Jerusalen llaqta castigasqa kananmanta
3
¡Imallapiraq rikukunqa
Jerusalen llaqtayoqkunaqa!
Mana kasukuqmi kachkan paykunaqa.
Millakuypaqñam rikurirun paykunaqa.
Runakunatam ñakarichin paykunaqa.
2 Manam Tayta Diostapas kasukurqakuchu.
Manam corregichikuytapas munarqakuchu.
Manam confiakurqakuchu Tayta Diospipas.
Manam asuykurqakuchu Diosninkumanpas.
3 Paykunapaqa jefenkupas ñawrawyaq leonkuna hinam.
Kamachiqninkupas tutan lloqsiq lobo hinam.
Paqarinpaqqa manam puchunkuchu imallatapas.
4 Pay tukuspa traicionakuqllañam kachkan
Diosmanta willaqninkupas.
Diospaq sapaqchasqa kaqkunatam
millakuypaqtaña rurachkan sacerdotenkupas.
Panta-pantallatañam rurachkanku
Diospa yachachikuynintapas.
5 Chawpinkupi kaq Tayta Diosmi
ruran allin kaqkunataqa.
Payqa manapunim ruranchu
mana allin kaqkunataqa.
Payqa sapa punchawmi
allin arreglokunata ruran.
Payqa sapa madrugawmi
mana faltakuspan ruran.
Mana allin runam ichaqa
mana penqakuspaña ruran.
6 Tayta Diosmi nin kaynata:
Ñoqaqa nacionkunatam chinkarachiniña.
Torrenkunatapas murallanmantam tuñirachiniña.
Callenkunatapas pasaypaqtañam chunnirachini.
Mana pipapas purinantañam chunnirachini.
Paykunapaqa llaqtankupas purmasqañam kachkan.
Mana pipapas yachanan purmasqañam kachkan.
7 Chaymi Jerusalen llaqtata nirqani:
Qamqa segurochá manchakuwankiña,
nispa.
Corregisqaytaqa chaskiwankiñachá,
nispa.
Chayna kaptinqa yachanankutapas
manach tuñichiymanchu karqa.
Chayna kaptinqa lliw castigoykunatapas
manach wichiykachiymanchu karqa.
Ichaqa chaywanpas afanakuyllawanñam
mana allinkunata rurarqaku paykunaqa.
8 Chayraykum ñoqa Tayta Dios kaynata nini:
Contraykichikpi rimarinay punchawkamayá
suyaykuwaychik qamkunaqa.
Nacionkunatawan gobiernokunata huñurunaypaqmi
sentenciaruniña ñoqaqa.
Ancha piñakuyllawanña castigarunaypaqmi
paykunataqa sentenciaruniña.
Tukuy kay pachapi kaqkunaqa sientikuruptiymi
rupachkaq hina piñakuyniywan kanqaku kañasqaña.
9 Chay tiempo chayaramuptinqa rimasqankutam
agradoypaqña tikrarusaq.
Ñoqa Tayta Diostaña qayakuwanankupaqmi
llapallankuta rurarusaq.
Hukllaña serviwanankupaqmi
chaynataqa rurarusaq.
10 Cus nacion mayukunapa chimpanmantaraqmi
mañakuwaqniykunaqa hamunqaku.
Ñoqapa cheqerachisqay runaykunam
ofrendata apamuwanankupaq hamunqaku.
11 Chay punchawpiqa manam penqakunkichikñachu
mana kasukuspa contraypi rurasqaykichikmantapas.
Chawpikichikmantam qarqorusaq
paytukuq kasqaykichikwan kusikuqkunatapas.
Chaynapim sapaqchakusqay orqopiqa
manaña hatunchakunkichikchu qamkunapas.
12 Ñoqa Tayta Diospi amparakuqkunataqa
chawpillaykichikpim saqeykusaq.
Ñakariqkunatawan wakcha runakunataqa
chawpillaykichikpim saqeykusaq.
13 Israel casta puchuq runakunaqa
manañam mana allintaqa ruranqakuñachu.
Israel casta puchuq runakunaqa
manañam llullatapas rimanqakuñachu.
Manañam engañakuq runaqa kanqakuñachu.
Ovejakuna hinañam michiqniyoq kanqaku.
Mana pipapas manchachisqanñam samakunqaku.
Jerusalen llaqtarayku kusikuyllawanña takisqankumanta
14 Sion llaqtapi yachaqkuna,
kusikuymantayá qaparillawanña takiychik.
Israel nacionniyoq runakuna,
tukuy sonqowan kusikuspayá qapariychik.
Jerusalen llaqtapi yachaqkuna,
tukuy sonqoykichikwanyá llumpayta kusikuychik.
15 Tayta Diosqa contraykipi
sentenciasusqaykitapas suchurachinñam.
Enemigoykichiktapas kutirirachinñam.
Qamkunapa chawpikichikpim kachkan
Israel nacionpa reynin Tayta Diosqa.
Chaynaqa manam manchakunkichikñachu
haykapipas mana allintaqa.
16 Chay tiempopiqa Jerusalentam ninqaku:
Sion llaqtapi yachaqkuna,
qamkunaqa amayá manchakuychikchu,
nispa.
Qamkunaqa amayá hukmanyaruychikchu,
nispa.
17 Chawpikichikpim kachkan
yupaychasqaykichik Tayta Diosqa.
Tukuy atiyniyoqmi payqa salvasunaykichikpaqqa.
Qamkunaraykum llumpayta kusikunqa.
Kuyasusqaykichikraykum mosoqyachisunkichik payqa.
Qamkunaraykum takikunawan kusikunqa.
18 Tayta Diosmi kaynata nin:
Fiestakunapas manaña kaptinmi llakikurqankichik.
Chay llakikuytaqa ñoqam qechurusqaykichik.
Chay llakikuyqa qepi hinam llasasurqankichik.
Chay llakikuyqa penqaymanmi churasurqankichik.
19 Lliw ñakarichisuqnikikunapa contranpim
chay tiempopiqa hatarisaq.
Wisturuqkunatam salvaykusaq.
Cheqeruqkunatam huñuykusaq.
Pipapas alabananmanñam tikrarusqaykichik.
Reqsisqa runakunamanñam tikrarusqaykichik.
Tukuy hinastinpim chaynata rurasqaykichik.
Penqaypi kasqaykichikmantam chaynata rurasqaykichik.
20 Ñoqa Tayta Diosmi kaynata nini:
Chay tiempopim kutichimusqaykichik.
Chay tiempopim huñumusqaykichik.
Kay pachapi lliwpa reqsisqanmanñam
qamkunataqa tikraykusqaykichik.
Kay pachapi lliwpa alabananmanñam
qamkunataqa tikrarusqaykichik.
Preso kasqaykichikmanta kutichimuspayñam
qawachkaptikichik rurapusqaykichik.