2
Nacionpi yachaq mana penqakuqkuna,
qamkunaqa hukllamanñayá huñunakuychik.
2 Decretasqay punchaw manaraq
chayamuchkaptinyá qamkunaqa huñunakuychik.
Manaraq tamo hina pasaruchkaptinyá
qamkunaqa huñunakuychik.
Ñoqa Tayta Diospa piñakuyniy manaraq
chayaramuchkaptinyá huñunakuychik.
3 Kay pachapi llapallan humillakuqkuna,
qamkunaqa Tayta Diostayá maskaychik.
Paypa leynin llapallan cumpliqkuna,
qamkunaqa Tayta Diostayá maskaychik.
Qamkunaqa allin rurayllatañayá munaychik.
Ama hatunchakuspa kawsakuytayá munaychik.
Icharaqpas Tayta Diospa piñakuynin
punchawpi pakaykusqa kawaqchik.
Nacionkuna castigasqa kananmanta
4 Gaza llaqtapas saqesqam kanqa.
Ascalon llaqtapas purmachisqam kanqa.
Asdod llaqtapi yachaqkunatapas
chawpi punchawpipunim qarqorunqaku.
Ecron llaqtapi yachaqkunapas
sapinmanta pilasqa hinam kanqa.
5 Lamar qochapa patanpi yachaqkuna,
qamkunaqa ¡imallapiraq rikukunkichik!
Ceret casta runakunapa castankuna,
qamkunaqa ¡imallapiraq rikukunkichik!
Filistea runakunapa yachanan Canaan allpa,
contraykipim Tayta Dios nisunki:
Mana pipapas yachananmanñam
qamtaqa purmachisqayki.
6 Lamar qochapa patanpi allpakunapas
pasto-pastollañam rikurirunqa.
Lamar qochapa patanpi allpakunapas
michiqkunapa pozonkunapa kananñam rikurirunqa.
Lamar qochapa patanpi allpakunapas
ovejakunapa kanchanpi kananñam rikurirunqa.
7 Juda casta puchuruq runakunapaqmi
chay allpakunaqa kanqa.
Ovejankutapas chaypiña michinankupaqmi
chay allpakunaqa kanqa.
Ascalon llaqtapi wasikunapiñam
paykunaqa tutanpas samakunqa.
Yupaychasqanku Tayta Diosmi watukunqa.
Preso risqankumantam kutichimunqa.
8-9 Llapallan Kamachiq Tayta Diosmi nin kaynata:
Ñoqaqa uyarirunim Moab nacionpi
yachaqkunapa kamikusqankuta.
Ñoqaqa uyarirunim Amon castakunapa
mana allin rimasqankuta.
Paykunaqa runakunatam kamirqaku.
Runaykunapa chakranwanmi
allpankutapas miraykachikurqaku.
Israelpa yupaychasqan
ñoqa Tayta Diosmi kikiyrayku jurani:
Moab nacionqa Sodoma llaqta
hinañam rikurirunqa.
Amon castakunaqa Gomorra runakuna
hinañam rikurirunqa.
Chay nacionkunaqa itanakunapa
wiñananñam rikurirunqa.
Kachi horqonañam rikurirunqa.
Wiñaypaq chunniqñam rikurirunqa.
Puchuq runaykunañam saqueanqa.
Nacionniypi puchuqkunañam dueñochakunqaku.
10 Chaykunaqa hamunqa
Moab runakuna hatun tukukusqanraykum.
Chaykunaqa hamunqa Amon castakuna
hatun tukukusqanraykum.
Paykunaqa llapallan kamachiq Tayta Diospa
runankunatam kamirqaku.
Runankunapa contranpim hatunchakurqaku.
11 Tayta Diosqa manchakuyllapaqñam
paykunapa contranpi rikurirunqa.
Payqa kay pachapi llapallan
taytacha-mamachakunatam tukurunqa.
Lamar qochapa patanpi nacionniyoqkunapas
nacionninkupim Tayta Diosta adoranqa.
12 Cus nacionniyoq runakunataqa
Tayta Diosmi wañuchisunkichik.
13 Norte lawpi yachaqkunatam castigarunqa.
Asiria nacionniyoqkunatam tukurunqa.
Payqa purmarachinqam Ninive llaqtatapas.
Chakirachispam chunnirachinqa Ninive llaqtatapas.
14 Chay purmachisqa llaqtapa chawpinpiqa
atajontin animalkunañam puñukunqaku.
Chay purmachisqa llaqtapa chawpinpiqa
tukuyniraq animalkunañam puñukunqaku.
Tukuwan avutarda sutiyoq animalpas
pilarkunapa puntankunapim puñukunqaku.
Ventanakunapim waqanqa animalkunapas.
Purmachisqañam kanqa punkunkunapas.
Rikurirunqañam cedro sachamanta qerukunapas.
15 Chay llaqtaqa kusikusparaqmi confiakurqa.
Kikinpa sonqonpim piensarqa:
Manam pipas kanchu ñoqa hinaqa,
nispa.
Mayna chunnichisqañam kachkan.
Animalkunapa puñunanñam kachkan.
Pipas chayninta pasaqqa
silbakachanqaraqmi.
Pipas chayninta pasaqqa
qawachinqa takataraqmi.