Tayta Diosmi micuyta camaycachin
16
Chaypïtam Israel caśhtacunaca Elim lädupïta liculcal Sin nishan chunyäninman ćhälälin.
Chay cayan Elim lädupïtawan Sinai lädup ćhawpinćhümi.
Chayman ćhälälin Egiptopi yalapäcuśhanpi ishcay quillap ćhunca picha (15) muyunninćhümá.
2 Chay chunyäcäćhümi lluy Israel caśhtacunaca Moisespa Aaronpa cuntran limacuyalcan:
3 “Allinćha canman Egiptoćhu Tayta Diospa maquinwan wañüluptinchicpis cala.
Chayćhu mancantin-mancantin aychacunap jananćhümi capäculá;
tantactapis maćhaycäpäcunäcamam micapäculá.
Cay chunyäcämanñatac julälälimanqui micuypi lluy wañuchipämänayquipä” nil.
4 Chaymi Tayta Dios Moisesta:
“Janay pachäpïmi tantacta micapäcunayquipä tamyachimuśhä.a
Nunacunäñatac micapäcunanpä camayllacta muyun-muyun pallä yalupäcuchun.
Cay nishäta uyalicü ütac mana uyalicü caśhantapis cananmi licaycuśhä.
5 Süta muyuncäćhüñatacmi ishcay muyunpäña pallapäcunqui;
jinaman yanülälinquiñam canpis” nin.
6 Niptinmi Moiseswan Aaron jinantin Israel caśhtacunäta nin:
“Egiptopïta Tayta Dios julupäcuśhuśhayquita cay tardim yaćhapäcunqui.
7 Wala-wälañatacmi Tayta Diospa sumä cayninta licapäcunqui.
Pay yaćhälunñamari paypa cuntran limapäcuśhayquita.
¿Yaꞌacuná pitan capäcú jamuyapämänayquipä?”
nil.
8 Nilcuśhanpïmi Moises nin:
“Tayta Diosmi jamuyapäcuśhayquita uyalïlun.
Chaymi tardinpa aychacta upäcuśhunqui micapäcunayquipä.
Wälanpañatac tantacta uycapäcuśhunqui maćhaycälinayquicama micapäcunayquipä.
¿Yaꞌacuna pimá capäcú?
Manamá yaꞌacunactachu jamuyayalcämanqui sinuꞌa quiquin Tayta Diostam” nil.
9 Chaypïtam Aaronta Moises nin:
“Jinantin Israel caśhtacunäta niycuy:
‘Cuntran limapäcuśhayquita Tayta Dios uyalïlunmi.
Chaymi puntanman canan aśhuycälimunayqui’ ” nil.
10 Chaynu Aaron limapayaptinmi israelcunaca chunyä läduman licalcuśhanćhu licälälin Tayta Diospa sumä caynin pucutaycäćhu camalamuśhanta.
11 Chayćhümi Moisesta Tayta Dios nin:
12 “Israelcunäpa jamuyacuyninta uyaliycümi.
Cayta niycamuy:
‘Tardinpam aychacta micapäcunqui,
wälanpañatac tantacta micapäcunqui maćhaycunayquicama.
Chaynu uycuśhäwanmari yaćhapäcunqui Tayta Diosniqui yaꞌa caśhäta’ ” nil.
13 Chay tardim chay jamapäcuśhanman alli-alli llutucuna jiꞌalpälälimun.
Wälanpañatacmi jamapäcuśhanpa muyülïninman lactacta śhullipämun.b
14 Chay śhulli chullüluptinmi chunyä pampäćhu laśhta iscarchäśhanu uylu-camacha quïdälun.
15 Chayta licalälilmi israelcunaca:
“¿Imatan cay?”c
ninaculcäla.
Manam yaćhapäculachu ima caśhantapis.d
Chayćhümi Moises nin:
“Tayta Dios micunanchicpä tanta umäśhanchiccämari.
16 Tayta Diosmi caynu camachimanchic:
aylluyquićhu ayca capäcuśhayquimannülla pallapäcuy;
ishcay quïluctam juc nunapa-cama” nin.
17 Chay nishantanümi Israel caśhtacunaca lulaycälila.
Waquinnincunam achcacta,
waquincunañatac ashllayllacta pallapäcula.
18 Chaymi tupuycuptin achcacta palläcäpäpis mana puchulachu;e
ashllacta palläcäpäpis manatacmi pishilachu.
Lluypis micunanpä camayllactam pallapäcuña.
19 Chaypïtam Moises nin:
“Wala muyunniquipä amam ćhulapäcunquichu” nil.
20 Ñatac waquinnincuná Moisespa nishanta mana uyaliculmi wälancunapä ćhulacälälin.
Jinaptinmi culülul lluy aśhnäla.
Jinäluptinmi paycunapä Moises piñacüla.
21 Chaynu muyun-muyun micunanpä camaytam pallapäcula.
Inti ishpïmuptinñatacmi lluy chullüla.
22 Süta muyuncäćhüñatacmi ishcay muyunpäña pallapäcula;
ishcay quïluctañam juc nunapa-cama pallapäcula.
Chaynu pallacuyalcaptinmi puydïnincuna Moisesman willaycü lipäcula.
23 Chaymi Moises nin:
“Caynütamá Tayta Dios camachin.
Wala muyunmari Tayta Diospa japächaśhan muyunca.f
Chaymi jilanayqui captinpis canan jilanayqui,
yanunayqui captinpis canan yanunayqui.
Ñatac imapis mana camacäśhayquitá chay wälapäñam ćhulapäcunayqui” nil.
24 Chaynu Moises nishannümi wälapäña lluy ćhulapäcula.
Chaycuna manam cululachu nï aśhnalapischu.
25 Chay muyunmi Moises nin:
“Canan muyun Tayta Diospa japächäśhan muyun caśhan-laycum imactapis mana talipäcunquichu.
Ćhulaculcäśhayquitari canan micapäcuy.
26 Süta muyunmi pallapäcunquiman.
Anćhish muyunca Tayta Diospa japächäśha captinmi imapis mana canꞌachu” nil.
27 Waquinnincunañatacmi chay anćhish muyunca pallä yalapäcul imactapis mana talipäculachu.
28 Chaymi Moisesta Tayta Dios nin:
“¿Imaycamam camachicuynïcunactawan yaćhachicuynïcunacta mana uyalicalcämanꞌachu?
29 Yalpapäcuyꞌari,
yaꞌa Tayta Diosmi jamana muyunta camaycachic.
Chaymi süta muyuncäćhu ishcay muyunpäña micuyta uycälic.
Ñatac mayćhüpis caśhallayquićhu capäcuy;
chay caśhancäpi ama mayanpis yaluchunchu” nil.
30 Chaymi israelcunaca anćhish muyuncäćhu jamapäcula.
31 Chay micuy uśhancätam israelcunaca “Maná” nipäcula.
Chay Maná nishanca culandrup mujunnu yulä,
urunwaypa mishquinnu mishquim cacula.g
32 Chaypïtam Moises nin:
“Caymi Tayta Diospa camachicuynin:
Ishcay quïlucta ‘Maná’ nishancäta śhamü milayniquicunapä ćhulapäcuy.
Chayćha Egiptopi julamul chunyäcäćhu micuy uycuśhäta paycuna licapäcunꞌa” nil.
33 Niptinmi Moises nin:
“Juc wacuyman ‘Maná’h nishancäta ishcay quïlucta ćhulaycuy.
Jinalcul lluy milayninchiccuna licapäcunanpä Tayta Diospa canancäman ćhulaycuy” nil.
34 Niptinmi Moisesman Tayta Dios nishantanu Aaron ćhulaycula chay limalicuśhan babulman.
35 Israel caśhtacunaca yaćhapäcunan Canaanpa culindanta ćhäpäcunancamam tawa ćhunca (40) wata “Maná” nishanta micapäcula.i
36 Ñatac chay ishcay quïlu tupuctam “gomer” nipäcula.
Ćhunca “gomer” nishan tupum juc “Efa”j nisha tupu cala.