunactam sasirdütica uycuna pataccäćhu cañaywan uycunꞌa.
Caymari Tayta Diosman tuqui mishqui aśhnä ćhaycunꞌa.
Lluy wilanmá Tayta Diospä caycunꞌa.
17 “Cay camachicuycämi wiña-wiñaypä lluy milayniquicunapä mayćhu capäcuptiquipis caycunꞌa:
Amamari ima wilactapis nï yawartapis micapäcunquichu” nilmi Tayta Dios nila.