Israel caśhtacunämi Puca Lamarta chimpapäcun
14
Chaypïtam Moisesta Tayta Dios nin:
2 “Israelcunäta nimuy,
cutilcälil Pi-hahirotpa chinpanćhu jamapäcunanpä.
Chay cayan Lamarpa pasanaćhu Migdol läduman manaläpis ćhänaćhümi;
Baal-zefonpa chinpanćhümari.
3 Faraoncäñatacmi ninꞌa:
‘Israel caśhtacunaca chunyäninćhu pantälul wićhacacüśham cayalcan’ nil.
4 Yaꞌa quiquïmi Faraoncäpa śhunꞌunta lumiyächishä atipäcuśhunayquipä.
Jinaptïmi Faraonca,
cachacuncuna,
puydïnincunaca lluy Egiptocunäpis lulaśhäta lical altuman julapäcamanꞌa.
Chaynüpam jinantin Egipto nunacunaca yaćhapäcunꞌa Tayta Dios caśhäta” nin.
Chay nishantanümi Israel caśhtacunaca lulapäcula.
5 Faraoncämanñatacmi willaycälila Israel caśhtacunaca ayiculcäśhanta.
Chaymi yanapänincunawan tantiapacälälil:
“¡Imactatá lulälunchic!
¡Israelcunäta caćhaycüluptinchic canan mayantá sirbimäshun!”
ninacücuyalcan.
6 Chaymi Faraonca carritanta alistalcachil cachacuncunacta puśhala.
7 Süta paćhac (600) allinnin aclaśha carritancunacta,
jinantin Egiptoćhu carritacunactawan,
puydïniyü-camactam puśhacula.
8 Ñatac Israel caśhtacunaca “cananꞌa libracülunchicñam” nil yaluyalcaptinpis,
quiquin Tayta Dios Faraoncäpa śhunꞌunta lumiyächiptinmi mana-mana ipanta aticulcan.
9 Chaymi Faraonca carritancunawan,
cawallunćhu sillädancunawan,
lluy nunancunawan ipanta aticulcäla.
Jinalmi Baal-zefonpa chimpan Pi-hahirotpa sircascan lamar patanćhu cayalcäta licälälin.
10 Chayćhu Israel caśhtacunaca Faraon lluy nunantin ipantaña jiꞌacaycayämuśhanta licälälilmi sumä-sumä manchälälishaña Tayta Diosta mañacücuyalcan.
11 Jinalmi Moisesta nicuyalcan:
“¿Egiptoćhu manachun pampacunapä cala cayćhüla wañunanchicpä imamá?
¿Imapämá cayta lulälunqui?
¿Imapämá Egiptopi caymanlä julapämälanqui?
12 ¿Manachun Egiptoćhu cayällal nipäculac:
‘Caćhaycälimay paycunacta sirbipäcunäpä?
¡Mas allin canman paycunap uywaynin caymi,
chunyäcäćhu supayapayänanchictá!’ ”
nil.
13 Niptinmi Moises:
“¡Ama manchaculcaychu!
¡Masïsu śhaycaycäliy!
Cananmi licapäcunqui imanuypa Tayta Dios libraycuśhuśhayquitapis.
Wic licapäcuśhayqui Egipto nunacunäta manañam imaypis licapäcunquiñachu.
14 Quiquin Tayta Diosmari amcunapi pilyanꞌa;
amcuná jawcalla capäcuy” nin.
15 Chaypïta Moisesta Tayta Diosmi nin:
“¿Imapïmi yaꞌactalä ayaycaćhayalcämanqui?
Israel caśhtacunaca chimpapäcuchun jinalla.
16 Amñatac garutiquiwan chacchalal mayüta laquiy.
Chayćha Israel caśhtacunaca chaquillap chimpapäcunꞌa.
17 Yaꞌañatacmi Egipto nunacunap śhunꞌunta lumiyächishä atipäcuśhunayquipä.
Chaymi Faraoncäta,
carritancunacta lluy nunancunacta lulaśhäwan altuman juluycuśha caśhä.
18 Chaywanmi jinantin Egipto nunacunaca Tayta Dios sumä caśhäta tantiapäcunꞌa” nil.
19 Ñatac Israelcunäpa puntanta lï Tayta Diospa anjilninmi israelcunäpa ipanman ćhulacülun.
Chaynütacmi puntanta pucutay lïcäpis ipanman ćhulacülun.
20 Chaymi ishcayninta pucutayca laquila.
Egiptocunapämi pucutayca yana-yana cacula.
Israel läducunäpäñatacmi achquila.
Chaynu tutawyaptinmi Egiptocunaca mana alcansapäculachu.
21 Chayćhu Moisesñatacmi garutinta mayüman chacchaläla.
Jinaptinmi Tayta Dios inti ishpimunan lädupïta walächi sumä-sumäta waywachimula lamarca laquicacunanpä.a
Jinaptin lamarca laquicacülulmi chaquiña licalïla.
22 Chaymi Israel caśhtacunaca lamar ćhawpinpa chaquïllapña pasapäcula;b
yacümi wicman cayman murällanu laquicacüla.
23 Chaymi Egiptocunäpis lluy carritantin,
sillädancunawan atipäcul lamar ćhawpicama yaycälälin.
24 Ñatac achicalcayämuptinñam chay pucutaycäpi,
nina waläcäpa ćhawpinpi Tayta Dios Egiptocunäta licälul lluy pantanacächila.
25 Jinaman carritancunap ruydancunactapis wicapächinmi ñaca-ñacayta lipäcunanpä.
Chaymi Egiptocunaca:
“Tayta Diosninmi yaꞌanchicwan pilyayan,
Israel caśhtacunäpïta ayishun” nin.
26 Ñatac Moisesta Tayta Diosmi nin:
“Garutiquita mayüman chacchalay Egipto nunacunäta,
lluy carritantinta,
sillädantincunacta yacuca ñitïnanpä” nil.
27 Niptinmi Moises maquinta lamarman chacchalaycuptin achicalpuyaptinña lamarca sumä callpanwan caśhan cutiycula.
Jinaptinmi Egiptocunaca ayipäcuchcalcaptin yacuca ñitïlälin.
Chayćhümi Tayta Dios Egiptocunäta anuächila.
28 Chay yacuca caśhan cutiycüluptinmi carritancunapis,
sillädancunapis,
Faraonpa jinantin nunancunapis licachillapäpis manaña quïdalachu.
29 Ñatac Israel caśhtacunämi ichá chaqui lamarllap pasapäcula,
yacuca wicman cayman murällamannu muyüluptin.
30 Chay muyunmi Israel caśhtacunäta Tayta Dios salbaycula.
Paycunañatacmi lamar patanćhu Egiptocunaca lluy wañupäcuśhanta licapäcula.
31 Chaynu Tayta Dios jatun munayninwan Egiptocunäta lulaycuśhanta licapäculmi Israelcunaca payta manchaculcäla.
Chaynütacmi Tayta Diosmanpis sirbïnin Moisesmanpis chalapaculcäla.