36
“Chayurá Tayta Dios umacta,
yaćhayta,
tantiayta uycäliśhancunämi Bezaleelwan Aholiabwan chuya carpactam lulaycälinꞌa.
Paycunamari Tayta Dios lulananpä nishanmannu chuya carpactawan lluy cänincunacta tuquicta lulaycälinꞌa” nil.
2 Chaypïtam Moises Bezaleeltawan Aholiabta,
jinaman Tayta Dios yaćhayta uycuśhancunätapis lluy ayala.
Chaynütac lulapäcunanpä sintï nunacunätapis ayachila.
3 Paycunam Moisespïta ćhasquiycälila Israel caśhtacunaca lluy apapämuśhancunacta;
chaywan chuya carpacta lluy ima cänintintapis lulaycälinanpä.
Ñatac Israel caśhtacunacá walan-walanmi śhunꞌunpi yalamuśhancäta ćhaycachicayalcämun.
4-5 Jinaptinmi chay chuya carpaćhu luläcunaca lulayninta caćhaycul Moisesman liculcan:
“Cay lulanapä Tayta Dios nishanpïtapis mas-mastañam malcaca apacayalcämun” nil niycäliy.
6 Chaymi Moises jinantin malcäta willachila:
“Walmipis wayapapis chuya carpapä amaña imactapis lulapäcuchunñachu;
nïtac apapämuchunñachu” nil.
Chaynu niptinmi malcaca apayta manalcälälila.
7 Chay chuya carpacta lulapäcunanpä manam camayllachu cala,
sinuꞌa puchulalämi canpis.
Chuya carpactam lulapäcun
8 Ñatac lluypïpis mas yaćhayniyücämi chuya carpacta lulapäcula.
Chay chuya carpap atacuntam lïnu cawpüśhapi ćhunca tïlacunacta lulala.
Chay cala asulpïta,
murädupïta,
pucapïtam.
Chay tïlamanmi querubin anjilcunäta sumä tuquicta burdala.
9 Chay atacu tïlacunaca chay midïdayüllam capäcula:
Largunmi ćhunca ishcayniyu ćhawpi (12.5) mitru cala;
anchunñatacmi ishcay mitru.
10 Chay picha atacu tïlactam japä-cama tinquinacächishacta jilala.
Chaynüllatacmi juc pichacunätapis jilala.
11 Chay pichantin atacu tïlap manyancunaćhümi murädu cawpupi linlichancunacta lulala.
Chay juc picha cäcunäpa manyanćhüpis chaynüllactatacmi lulala.
12 Chay picha-picha cä tïlacunäćhu picha ćhunca (50) cawpupi luläśha linlichancuna walcalayalcätam lulapäcula.
Chaymi atacu tïlacunaca chimpa-chimpa watanacunanpä cala.
13 Chaynütac ürupïta picha ćhunca (50) argüllacunacta lulala.
Chaywanmi picha ćhunca-cama (50) linlichancunapi atacu tïlacunäta jucllachala.
Chaynüpam chuya carpap atacun juc-yupayllaña cala.
14 Chaynütacmi ćhunca jucniyu (11) atacu tïlacunacta capishpa ächanpi lulala.
Ćhunca jucniyu atacu tïlacunactamari lulala.
15 Largunmanmi ćhunca quimsayu ćhawpi (13.5) mitru cala;
anchunmanñatac ishcay mitru.
Chay ćhunca jucniyu tïlacunämi chay cusca midïdayülla cala.
16 Chay pichantin atacu tïlactam pärish-pärishta tinquilcul jiläla.
Chay jucllay tïla carpap punta läduman pasaläcätañatacmi patïla.
17 Jinaman chay tïlap manyanpa patanćhu picha ćhunca (50) linlichancunactam cawpüla.
Chaynütacmi chay juc lädunćhüpis picha ćhuncacta (50) cawpüla.
18 Jinaman brunsipïta picha ćhunca (50) argüllacunactapis lulalam.
Chaycunawanmi linlincunapi chalachila.
Chaynüpam chuya carpaca jucllayllaman tinquïsha cala.
19 Chaynütacmi chuya carpap tïlanpa janäninpäpis juc atacuntalä ulu uwishpa utanta pucawan tiñïshapi lulala.
Chaypa janäninpäpis juc fïnunnin utacunapïtalämi lulala.
20 Chaynütacmi acacia ilupïta chuya carpap paradïrunta lulalcul dirichullacta śhaycachila.
21 Chay paradïruncunam largunpi tawa mitru ćhawpincama cala.
Anchunpïñatacmi süta ćhunca picha (65) cintimitru-cama cala.
22 Paradïruca śhaycachisha cananpämi ishcay pasalayä puntachayü-cama capäcula.
Chaynütamari lluy paradïrunćhu-cama lulaycula.
23 Chay ishcay ćhunca (20) paradïrucunactam chuya carpap sur läduman śhaycachila.
24 Chaynütacmi simintunpäpis illaypi lulala tawa ćhunca (40) simintucunacta.
Juc paradïrumanmi ishcay simintucta ćhulala.
Chay pasalä ishcay puntachancunactamari jucninman-cama śhaycachila.
25 Chay ishcay ćhunca (20) paradïrucunactam chuya carpap ichünin läduman śhaycachila.
26 Chaynütacmi simintunpäpis illaypi lulala tawa ćhunca (40) simintucunacta.
Juc paradïrumanmi ishcay simintucta ćhulala.
Chay pasalä ishcay puntachancunactamari jucninman-cama śhaycachila.
27 Chaynütacmi chuya carpap ipan lädunpäpis süta paradïructatac lulala.
28 Chay ipan lädu isquinanpäpis ishcay paradïructatacmi lulala.
29 Chay ishcaynin paradïrum pampäpïta altucama juc paradïrucunäwan camay-camaylla cala.
Chaynu calmi altu isquinanćhu paradïrucunätawan tacyachinanpä uchuy tablachawan chalachila.
Chaynüllam ishcaynin isquinanćhu paradïrupäpis cala.
30 Chayurá tawan isquinanćhu pusä paradïrucunam cala;
ćhunca sütayu (16) illaypi simintuncunam calapis.
Juc paradïrum ishcay simintuyü-cama cala.
31 Chaynütacmi paradïrucunäta tacyachinanpä picha titasca bäracta lulala.
Chaypis acacia ilupïta luläśham cala.
32 Juc lädunta chalalänanpäpis chaynu picha titasca bäram cala.
Ipan lädupäpis chaynu pichatacmi cala.
33 Ćhawpinpa pasäcäñatacmi lluy paradïruncunap śhunꞌunpa pasala.
34 Chay paradïrucunäta,
titasca bäracunätapis üruwanmi laꞌala.
Chay titasca bäracunaca pasananpä linlichancunactañatacmi ichá ürupï lulala.
35 Chaynütacmi Chuya Sityupä curtïnacta lulala asulpi,
murädupi,
pucapi,
cawpüśha fïnu lïnupïtapis.
Chaymantacmi querubin nishan anjilcunactapis tuqui-tuquicta burdäla.
36 Chaypïtam acacia ilupi üruwan laꞌäśha tawa paradïructa,
illaypi tawa simintuyü-camacta śhalcachila.
Chaymanmi ürupi luläśha argüllacunäta walcala.
37 Chaynütacmi chuya carpap puncunpä tuqui-tuqui burdäśha curtïnacta lulala.
Chay cala asulpïta,
murädupïta,
pucapïta,
fïnunnin lïnupïta cawpüśham.
38 Chay curtïnaca walcalänanpä ürupïta linlichancunactam lulala.
Jinaman acacia ilupi üruwan laꞌäśha picha paradïructam lulala,
brunsipïta picha simintuyü-camacta.
Chay paradïrucunämanmi curtïnacta walcala.