Tayta Diosmi Abramta ayan
12
Tayta Diosmi Abramta nin:
“Cay malcayquita,
allpayquita,
aylluyquita caćhaycul licuy unanchaycuśhá malcaman.a
2 Chayćhümi allinpä licaycuśha canqui;
milayniquipïtam jatun malca śhalcachishä canꞌa;
śhutiquipis altuman juluycuśham canꞌa.
Jinalmi lluypäpis allinninpä caycunqui.
3 Allinpä licaycuśhüniquitá allinpatacmi licaycuśhä;
mana allinpä licaśhüniquicunactañatacmi ichá tincüninman-camatac licaycuśhä.
¡Ampam jinantin pachäćhu imaymana caśhta nunacunaca allinpä licaycuśhä canꞌa!”
nil.b
4 Chay Tayta Dios nishannüllam Abram licula;
paywantacmi Lotpis lila.
Chay Haran malcapi Abram yalula anćhish ćhunca pichayu (75) watanta liyalmi.
5 Abramꞌa walmin Saraita,
subrinun Lottapis,
jinaman Haranćhu uyway nuna lantishancunactapis,
lluy ima cänincunactapis apaculculmi Canaanman liculcäla.
6 Chay Canaan läduman Abram ćhälälilmi pasapäcula Shiquem malcäcama.
Chayćhümi More lädupi “encina” lanta nishan cayäla.
Chay lädućhümi Canaan lädu nunacunaca yaćhapäcula.
7 Chayćhu Abram cayaptinñam Tayta Dios licalilcamul nin:
“Ampa milayniquicunamanmi cay allpacta uycuśhä” nil.c
Jinaptinmi Tayta Diosta alawananpä chayćhu uycuna patacta Abram lulala.
8 Chaypïta Bet-elpa inti ishpimunan lädu ulꞌüman pasapäculmi chayćhu chucllanta śhalcachila.
Chayćhütacmi Tayta Diospa uycuna patacta lulaycul payta mañacula.
Chay Bet-el malca inti jiꞌalpunan lädućhümi cala;
Hai malcañatacmi inti ishpimunan lädućhu cala.
9 Chaypïtam Abram allipi-allipiꞌa Neguev läduman ćhäpäcula.
Egipto malcamanmi Abram lin
10 Chay timpum chay malcacunäćhu jatun micuy wana cacula.
Jinaptinmi Abrampa mana ima micunanpis captin Egipto malcaman licula.
11 Chay Egiptoman ćhaycuyalcalmi Abram walmin Saraita nin:
“Yaćhaśhanchicnüpis tuquish walmim canqui.
12 Chayćha Egipto lädu wayapacunaca licälul-pacha ‘wic wayapap walminćha’ nil wañülächimanman;
amtañatacćha cawsayniyüta puśhaculcäśhunquiman.
13 Chaymi tapupäcuśhuptiqui ‘tulïmi’ ninqui.
Chayćha am-laycu allinpä licaycälimanꞌa,
am-laycutacćha cawsayculläśhäpis” nin.d
14 Chay Egiptoman Abram ćhäläliptinmi wayapacunaca Sarai maynu tuquish caśhanta rasunpa licapäcuyalcan.
15 Chaynütacmi mandacü Faraonpa puydï yanapänincunapis tuquish caśhanta licalcälil mandacücäman willaycü pasaculcan.
Chaymi mandacüca palasyunman puśhachimula.
16 Mandacü Faraoncäñatacmi Sarai-laycu Abramta tuquip licaycul uwishcunacta,
wäcacunacta,
ulu ćhina aśhnucunacta,
camïllucunacta,
uyway nunacunactapis uycachila.
17 Ñatac Saraipa jananmi Faraoncäta lluy aylluntinta Tayta Dios sumä imaymana ishyaycunawan mućhuycachila.
18 Chaynu Faraonca cacuyaptinmi Abramta ayalcachimul:
“¿Imactatan cayta lulämanqui?
¿Imapïmá ‘walmïmi’ nil mana nilanquichu?
19 ¿Imapïtam ‘panïmi’ nilanqui?
Ñaćhallanpam walmïpäña puśhälüpis.
Canan cayćhu walmiqui cayan,
puśhaculcul wayra jawcalla licuy” nin.
20 Nilculmi yanapänincunacta Faraonca nin:
“Abramta walmintinta lluy imapis cänintinta pasächiy liculcänanpä” nil.