HABACUCPA QELLQASQAN LIBRO
Mana allinpa contranpi Habacuc rimasqanmanta
1
Diosmanta willakuq Habacucmi revelacionninpi kaynata nirqa:
2 Dios Taytalláy ¿haykapikamataq
mana uyariykuwankichu qayakamusqaytaqa?
¿Haykapikamataq mana salvaykuwankikuchu
daño ruraymanta qaparimuchkaptiyqa?
3 ¿Imanasqataq qawachiwachkanki mana allin ruraykunataqa?
¿Imanasqataq rikuchiwachkanki sasachakuykunataqa?
Ñoqapa ñawpaqniypiqa tukuy imam purmaypaq-purmachkan.
Tukuy imam dañaypaq-dañanakuchkan.
Quejanakuyllam hatarichkan.
Pleitonakuyllam hatarichkan.
4 Yachachikuynikipas manam cumplikunchu.
Allin arreglopas manam takyanchu.
Mana allin ruraq runakunam
muyurun allin ruraq runakunata.
Chaymi allin arreglokuna rurasqankupas
lloqsirun qewi-qewillata.
Tayta Diospa contestasqanmanta
5 Nacionkunatayá qamkunaqa qawaychik.
Admirasqallañayá qamkunaqa qawaychik.
Tiempoykichikpim admirakuypaqta rurasaq.
Willasuptikichikpas mana creenatam rurasaq.
6 Ñoqaqa Caldea runakunatam hatarichimuchkani.
Manchakuypaq runakunatam hatarichimuchkani.
Apurawman venceqmi paykunaqa.
Tukuy hinastinmanmi mastarikun paykunaqa.
Runapa yachasqan allpantam
dueñochakuykun paykunaqa.
7 Chay runakunaqa mancharikuyllapaqñam kanku.
Kikillankum arreglotapas ruranku.
Kikillankum hatunchaspapas hatunchakunku.
8 Caballonkupas uturungumantapas
aswan apurawman kallpaqraqmi.
Tutaykuqta puriq lobomantapas
aswan manchakuypaqraqmi.
Sillakuqkunapas chapakyayllañam kallpakachanku.
Paykunaqa karukunamantaraqmi hamurunku.
Anka hinaraqmi hapinanpaq pawaykunku.
9 Daño ruranankupaqmi paykunaqa hamunku.
Paykunaqa intipa qespimunan lawpi
rupaq wayra hinam richkanku.
Presochasqankuqa lamar qochapa patanpi
aqo hinaraqmi kachkanku.
10 Paykunaqa reykunamantapas asikunkum.
Kamachikuqkunamantapas burlakunkum.
Murallasqa llaqtakunamantam asikunku.
Qepanman allpata montoruspam dueñochakurunku.
11 Nisyu wayra hinam pasarunku.
Huchayoqmi paykunaqa kachkanku.
Kallpankutapas diosninkupaqmi hapinku.
Habacucpa huktawan reclamasqanmanta
12 Dios Taytalláy,
wiñaymanta kawsakuqmi kanki qamqa
Chuya Diosnilláy,
manapunim wañusaqkuchu ñoqaykuqa.
Dios Taytalláy,
chay runakunataqa juzganaykipaqmi churarqanki.
Qaqa hina takyaq Diosnilláy,
castiganaykipaqmi paykunataqa unancharqanki.
13 Qamqa chuyay-chuyay kasqaykiraykum
mana allintaqa mana qawariwaqchu.
Qamqa chuyay-chuyay kasqaykiraykum
daño ruraytaqa mana qawariwaqchu.
¿Imanasqataq qawayllaqa-qawakunki
runamasin traicionaqkunataqa?
¿Imanasqataq upallakuykunki mana allin ruraq runa
paymantapas allin kaq runata millpuypaq-millpuruptinqa?
14 Challwakunaman hinallañam runakunataqa tikrarunki.
Mana gobiernoyoq uruchakunaman hinallañam tikrarunki.
15 Caldea runakunam wakin nacionkunata
anzuelowan hapichkaq hina hapirunku.
Mallankuwanmi aysaypaq-aysarunku.
Mallankuwanmi huñuypaq-huñurunku.
Chayraykum sinchillataña kusikunku.
16 Chayraykum mallankutapas adoranku.
Mallankunamanmi inciensotaraq qontichinku.
Mallankuraykum sumaqllataña kawsakunku.
Mallankuraykum miskillataña mikukunku.
17 ¿Chaynaqa chayraykuchu mallankumanta
sapa kutilla challwakunata vacianqa?
¿Nacionkunamanta mana llakipayarikuspachu
wañuchiypaq-wañurachinqaku?