Habacucman Tayta Dios imam revelasqanmanta
2
Llaqta cuidaq sayananpi sayachkaq hinam
ñoqaqa uyan-uyanlla sayachkasaq.
Tayta Diospa niwananta uyariykunaypaqmi
chaynaqa suyaypaq-suyasaq.
Qaqchawasqanmanta imatam ninaypaqmi
ñoqallayqa suyaypaq-suyasaq.
2 Chaymi Tayta Dios kaynata niwarqa:
Qawachisqaytayá qellqay tablakunapi
mana pantayniyoq kananpaq.
Chaynapi pipas chayta leeykuspanqa
chaypunilla willakuq kallpananpaq.
3 Ñoqapa señalasqay tiempopim
kay revelacion qosqayqa cumplikunqa.
Tukupay tiempokunapim cumplikunqa.
Manapunim llullachu kayqa.
Unamuptinpas suyaykuyá qamqa.
Chayamunqapunim chay punchawqa.
4 Hatunchakuqllañam mana allin ruraq runaqa.
Allin ruraq runaqa iñisqanraykum kawsanqa.
Ñakarichiqkunaqa imaynam kananmanta
5 Qori-qollqeqa runatam traicionarun.
Runapas hatunchakuqllañam rikurirun.
Sepultura hinaraqmi yarqarachikun.
Wañuy hina mana saksaqñam kachkan.
Llapallan nacionkunatam huñukurunku.
Llapallan runakunatam huñukurunku.
6 ¿Manachum llapallan ñakariqkunaqa
asikunapaq watuchi hina kaynata rimanqaku:
“Mana kikikichikpa kaqkunata huñukuruqkunaqa
¡imallapiraq rikukunkichik!
¿Haykapikamataq prenda hapisqaykichikta
huñuypaq-huñukunkichik”?
7 ¿Manachum manukusuqnikikunaqa
qonqayta hatariramunqaku?
Katkatatachisunaykipaqmi hatariramunqaku.
Qechusunaykipaqmi rikuriramunqaku.
8 Qamqa achkallaña nacionkunatam suwarqanki.
Chayraykum puchuq runakunapas suwasunki.
Wañurachisqaykiraykum chaynataqa rurasunki.
Chakrakunatapas llaqtakunatapas
dañasqaykiraykum chaynataqa rurasunki.
Chaypi yachaqkunatapas dañasqaykiraykum
qamqa ñakarichisqa kanki.
9 Familiaykita apuyachinaykipaq
runamasikimanta suwakuq runa
¡imallapiraq rikukuykunki!
Qesaykitapas alto-altopim churarunki.
Mana allinmanta ayqenaykipaqmi churarunki.
10 Achkallataña wañuchinaykipaqmi tantearqanki.
Wasikipi kaqkunatapas penqaymanñam churarqanki.
Kikillaykipa contrallaykipim huchallikurqanki.
11 Murallapi kaq rumikunapas
contraykipim qaparinqaku.
Wasikunapi kaq qerukunapas
contraykipim yachapayanakunqaku.
12 Runakunata wañuchispa
llaqta hatarichiq runa
¡imallapiraq rikukuykunki!
Mana allinta rura-rurarispa
llaqta hatarichiq runa
¡imallapiraq rikukuykunki!
13 Llapallan kamachiq Tayta Diosqa
¿manachum runakunapa llamkasqantaqa
ninawan tukurachinqa?
¿Nacionkunapa sasallawanña rurasqantaqa
mana kaqmanmi tikrarunqa.
14 Imaynam yakukunapa huntaykusqan
kachkan lamar qochapas,
chaynam Tayta Diospa yachayninwan
huntasqa kanqa kay pachapas,
chaynam Tayta Diospa kanchayninwan
huntasqa kanqa kay pachapas.
15 Sinchillataña sinkachikuq vinowan
runamasinta sinkarachiq runa
¡imallapiraq rikukuykunki!
Penqayninta qawanaykipaqmi
chaynataqa rurarunki.
16 Qampas manaña alabasqa kanaykipaqmi
penqayman churasqa kanki.
Chaynaqa qanmanpas Tayta Diosmi
vinoyoq copanmanta tomarachisunki.
Mana señalasqa kasqaykita
qawachikustinñam purinki.
Reqsisqa kasqaykitapas wischuruspam
pasaypaq penqaypaqña purinki.
17 Libano Orqopim dañokunata rurarqanki.
Chaykunaqa kikillaykimanmi wichiykusunki.
Purun animalkuna puchukachisqaykimantam
manchaypaq-manchakunki.
Runakunata wañurachisqaykiraykum
chaynaqa kanki.
Chakrakunatapas dañasqaykiraykum
chaynaqa kanki.
Llaqtakunatapas dañasqaykiraykum
chaynaqa kanki.
Chaypi llapallan yachaqkunatapas
dañasqaykiraykum chaynaqa kanki.
18 ¿Valenchum ruraqninpa rurasqan taytachaqa?
¿Valenchum llullata yachachiq fundisqa taytachaqa?
Chay taytacha ruraqqa rurasqanpim confiakun.
Mana rimaq taytachakunatam payqa rurakun.
19 Kullumanta taytachata “Rikchariy” niq runa
¡imallapiraq rikukuykunki!
Rumimanta mana uyariq taytachata “hatariy” niq runa
¡imallapiraq rikukuykunki!
¿Yaqachum yachachisunkiman chay taytachaqa?
Qori-qollqewan qarachasqa kachkaspankupas
mana samayniyoqmi kanku chay taytachakunaqa.
20 Sapaqchakusqan templonpim kachkan Tayta Diosqa.
Upallachunyá kay pachapi kaqkunaqa.
Paypa qayllanpiyá upallachun chaykunaqa.