4
Basan lawpi wira vacakunaman
rikchakuq Samaria llaqtapi warmikuna,
qamkunaqa wakchakunatam usuchinkichik.
Mana imayoqkunatam sarutyankichik.
Vinota apamunankupaqmi
qosaykichikta kamachinkichik.
Chaynaqa kaytayá uyariychik:
2 Señor Diosmi chuya kayninrayku jurarqa kaynata:
Hamuchkanmi tiempo
watuchasqata pusasunaykichikpaq,
anzuelowan challwa hapisqa hina
miraynikichikpas aysasqa kanankupaq.
3 Ñawpaqnikichikpi kaq
murallapa uchkuntam
sapakama lluptinkichik.
Hermon Orqoman wischusqam kankichik.
Chaynatam Tayta Dios nin.
Castigasqapas manaña yachariq kasqankumanta
4 Betel llaqtapi taytachapa capillanmanraqyá riychik.
Gilgal llaqtapi taytachapa capillanmanraqyá riychik.
Mana kasukuqraqyá kaychik.
Sapa tempranonyá lliw kañanakunata apaychik.
Sapa kimsa punchawyá diezmoykichikkunata apaychik.
5 Graciasta qospayá qonchuyoq tantataraq kañaychik.
Tukuy hinastinpiyá munasqaykichikman hina
churasqaykichik ofrendamanta willakuychik.
Chayna ruraymi qamkunataqa gustasunkichik.
Chaynatam Tayta Dios nin.
6 Ñoqam llapa llaqtakunapi
yarqaymanta kachirqaykichik.
Ñoqam llapa llaqtakunapi
mana mikunayoqta kachirqaykichik.
Chaywanpas manam qamkunaqa
kutirikamuwayta munarqankichikchu.
Chaynatam Tayta Dios nin.
7 Cosechapaq kimsa killaraq faltachkaptinmi
paratapas mana parachirqanichu.
Huk llaqtapim parachirqani.
Huk llaqtapim usyachirqani.
Wakin chakrakunatam pararqa.
Wakinñataqmi mana paraptin chakirurqa.
8 Iskay kimsa llaqtamantam runakuna
yaku maskaq rirqaku huk llaqtallaman.
Ichaqa saksanankukama tomanankupaqmi
mana tarirqakuchu.
Chaywanpas manamá ñoqaman
kutimuytaqa munarqankichikchu.
Chaynatam Tayta Dios nin.
9 Qamkunatam castigarqaykichik
polvilla onqoykunawan.
Qamkunatam castigarqaykichik
puka punchu plagakunawan.
Huertaykichiktawan uvas plantaykichiktam
chakirachirqani.
Higostawan aceituna sachaykichiktam
taksa aqarwaywan mikurachirqani.
Chaywanpas manamá ñoqaman
kutimuytaqa munarqankichikchu.
Chaynatam Tayta Dios nin.
10 Egipto naciontam
tukuy imawan castigarqani.
Chaynatam qamkunatapas castigarqani.
Mozokunatam guerrapi wañuchirqani.
Caballoykichikkunatapas enemigokunam hapikuykurqa.
Llumpay karukamam wañuqkunapas asnarirqa.
11 Sodoma llaqtatam timpurachirqani.
Gomorra llaqtatam timpurachirqani.
Chaynatam qamkunatapas chaqwarurqaykichik.
Rupachkaq yantata hinam horqorqaykichik.
Chaywanpas manamá ñoqaman
kutimuytaqa munarqankichikchu.
Chaynatam Tayta Dios nin.
12 Israel castakuna,
chaynatapunim qamkunatapas castigasqaykichik.
Chaynata ruranay kachkaptinqa qamkunayá alistakuychik.
Diosnikichikwan tupanaykichikpaqyá alistakuychik.
13 Tayta Diosmi orqokunata unancharqa.
Paymi wayratapas unancharqa.
Imam munasqantam runakunaman reqsichin.
Payqa achikyaytam tutayarachin.
Payqa alto moqokunapim purin.
Paypaqa Llapallan Kamachiqmi sutin.