Habacucpa mañakusqanmanta
3
Diosmanta willakuq Habacucpa waqayllawanña mañakuspan sonqomanta takisqan:
2 Dios Taytalláy,
ancha reqsisqa kasqaykimantam uyarirqani.
Dios Taytalláy,
ñoqaqa
tukuy imapas rurasqaykimantam mancharikurqani.
Watakunapa chawpinpiyá
kawsarichiy rurasqaykikunata.
Watakunapa chawpinpiyá
reqsichiy rurasqaykikunata.
Piñakuchkaspapas yuyariyá llakipayakuynikita.
3 Diosqa Teman llaqta lawmantam hamuchkan.
Chuya Diosqa Paran orqomantam hamuchkan.
(Samariy)
Cielokunatapas tapaykunraqmi kanchariyninqa.
Kay pachapi tukuy ima kaqpas alabanmi paytaqa.
4 Achkiy hina kancharistinmi payqa hamuchkan.
Llipyaykunaraqmi makinmantapas lloqsimuchkan.
Paypa atiyninqariki chaypim tarikuchkan.
5 Paypa ñawpaqnintam hamuchkan peste onqoy.
Paypa qepantam hamuchkan calentura onqoy.
6 Kay pachapas kuyurinraqmi pay sayaykuptinqa.
Nacionkunapas katkatatanmi pay qawariykuptinqa.
Ñawpa tiempomantaraq kaq orqokunapas chamchakurunmi.
Ñawpa tiempomantaraq kaq moqokunapas tuñirunmi.
Rurasqankunaqa takyanqa
wiña-wiñaypaqmi.
7 Ñoqaqa Cusan lawpi yachaqkunatam
mancharisqallataña rikurqani.
Ñoqaqa Madian lawpi yachaqkunatam
katkatatachkaqta rikurqani.
8 Dios Taytalláy
¿mayukunapa contranpichum piñakurunki?
¿Mayukunapa contranpichum rabiakurunki?
¿Lamar qochapa contranpichum piñakurunki?
¿Caballoykikunapi sillakuspachum
chaykunapa contranpi piñakurunki?
¿Venceruq carretaykikunapi rispachum
chaykunapa contranpi piñakurunki?
9 Flechanaykitapas listollatañam rurarunki.
Juramentowan citasqayki flechakunatapas
qamqa listollatañam rurarunki.
(Samariy)
Qamqa mayukunawanmi allpatapas raqrarachirqanki.
10 Orqokunapas rikuykususpaykim kuyutyarqa.
Lloqllakunapas chaypa hawantam pasarurqa.
Hinaptinmi uku-uku lamar qochapas qaparirqa.
Olankunapas orqochakuspam hoqarikurqa.
11 Inti killapas maymi kananpim sayarunku.
Flechaykikuna chipityasqanraykum sayarunku.
Lanzaykipas kanchityasqanraykum sayarunku.
12 Kay pachatapas piñakuyllawanñam saruparurqanki.
Nacionkunatapas rabiallawanñam trillarurqanki.
13 Runaykikunata salvanaykipaqmi lloqsirqanki.
Sapaqchasqayki reyta salvanaykipaqmi lloqsirqanki.
Mana allin ruraq wasipa qatantam tuñirachirqanki.
Cimientokamam pasaypaqta qalatururqanki.
(Samariy)
14 Jefenkutapas wañurachirqanki armanwanmi.
Chaynataqa rurarurqanki muyuq wayra hina
cheqerachiwanankupaq pawaykamuptinmi.
Chaynataqa rurarurqanki maymi pakakusqanpi
ñakariq runatapas wañurachisqanmanta kusikuptinmi.
15 Qamqa lamar qochapipas
caballoykikunawanmi purirqanki.
Mastarisqa yakukunatapas
posoqachistinmi purirqanki.
16 Uyariykuptiymi ukullaypas hukmanyarurqa.
Uyariykuptiymi jetallaykunapas katkatatarqa.
Cuerpollaypas mana valeqñam rikurirun.
Piernallaypas katkatataqllañam rikurirun.
Chaywanpas ñoqaqa pacienciawanraqmi suyasaq.
Contraykupi hatarimuqkuna sasachakunantam suyasaq.
17 Manaña higos sachakuna waytaptinpas,
manaña uvas plantakuna ruruptinpas,
manaña aceitunas sachakuna ruruptinpas,
chakrakunapi kawsaykuna manaña kaptinpas,
kanchakunapi ovejakuna manaña kaptinpas,
corralkunapi vacakuna manaña kaptinpas
18 ñoqaqa Tayta Diosraykum kusikusaq.
Salvawaqniy Diosraykum kusikusaq.
19 Señor Diosmi kallpanchaykuwaqniyqa.
Chakillaytapas tarukapa chakinta hinaraqmi
mana urmaqtaña ruraykapuwan payqa.
Payqa altokunapim purichillawan ñoqallaytaqa.
Takiqkunapa maestronpaq,
cuerdakunapa compañasqan taki.